بۇل زەرتتەۋ 15 جاس ارالىعىنداعى وقۋشىلاردىڭ ءبىلىمى مەن ماشىقتارىن ءۇش باعىت بويىنشا باعالايدى: وقۋ, ماتەماتيكا, جاراتىلىستانۋ.
سونىمەن قاتار زەرتتەۋ وقۋشىلاردىڭ وقۋ ۇلگەرىمىنە اسەر ەتەتىن فاكتورلاردى انىقتاۋعا مۇمكىندىك بەرەدى.
«مەكتەپتەرگە ارنالعان PISA-نىڭ» ەلدەرگە ارنالعان ءداستۇرلى PISA-دان ايىرماشىلىعى – ونىڭ جەكە مەكتەپ دەڭگەيىندە سىرتقى باعالاۋدى جۇرگىزۋى. زەرتتەۋ ناتيجەلەرى بويىنشا ءبىلىم بەرۋ ۇيىمدارى ەلىمىزدىڭ باسقا مەكتەپتەرى مەن كوللەدجدەرىمەن سالىستىرعاندا وقۋشىلاردىڭ فۋنكتسيونالدىق ساۋاتتىلىق دەڭگەيى جانە PISA نەگىزگى زەرتتەۋىنە قاتىسۋشى ەلدەردىڭ ورتاشا ۇپايى تۋرالى تالدامالىق ەسەپ الادى. زەرتتەۋ ءاربىر مەكتەپتىڭ نەمەسە كوللەدجدىڭ مىقتى جانە ءالسىز تۇستارىن انىقتاۋعا, الىنعان مالىمەتتەر نەگىزىندە ءبىلىم ساپاسىن ارتتىرۋ شارالارىن قابىلداۋعا مۇمكىندىك بەرەدى», دەدى وقۋ-اعارتۋ مينيسترلىگىنىڭ ءبىلىم سالاسىنداعى ساپانى قامتاماسىز ەتۋ كوميتەتىنىڭ توراعاسى ەرنۇر داۋەنوۆ.
«مەكتەپتەرگە ارنالعان PISA» زەرتتەۋىنە ەلىمىزدىڭ بارلىق ايماعىنان 33 مىڭنان استام قازاقستاندىق ءبىلىم الۋشى قاتىسقانىن ايتا كەتەيىك. زەرتتەۋ ناتيجەسى كەلەسى جىلدىڭ 2 توقسانىندا بەلگىلى بولادى.
2021 جىلى «مەكتەپتەرگە ارنالعان PISA» زەرتتەۋى قازاقستاندا ۆاليداتسيا كەزەڭىنەن ءساتتى ءوتتى. ول كەزدە اپروباتسياعا ەلىمىزدىڭ 200 مەكتەبى قاتىستى. اپروباتسيالىق زەرتتەۋ ناتيجەلەرى بويىنشا جەكە جانە توپتىق ەسەپتەر جاسالىپ, زەرتتەۋگە قاتىسقان بارلىق مەكتەپكە ۇسىنىلدى.
