مۇحتار تىلەۋبەردى لوندونعا جۇمىس ساپارىمەن باردى

ساپاردىڭ ءبىرىنشى كۇنى م. تىلەۋبەردى مەن ۇلىبريتانيا جانە سولتۇستىك يرلانديا بىرىككەن كورولدىگىنىڭ سىرتقى ىستەر، دوستاستىق جانە دامۋ ءمينيسترى دجەيمس كلەۆەرلي قازاقستان-بريتانيا ستراتەگيالىق ديالوگىنىڭ 6-شى وتىرىسىن اشتى. وتىرىسقا قازاقستان مەن ۇلىبريتانيانىڭ بەيىندى مينيسترلىكتەرى مەن ۆەدومستۆولارىنىڭ وكىلدەرى دە قاتىستى.

قازاقستان-بريتانيا ستراتەگيالىق ديالوگ 2013 جىلى قۇرىلدى جانە ەكىجاقتى جانە كوپجاقتى ىنتىماقتاستىقتىڭ وزەكتى ماسەلەلەرىن قاراۋ، سونداي-اق ارىپتەستىكتىڭ جاڭا، پەرسپەكتيۆالى باعىتتارىن ايقىنداۋ ءۇشىن ماڭىزدى ينستيتۋتسيونالدىق پلاتفورما.

جەكە كەزدەسۋ بارىسىندا سىرتقى ساياسي ۆەدومستۆولاردىڭ باسشىلارى ەكىجاقتى قاتىناستاردىڭ بارلىق كەشەنىن تالقىلاپ، ءوزارا قىزىعۋشىلىق تۋدىراتىن وڭىرلىك جانە حالىقارالىق ماسەلەلەر بويىنشا پىكىر الماستى.

م. تىلەۋبەردى استانا جانە لوندون اراسىنداعى ءوزارا سەنىمنىڭ جوعارى دەڭگەيىن اتاپ ءوتتى. بۇل ءارتۇرلى سالالارداعى كوپجوسپارلى ارىپتەستىكتى ۇدەمەلى تەرەڭدەتۋگە ىقپال ەتەدى.

«مەنىڭ ساپارىم قازاقستان مەن ۇلىبريتانيا اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىنا وراي ءوتىپ جاتقانى سيمۆوليكالىق ماعىناعا يە. وسى كەزەڭدە ءبىزدىڭ ستراتەگيالىق ارىپتەستىگىمىزگە ساپالى سەرپىن بەرۋ ماڭىزدى»، دەدى قر ءسىم باسشىسى.

بريتاندىق تاراپ ۇكىمەتتىك دەڭگەيدە تۇراقتى ديالوگتى ساقتاۋ، سونداي-اق ەكى ەلدىڭ بيزنەس قاۋىمداستىقتارى اراسىنداعى بايلانىستاردى جانداندىرۋ قاجەتتىگىن اتاپ ءوتتى.

«قازاقستان - ەلىمىزدىڭ ورتالىق ازيا وڭىرىندەگى اسا ماڭىزدى جانە سەنىمدى سەرىكتەسى. ءبىز بريتاندىق-قازاقستاندىق ءوزارا ءىس-قيمىلدى ءارتاراپتاندىرۋ ءۇشىن قولدا بار بارلىق مۇمكىندىكتەردى پايدالانۋعا دايىنبىز»، دەدى دج.كلەۆەرلي.

بۇعان جاقىن ارادا قازاقستان مەن ۇلىبريتانيا اراسىنداعى ستراتەگيالىق ارىپتەستىك پەن ىنتىماقتاستىق تۋرالى جاڭارتىلعان كەلىسىمگە قول قويۋ ىقپال ەتۋى ءتيىس. تاراپتار وسى جىلدىڭ 10 ايىندا وتكەن جىلدىڭ سايكەس كەزەڭىمەن سالىستىرعاندا 65،7%-عا جوعارىلاعان ەكىجاقتى تاۋار اينالىمىنىڭ ءوسۋىن قاناعاتتانۋشىلىقپەن اتاپ ءوتتى.

سونداي-اق قر ءسىم باسشىسى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ ادىلەتتى قازاقستاندى قۇرۋعا باعىتتالعان ەلىمىزدە جۇرگىزىلىپ جاتقان ساياسي جانە الەۋمەتتىك-ەكونوميكالىق رەفورمالارى تۋرالى حاباردار ەتتى. م. تىلەۋبەردى ءوزىنىڭ بريتاندىق ارىپتەسىن استاناعا ساپارمەن كەلۋگە شاقىردى. فورين ءوفيستىڭ باسشىسى شاقىرۋدى قۋانا قابىل الدى.

كەزدەسۋ قورىتىندىسى بويىنشا قازاقستان مەن ۇلىبريتانيانىڭ سىرتقى ساياسي ۆەدومستۆولارى باسشىلارىنىڭ بىرلەسكەن مالىمدەمەسى قابىلداندى. وندا ساياسي، ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالاردا، سونداي-اق ەنەرگەتيكالىق قاۋىپسىزدىك جانە كليماتتىڭ وزگەرۋىنە قارسى كۇرەس سالاسىندا ەكىجاقتى ستراتەگيالىق ارىپتەستىكتى دامىتۋعا ءوزارا ۇمتىلىس كورىنىس تاپتى.

لوندونعا ساپارىنىڭ ءبىرىنشى كۇنى قر ءسىم باسشىسى ۇلىبريتانيا پرەمەر-ءمينيسترىنىڭ ساۋدا وكىلى بارونەسسا ەمما نيكولسونمەن، بريتاندىق-قازاقستاندىق قوعامداستىقتىڭ توراعاسى رۋپەرت گۋدمانمەن جانە بريتاندىق رەسمي توپتاردىڭ وكىلدەرىمەن كەزدەستى.

سول كۇنى مينيستر م. تىلەۋبەردى مەن قازاقستاندىق دەلەگاتسيا مۇشەلەرىنىڭ «Shell»، «RioTinto» جانە «ERG International Group» ءىرى بريتاندىق جانە حالىقارالىق كومپانيالارىنىڭ باسشىلارىمەن كەزدەسۋلەرى ءوتتى. مينەرالدى رەسۋرستاردى بارلاۋ جانە ءوندىرۋ، قازاقستاندىق مۇناي ەكسپورتىن ءارتاراپتاندىرۋ پەرسپەكتيۆالارى، جاسىل ەنەرگەتيكانى دامىتۋ جانە قازاقستاندا تۇششىلاندىرۋ جانە سۋ تازارتۋ قۇرىلىستارىن سالۋ ماسەلەلەرى تالقىلاندى.

ۇلىبريتانيا قازاقستاننىڭ ءىرى شەتەلدىك ينۆەستورلاردىڭ جەتەۋىنە جانە جەتەكشى ساۋدا سەرىكتەستەرىنىڭ وندىعىنا كىرەدى. بۇگىنگى تاڭدا قازاقستاندا بريتاندىق كاپيتالى بار 600-دەن استام كومپانيا تىركەلگەن، ۇلىبريتانيادان قازاقستان ەكونوميكاسىنا تارتىلعان ينۆەستيتسيالار كولەمى 30 جىل ىشىندە 20 ملرد اقش دوللاردان استى.