سۋرەتتى تۇسىرگەن جۇماباي مۇسابەكوۆ
شىنى كەرەك, بۇرىن سىرقاتتانىپ كەلگەن ناۋقاستى قۋىقتاي بولمەدە قابىلداعان مەديتسينا قىزمەتكەرلەرى زامانعا ساي جاڭا عيماراتقا قونىستانعاندارىنا قۋانىشتى. ەم ىزدەگەن جاڭعا ەرىنبەي كومەك كورسەتۋگە بار جاعداي جاسالعان نىسان دارىگەر قاۋىمى ءۇشىن دە ماڭىزدى ەكەنى داۋسىز.
كوكوزەك اۋىلىنداعى جاڭا مەديتسينالىق پۋنكتتە العاشقى مەديتسينالىق كومەك كورسەتۋ ءۇشىن بارلىق جاعداي جاسالعان. مۇندا ەم-دوم كورسەتەتىن كابينەت, ەگۋ جانە باسقا دا قاجەتتى كابينەتتەر بار, ىستىق جانە سۋىق سۋ, ەلەكتر جىلۋىمەن قامتىلعان. مۇندا 760-تان استام تۇرعىن ساپالى مەديتسينالىق قىزمەت الا الادى.
وسى رەتتە ايتا كەتەيىك, بلوك-ءمودۋلدى تيپتەگى مەديتسينالىق پۋنكتتەر اۋىل تۇرعىندارى ءۇشىن مەديتسينالىق قىزمەتتەردىڭ قولجەتىمدىلىگى مەن ساپاسىن ارتتىرۋ ماسەلەسىن قىسقا مەرزىمدە شەشۋگە مۇمكىندىك بەرەدى. وسى ادىسپەن تۇرعىزىلاتىن نىساندار قۇرىلىس جۇمىستارىنىڭ جىلدامدىعىمەن جانە ساپاسىمەن ەرەكشەلەنەدى, سونداي-اق نىسان قۇرىلىسىنىڭ قۇنى تومەندەۋ بولادى. وسى تيپتەگى نىساندار جوبالىق-سمەتالىق قۇجاتتامالاردى ازىرلەۋدى قاجەت ەتپەيدى.
ساعابۇيەن اۋىلىنىڭ 2 مىڭعا جۋىق تۇرعىنى جاڭا جىل قارساڭىندا جاڭا مەديتسينالىق امبۋلاتورياعا قول جەتكىزدى. ونىڭ قۇرىلىسى وسى جىلدىڭ كوكتەمىندە باستالعان بولاتىن. امبۋلاتوريا ءبىر اۋىسىمدا 25 ادامدى قابىلداۋعا ارنالعان.
اۋدان اكىمىنىڭ ورىنباسارى عازيز ەسجانوۆتىڭ ايتۋىنشا, زاماناۋي مەديتسينالىق جابدىقتارمەن قامتىلعان جاڭا الەۋمەتتىك ماڭىزى بار نىسانداردىڭ اشىلۋىنىڭ ناتيجەسىندە, اۋىل تۇرعىندارى ساپالى مەديتسينالىق كومەك الا الادى. ودان بولەك, قاراكەمەر اۋىلىندا «اۋىل – ەل بەسىگى» باعدارلاماسى اياسىندا تاعى ءبىر جاڭا مەديتسينالىق مەكەمەنىڭ قۇرىلىسى جۇرگىزىلىپ جاتقانىن جەتكىزدى. كوپ ۇزاماي ونداعى تۇرعىندار دا اۋدان ورتالىعىنا سابىلمايتىن بولادى.
جەتىسۋ وبلىسى
