2025 جىلعا دەيىن وبلىستا تۋريزم سالاسىندا 338 جاڭا جۇمىس ورنى قۇرىلادى. 10,8 ملرد تەڭگە سوماسىنا توعىز ينۆەستيتسيالىق جوبانى ىسكە اسىرۋ جوسپارلانىپ وتىر. جوبا اياسىندا «سارايشىق» ۆيزيت-ورتالىعى بيۋدجەت ەسەبىنەن سالىنادى, تاعى 8 جوبا جەكە ينۆەستيتسيالار ەسەبىنەن ىسكە اسىرىلادى. قازىرگى ۋاقىتتا ءتورت جوبا ىسكە اسىرىلدى - «نۇرلى تال» ەتنوپاركى, قۇرمانعازى اۋدانىندا ەكى تۋريستىك دەمالىس بازاسى جانە ماقات اۋدانىندا كەمپينگ قۇرىلدى.
«2023 جىلى وبلىستا ءتۇرلى كورمەلەر, فەستيۆالدار وتكىزۋ جوسپارلانعان, وندا وبلىس قولونەرشىلەرى مەن ديزاينەرلەرى ءوز ونىمدەرىن كورسەتە الادى. ءتۋريزمدى ناسيحاتتاۋ ءۇشىن وڭىردە تۋروپەراتورلار, باق وكىلدەرى مەن جاستار ءۇشىن اقپاراتتىق تۋر ۇيىمداستىرىلادى. سونداي-اق بالالار مەن جاسوسپىرىمدەر ءتۋريزمىن دامىتۋ, قۇرمانعازى اۋدانىنداعى ايگىلى لوتوس القابى تۋرالى بەينەروليكتەر جاسالادى, يندەر كولىنىڭ قۇقىقتىق مارتەبەسىن انىقتاۋ بويىنشا ساراپتامالىق-زەرتتەۋ جۇمىستارى جۇرگىزىلەدى», دەدى جاننات سابىرعاليەۆا.
ونىڭ ايتۋىنشا 2022 جىلى وبلىستا تۋريستەر سانى 108 مىڭنان استى, بۇل وتكەن جىلدىڭ سايكەس كەزەڭىمەن سالىستىرعاندا ءۇش ەسە كوپ. سونداي-اق 2022 جىلى التى تۋريستىك نىساندا QR-كودتار ورناتىلعان, سونىڭ ارقاسىندا تۋريستەرگە بەس تىلدە اقپارات الۋعا جانە 3D-تۋر جاساۋعا مۇمكىندىك بەرىلەدى.
بالالار مەن جاسوسپىرىمدەر ءتۋريزمىن دامىتۋ ءۇشىن جىل سايىن كوپبالالى, از قامتىلعان وتباسىلاردان شىققان بالالار ءۇشىن ء«وز ەلىڭدى ءبىل» جوباسى اياسىندا استانا, الماتى, اقتاۋ قالالارىنا ەكسكۋرسيالار ۇيىمداستىرىلادى.
