سقو پوليتسەيلەرى «سينتەتيكانىڭ» اسا ءىرى مولشەردەگى پارتيالارىنىڭ ءبىرىن كۇدىكتىنىڭ اۋلاسىنان تاۋىپ الدى.
كۇزدە جەرگىلىكتى پوليتسەيلەر سينتەتيكالىق ەسىرتكى تاراتتى دەگەن كۇدىكپەن پەتروپاۆل قالاسىنىڭ 32 جاستاعى تۇرعىنىن ۇستادى. جەكە ءتىنتۋ بارىسىندا ودان كريستالل ءتارىزدى زات سالىنعان پاكەت تاركىلەندى. جالدامالى پاتەردەن تاعى ەكى پاكەت پەن تەمەكى شەگۋگە ارنالعان قۇرىلعى تابىلدى. پوليتسەيلەر ۇستالعاننىڭ تۇرعىلىقتى جەرى بويىنشا جەكە مەنشىك ءۇيدىڭ اۋلاسىنان اسا ءىرى مولشەردەگى ەسىرتكى سالىنعان پوليمەر پاكەتىن الدى. ساراپتاما قورىتىندىسىنا سايكەس, ول – تۇز دەگەن اتپەن بەلگىلى α-PvP ەسىرتكى زاتى. الىنعان زاتتىڭ جالپى سالماعى 484,32 گرامم, بۇل اسا ءىرى مولشەرگە جاتادى. ول 2 مىڭنان استام ءبىر رەتتىك قولداناتىن دوزانى قۇرايدى.
«فاكتى قر قىلمىستىق كودەكسىنىڭ 297-بابىنىڭ 3-بولىگى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. ءىس ماتەريالدارى سوتقا جىبەرىلدى», دەدى سقو ءىىد ەسىرتكى قىلمىسىنا قارسى كۇرەس باسقارماسىنىڭ باستىعى يۆان تەرزيدي.
جالپى جىل باسىنان بەرى سولتۇستىك قازاقستان وبلىسىنىڭ پوليتسەيلەرى ەسىرتكى ساتتى دەگەن كۇدىكپەن 82 ادامدى ۇستادى. زاڭسىز اينالىمنان 425 كەلى ەسىرتكى تاركىلەندى, ونىڭ 3 كەلى 429 گرامى سينتەتيكالىق ەسىرتكى.
