القالى جيىندى ءال-فارابي اتىنداعى قازۇۋ-دىڭ باسقارما توراعاسى – رەكتورى جانسەيىت تۇيمەباەۆ اشىپ, ءىس-شارانىڭ ءمانى مەن ماقساتىنا توقتالدى.
- ءال-فارابي اتىنداعى قازاق ۇلتتىق ۋنيۆەرسيتەتىندە جاقىندا عانا تۇركىتانۋ جانە التايتانۋ عىلىمي-زەرتتەۋ ينستيتۋتى اشىلدى. بۇل ينستيتۋت تۇركى حالىقتارىنىڭ تاريحى مەن ادەبيەتىن جان-جاقتى زەرتتەپ, سارالاۋدا ۇلكەن جوبالاردى باستاپ كەتتى, – دەدى رەكتور.
سونىمەن قاتار جانسەيىت تۇيمەباەۆ بۇگىندە قازاقستان – تۇركيا قارىم-قاتىناسى جاڭا دەڭگەيگە كوتەرىلگەنىن ايتا كەلە, وسى ينستيتۋت اياسىندا ەكى ەل عالىمدارىنىڭ قاتىسۋىمەن سالىستىرمالى-تاريحي سوزدىكتەر, تۇركولوگيالىق ەنتسيكلوپەديالار شىعارىلىپ, عىلىمي زەرتتەۋلەر جۇرگىزىلەتىنىن جەتكىزدى.
جيىندا ءسوز العان ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ وكىلەتتى كەڭەس توراعاسى, پروفەسسور مۇحيتتين شيمشەك باۋىرلاس ەكى ەل اراسىنداعى ورتاق تۇركولوگيالىق زەرتتەۋلەردىڭ وزەكتىلىگىنە ءمان بەردى. تۇساۋى كەسىلىپ, قازاق وقىرمانىنا جول تارتقان «تۇرىك ادەبيەتىنىڭ ەسىمدەر سوزدىگى» جيناعى جايلى مالىمەت بەردى.
− كىتاپ تۇرىك ادەبيەتىنىڭ باسىنان XXI عاسىرعا دەيىنگى, دالىرەك ايتقاندا 1985 جىلى تۋعان اقىن-جازۋشىلاردى قامتيدى. كلاسسيكالىق ادەبيەت, ايتىس, تاساۋف, سوپىلىق ءداستۇرى جانە تانزيمات داۋىرىنەن كەيىنگى زاماناۋي تۇرىك ادەبيەتى تولىعىمەن قاراستىرىلدى, – دەدى پروفەسسور.
نەگىزىنەن انادولىداعى سەلجۇكتەرمەن باستالىپ, وسماندىقتارمەن جالعاسىپ, بۇگىنگى كۇنگە جەتكەن ادەبي جيناقتى قوعاممەن ءبىر ارناعا توعىستىرۋدى كوزدەيدى. سونىمەن قاتار ەسكى ۇيعىر, قاراحان, حورەزم-قىپشاق, شاعاتاي جانە ازەربايجان ەسىمدەرى مەن اتاۋلارى دا ەنگىزىلگەن.
سونداي-اق جيىندا تۇركيا رەسپۋبليكاسىنىڭ الماتى قالاسىنداعى باس كونسۋلى الي ريزا اكىنجى, ق.ا. ياساۋي اتىنداعى حالىقارالىق قازاق-تۇرىك ۋنيۆەرسيتەتى ەۋرازيا عىلىمي-زەرتتەۋ ينستيتۋتىنىڭ ديرەكتورى سۋات بەيلۋر, ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى جانار تەمىربەكوۆا جانە وزگە دە قوناقتار پىكىر ءبىلدىرىپ, تۇركىتىلدەس مەملەكەتتەردىڭ ءوزارا ىنتىماقتاستىعىنا ايرىقشا نازار اۋداردى. سونىمەن قاتار جيىلعاندار «تۇرىك ادەبيەتىنىڭ ەسىمدەر سوزدىگىن» تۇركىتانۋعا قوسىلعان ەلەۋلى ۇلەس رەتىندە باعا بەردى.
قاتىسۋشىلار ءوز سوزدەرىندە تۇركىلەردىڭ تاسقا باسىلعان ورتاق تاريحى مەن ءتىلى, مادەنيەتى مەن ءداستۇرى ءالى دە تەرەڭ زەرتتەۋدى قاجەت ەتەتىنىن العا تارتتى. باسقوسۋ ءوز كەزەگىندە تۇركى مۇراسىن, تۇركىتىلدەس حالىقتاردىڭ ءتىلىن, ادەبيەتىن, فولكلورىن, تاريحىن, ەتنوگرافياسىن, مادەنيەتىن زەرتتەۋشىلەرگە تىڭ سەرپىن, جاڭا باعىت بەرەتىنىنە سەنىم ءبىلدىردى.
كونفەرەنتسيا بارىسىندا ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ وكىلەتتى كەڭەس توراعاسى, پروفەسسور مۇحيتتين شيمشەككە ءال-فارابي اتىنداعى قازۇۋ-دىڭ «قۇرمەتتى پروفەسسورى» اتاعى بەرىلىپ, ءال-فارابي توسبەلگىسىمەن ماراپاتتالدى.
