قر پارلامەنتى ءماجىلىسىنىڭ دەپۋتاتى ەرلان سايروۆ قاڭتار وقيعاسى كەزىندە الماتىدا جوعارى ساپالى بايلانىس قۇرالدارىمەن, اسكەري كيىممەن جابدىقتالعان قارۋلى توپتار پايدا بولعانىن ەسكە سالىپ, بەرىك اسىلوۆقا سۇراق قويدى.
«ولار سودىرلاردى, قاتىسۋشىلاردى باقىلاپ وتىردى. ءبىر توپ ءتىپتى بالالار جۇقپالى اۋرۋلار ديسپانسەرىنىڭ فيليالىن قورشاپ العان ەدى. ولار جاعدايدى راتسيانىڭ كومەگىمەن باقىلاپ, رەتتەپ وتىرعانى دا انىقتالدى. بىراق كەيىن ولار جوعالىپ كەتتى. كوپتەگەن ازاماتتار ولاردى سۋرەتكە ءتۇسىرىپ تە ۇلگەرگەن. جالپى, ءبىر جىلدىڭ ىشىندە ولاردىڭ جەكە باسى انىقتالدى ما؟ ولاردى قارۋ-جاراقپەن, زاماناۋي بايلانىس قۇرالدارىمەن كىم قامتاماسىز ەتتى؟ بۇل تەكسەرىلدى مە؟ نەگە بۇل جاعداي جان-جاقتى زەرتتەلمەي جاتىر؟», دەدى پارلامەنت ءماجىلىسىنىڭ دەپۋتاتى ەرلان سايروۆ.
بۇعان جاۋاپ رەتىندە باس پروكۋرور بەرىك اسىلوۆ بۇل كۇردەلى ماسەلەلەردىڭ ءبىرى ەكەنىن ايتتى.
«اتالعان فاكتىلەر بويىنشا ارنايى تەرگەۋ توبى قۇرىلىپ, ولار ءتيىستى شارالاردى قولعا الىپ جاتىر. ال جۇقپالى ديسپانسەرىنىڭ فيليالىنا كەلەتىن بولساق, بۇل اۋماقتا مۇنداي ادامدار شىنىمەن دە جۇرگەن. ول كۇندەرى ولاردى ۇستاۋعا مۇمكىندىك بولمادى. ولاردىڭ بارلىعى جوعالىپ كەتتى. بۇل ادامدار كىم ەكەنىن ءبىز ءالى انىقتاعان جوقپىز», دەدى باس پروكۋرور.
دەگەنمەن, بەرىك اسىلوۆ ولاردىڭ جەكە باسى ءالى دە انىقتالاتىنىن قوسا ايتتى.
«ولاردىڭ قايدا جوعالعانىن, كىم ەكەنىن ءالى انىقتايمىز. بۇل ۋاقىتتى تالاپ ەتەدى. بۇگىندە جەدەل-ىزدەستىرۋ شارالارى جۇرگىزىلىپ جاتىر. قوسىمشا اقپارات بولسا, ارينە حابارلايمىز», دەپ قورىتىندىلادى بەرىك اسىلوۆ.
