ءدۇبىرلى دوداعا 200-دەن استام ءوتىنىم كەلىپ تۇسكەن. بۇل – قازاقستاندىق كومپوزيتورلار مەن جازۋشىلاردىڭ كەيىنگى ءۇش جىلدا جازىلعان جانە بۇرىن كوپشىلىك الدىندا ورىندالماعان تۋىندىلارى.
«بايقاۋ كوپشىلىككە تىڭ تۋىندىلار ۇسىنىپ قانا قويماي, مۇلدەم جاڭا ەسىمدەر اشتى. جەڭىمپازدار مەن لاۋرەاتتاردىڭ شىعارماشىلىق جۇمىستارى حالقىمىزدىڭ تاريحى مەن مادەنيەتىندە ماڭىزدى ءىز قالدىرىپ, قازىرگى مادەني لاندشافتىڭ ءبىر بولىگىنە اينالاتىنىنا سەنىمدىمىن. بۇل جوبانى ءبىز جاس اۆتورلاردىڭ وزدەرىن تانىتۋى جانە مەملەكەتتىڭ قولداۋىنا يە بولۋ ءۇشىن داستۇرگە اينالدىرعىمىز كەلەدى», دەدى مادەنيەت جانە سپورت ءمينيسترى داۋرەن اباەۆ ماراپاتتاۋ راسىمىندە.
جوبا جەڭىمپازدارىن قازاقستاننىڭ بەلگىلى مادەنيەت جانە ونەر قايراتكەرلەرىنەن قۇرىلعان قازىلار القاسى جابىق تۇردە انىقتادى. بايقاۋدىڭ ەرەكشەلىگى – قاتىسقان اۆتورلاردىڭ دا, ولاردىڭ جۇمىسىن ساراپتاعان قازىلار القاسىنىڭ قۇرامى دا سوڭعى ساتكە دەيىن قۇپيا بولدى.
سونىمەن, «ۇزدىك كلاسسيكالىق مۋزىكا» اتالىمىمەن جەكە اسپاپقا ارنالعان «يلليۋزيا» شىعارماسى ءۇشىن بەيبىت دالدەنباي, انسامبلدەرگە ارنالعان «(Re)incarnation [Yerlik]» شىعارماسى ءۇشىن سانجار بايتەرەكوۆ, حالىق اسپاپتارى, ۇرمەلى, سيمفونيالىق جانە ەسترادالىق-سيمفونيالىق وركەسترلەرگە ارنالعان «سكريپكا جانە سيمفونيالىق وركەسترگە ارنالعان كونتسەرت» شىعارماسى ءۇشىن شىرىن بازارقۇلوۆا ماراپاتتالدى.
ال «ۇزدىك مۋزىكالىق-تەاترلىق جانر تۋىندىسى» اتالىمى بويىنشا «ساكەن» وپەراسى ءۇشىن كومپوزيتور ءالىبي ءابدىنۇروۆ, ليبرەتتو اۆتورى قانات ءجۇنىسوۆ, «الدار كوسە» بالەتى ءۇشىن كومپوزيتور المابەك مەيىربەكوۆتىڭ مۇراگەرى ەردەن وردابەك ۇلى, ليبرەتتو اۆتورى دامير ورازىمبەتوۆ, «الپامىس» بالەتى ءۇشىن كومپوزيتور ارمان جايىم, ليبرەتتو اۆتورى ايتقالي جايىموۆ ۇزدىك دەپ تانىلدى.
ەسترادا جانرىنداعى «رەسپۋبليكا ءانى» اتالىمىندا «ەلىم دەپ سوققان جۇرەگىم» ءانى ءۇشىن يسا اۋعانتاي جەڭىمپاز اتاندى. ءماتىنىن جازعان – سايات راقىمجان. «ۇزدىك فولكلورلىق مۋزىكا» اتالىمى اۆتورلىق ۆوكالدىق-اسپاپتىق تۋىندى ء«بىزدىڭ اۋىل تاماشا» ءانى ءۇشىن ورال بايسەڭگىرگە, اۆتورلىق ۆوكالدىق نەمەسە ۆوكالدىق-اسپاپتىق تۋىندى «Love story» باللاداسى ءۇشىن ءساتجان شامەنوۆكە, اۆتورلىق اسپاپتىق شىعارما (كۇي) «بەس پەرىشتە» كۇيى ءۇشىن اسىلبەك كەنىگەسوۆكە بۇيىردى.
«ۇزدىك دراماتۋرگيالىق تۋىندى» اتالىمىن درامالىق تەاترلارعا ارنالعان تاريحي نەمەسە زاماناۋي تاقىرىپتاعى پەسا «زور بىلگامەش ءھام قورقىت اتا» شىعارماسى ءۇشىن اسىلبەك يحسانوۆ, بالالار مەن جاسوسپىرىمدەر اۋديتورياسىنا ارنالعان پەسا «قاشقىن» شىعارماسى ءۇشىن قۋانىش جيەنباي الدى.
سونىمەن قاتار مادەنيەت جانە سپورت مينيسترلىگىنىڭ ەكى ارنايى جۇلدەسىن «تۇركىستان» انىمەن جاڭاباي وتەگەنوۆ, «مەيىرىم كەرەك» انىمەن عالىمبەك يسىمبەرگەنوۆ يەلەندى.
