التى ايدان كەيىن دە الا المايتىن ەدى, ەگەر ءبىر ساتقىن شاعاتايعا وتىراردىڭ قاقپاسىن اشىپ بەرمەسە. قاھارلى شىڭعىس حاننىڭ الدىندا تۇتقىن بولىپ وتىرىپ تا تىزە بۇكپەي اسقاقتاپ تۇردى, ءور رۋحتى قايىر حان. دارا تۋعان دانا باتىردىڭ ەرلىگى اقيقاتپەن استاسقان اڭىز بولىپ جەتتى بۇگىنگە. وتىراردىڭ ءور رۋحتى ەر پەرزەنتى قايىر حاننىڭ ەسىمى مەن ەرلىگى حالىقپەن بىرگە جاساسىپ كەلەدى.
وكىنىشتىسى, ەلىن سۇيگەن, ەسىمى ەرلىكتىڭ رامىزىنە اينالعان رۋحتى ەردى قۇرمەتتەۋىمىز كەمشىن.
ولگەن سوڭ دا ورالامىز رۋح بوپ,
شىعا كەلىپ ايقاسامىز كوردەن ءبىز, –
دەپ شاندور پەتەفي جىرلاعانداي, ولگەن سوڭ دا اڭىزعا اينالعان ەرلىگىمەن ەل مەن ەردىڭ رۋحىن اسقاقتاتىپ تۇرعان قايىر حانعا وتىراردا, الماتى مەن استانادا ەڭسەلى ەسكەرتكىش قوياتىن كەز كەلدى.
قايىر حان ەسكەرتكىشى جاستىڭ دا, جاسىمىستىڭ دا پاتريوتتىق سەزىمىن وياتىپ, حالىقتىڭ رۋحىن اسقاقتاتۋعا قىزمەت ەتەر ەدى.
ءسابيت دوسانوۆ,
جازۋشى,
مەملەكەتتىك سىيلىقتىڭ لاۋرەاتى
الماتى
...پىكىر بىلدىرەدى
الاش ارىسىنا ارنالعان تەلەفيلم
مەملەكەت باسشىسى قاسىم-جومارت توقاەۆ قازاقستان حالقىن ءتول تاريحىمىزدىڭ ماڭىزدى بەلەسى – تاۋەلسىزدىك كۇنىمەن قۇتتىقتاۋىندا: «ازاتتىق ءۇشىن ارپالىسقان ۇلت پەرزەنتتەرىن ەل جادىندا ماڭگى ساقتاۋ – قاسيەتتى پارىزىمىز. ولاردىڭ وتانشىلدىق قاسيەتى – بۇگىنگى جانە بولاشاق ۇرپاققا ءاردايىم ۇلگى-ونەگە», دەپ اتاپ كورسەتكەن ەدى.
ەلىمىزگە تاۋەلسىزدىك عايىپتان پايدا بولعان جوق. ول – قازاق حالقىنىڭ نامىسىن جىرتقان الاش وردا ارىستارى مەن ولاردان كەيىنگى تاريحي تۇلعالاردىڭ ارقاسىندا باسىمىزعا قونعان باقىت.
كەزىندە ازاتتىق ءۇشىن كۇرەسكەن الاش قايراتكەرلەرىنىڭ ءبىرى – مىرجاقىپ دۋلات ۇلى. قايسار قايراتكەر كەزىندە «قالىڭ ۇيقىدا» جاتقان ەلىن ويانۋعا ۇندەپ, جارقىن بولاشاققا شاقىردى. تاۋەلسىزدىكتىڭ تار جول, تايعاق كەشۋىن باسىنان وتكەرگەن اياۋلى ۇلىن ەلى دە ەسىنەن شىعارماق ەمەس.
تاياۋدا قازاقستان كينويندۋسترياسى تاعى ءبىر تەلەفيلممەن تولىقتى. التى بولىمنەن تۇراتىن كينوتۋىندى «مىرجاقىپ. ويان, قازاق!» دەپ اتالادى. 16-17 جەلتوقسان كۇندەرى «Qazaqstan», «اباي TV» تەلەارنالارى ارقىلى ءوز كورەرمەنىمەن قاۋىشقان فيلم ەرەكشە تولقىتىپ, جانارلارعا جاس ءۇيىردى. تەكتىنىڭ تۇياعى گۇلنار اپامىزدىڭ قيلى تاعدىرى ادام جانىن باۋراپ, تەبىرەنتپەي قويمايدى. ءبىر سوزبەن ايتقاندا, كينوتۋىندى ءساتتى شىققان.
الاش ارىستارى قانداي قۇرمەتكە دە لايىق. ەندەشە كورەرمەن رەتىندە الداعى ۋاقىتتا دا وسىنداي دۇنيەلەردىڭ كوپ بولعانىن قالار ەدىك.
كارىباي امزە ۇلى,
زەينەتكەر
تۇركىستان وبلىسى
...ماقساتىمەن بولىسەدى
جۋرناليست بولعىم كەلەدى
11-سىنىپتا وقىپ جۇرگەندىكتەن, ءومىر جولىم, بولاشاق ماماندىعىم تۋرالى ءجيى ويلانامىن. مەنى جۋرناليستيكا سالاسى كوبىرەك قىزىقتىرادى. قىسقا اڭگىمەلەر جازۋعا تالپىنىپ ءجۇرمىن. بىزگە ەسسە جازۋ تاپسىرماسى بەرىلگەندە قۋانىپ قالامىن, ويتكەنى جۇمىسىم ارقاشان جاقسى باعالانادى. مەن گۋمانيتارلىق پاندەرگە جاقىن اداممىن, ال مۇنىڭ جۋرناليست ماماندىعىن ءساتتى مەڭگەرۋ ءۇشىن وتە ماڭىزدى ەكەنى انىق. باسقا ماماندىقتار سياقتى جۋرناليست ماماندىعى دا جوعارى بىلىكتىلىكتى, جاۋاپكەرشىلىكتى جانە ۇقىپتىلىقتى قاجەت ەتەتىندىكتەن, جان-جاقتى ءبىلىم الىپ, دامۋ ۇستىندەمىن.
مەنىڭ نەلىكتەن جۋرناليست بولعىم كەلەدى؟ ويتكەنى ءتۇرلى سالا ادامدارىمەن قارىم-قاتىناس جاساسام, ومىرىندە ۇلكەن جەتىستىكتەرگە قول جەتكىزگەن تانىمال تۇلعالاردان سۇحبات السام دەيمىن. مەنىڭ ويىمشا, بۇل وتە قىزىقتى. اقپاراتتى جيناي جانە وڭدەي بىلگەن مامان مەرزىمدى باسىلىمداردا, راديو مەن تەلەديداردا, سايتتا جۇمىس ىستەي الادى. بۇل ماماندىقتىڭ بولاشاعى زور ءارى سۇرانىسقا يە دەپ بىلەمىن.
جۋرناليستيكانىڭ وتە جاۋاپتى ماماندىق ەكەنىن دە جاقسى تۇسىنەمىن. ول جالىقپاي, تالماي ىزدەنۋدى قاجەت ەتەدى. بىلىكتىلىك ءوز كەزەگىندە شىعارماشىلىعىڭدى ۇشتاي تۇسۋگە جول اشادى. ال ءوزىمنىڭ جۋرناليست ماماندىعىن تاڭداعان سەبەبىم, بويىمدا جازۋ-سىزۋعا دەگەن تالاپ پەن تالپىنىس بار. بۇل – ماماندىقتى ءساتتى مەڭگەرۋگە اسا قاجەت قاسيەتتەر. وسى سالادا جەتىستىككە جەتەتىنىمە وسى باستان سەنىمدىمىن. بۇعان تىرناقالدى شىعارمالارىم دالەل.
ارينە, ءالى ۇيرەنەرىمنىڭ كوپ ەكەنى, بىلگەنىمنەن بىلمەگەنىمنىڭ باسىم تۇسەتىنى داۋسىز. بىراق وسى ماقسات جولىندا بار مۇمكىندىگىمدى سارقا پايدالانامىن. ەڭ باستىسى, ومىرلىك جولىڭدا دۇرىس تاڭداۋ جاساي ءبىلۋ. ءوز باسىم ماماندىق تاڭداۋدا قاتەلەسكەن جوقپىن عوي دەپ سەنەمىن.
بالا كەزىمنەن انام مەنى شىنشىلدىق پەن ادامگەرشىلىككە باۋلىدى, قازاقتىڭ كوركەم مىنەزىن بويىما ءسىڭىردى, جەكە تۇلعا رەتىندە قالىپتاسۋىما جاعداي جاسادى. وسىنىڭ ارقاسىندا ءوز تالعامىم بار جانە ءوز باعامدى بىلەتىن ادام بولىپ ءوسىپ كەلەمىن. «ادامدارعا شىندىقتى جەتكىزە بىلگەندە عانا ولاردىڭ جۇرەگىنىڭ كىلتىن تابا الاسىڭ», دەۋشى ەدى انام. وسى قاعيدات مەنىڭ ومىرلىك ۇستانىمىم بولماق.
قورىتا ايتقاندا, مەن جۇرەك قالاۋىمەن تاڭداعان ماماندىعىم ارقىلى قوعامنىڭ دامۋىنا ۇلەس قوسقىم كەلەدى. ويتكەنى جۋرناليستەر دە ەل مەن حالىق ءۇشىن جۇمىس ىستەيدى, ءىلىپ الار جاقسىلىقتى جاريا ەتىپ, جۇرتشىلىقتىڭ ەرتەڭگە دەگەن ءۇمىتىن وياتادى.
گۇلناز ءراحماتىلدا,
جامبىل جاباەۆ اتىنداعى №4 مەكتەپ-گيمنازيا وقۋشىسى
استانا
