بيىلعى بايقاۋعا ەلىمىزدىڭ ءار ايماعىنان 14 پەن 29 جاس ارالىعىنداعى, 3 مىڭعا جۋىق جاس ءوز جوبالارىن ۇسىنعان. ولاردىڭ ىشىندەگى ۇزدىكتەرىن ارنايى قۇرىلعان كوميسسيا ىرىكتەدى. «تاۋەلسىزدىك ۇرپاقتارى» گرانتى پرەزيدەنتى قاسىم-جومارت توقاەۆتىڭ تاپسىرماسىنا سايكەس جىل سايىن بەرىلەدى.
جيىندا جوبا اۆتورلارىن اقپارات جانە قوعامدىق دامۋ ءمينيسترى دارحان قىدىرالى قۇتتىقتاپ, ىزگى لەبىزىن ءبىلدىردى. جاستاردىڭ باستامالارىنا مەملەكەتتىك قولداۋ كورسەتۋدى كوزدەيتىن كونكۋرستىڭ وزەكتىلىگىنە توقتالدى.
«وزدەرىڭىزگە ءمالىم, وتكەن جىلى تاۋەلسىزدىگىمىزدىڭ مەرەيلى 30 جىلدىعىنا وراي, قازاقستان پرەزيدەنتى ەلىمىزدىڭ 30 جاس ازاماتىنا «تاۋەلسىزدىك ۇرپاقتارى» گرانتىن تابىس ەتكەن ەدى. اتالعان گرانت بيىل دا ءوز جالعاسىن تاۋىپ وتىر. وتىز جىلدىق تاريحى بار تاۋەلسىز قازاقستاننىڭ مەملەكەتتىك ساياساتىنىڭ نەگىزگى ماقساتتارىنىڭ ءبىرى – جاستاردى قولداۋ جانە ادامي كاپيتالدى دامىتۋ. تاۋەلسىزدىك الىپ, ەگەمەندى ەل بولعالى, وسكەلەڭ ۇرپاق تاربيەسى مەملەكەت ءۇشىن باسىم باعىتتاردىڭ بىرىنە اينالدى», دەدى د.قىدىرالى.
سالا باسشىسى قازىرگى تاڭدا مەملەكەت تاراپىنان جاستاردى قولداۋ ماقساتىندا بىرقاتار سىياقى مەن گرانت بەرىلىپ جاتقانىن جەتكىزدى. «تاۋەلسىزدىك ۇرپاقتارى» گرانتىنىڭ ماقساتى بەلسەندى, شىعارماشىل جاستار قاۋىمداستىعىن قالىپتاستىرۋ باعىتىندا جاستاردىڭ جاڭا جانە قولدانىستاعى باستامالارىن قولداۋ ەكەنىن اتاپ ءوتتى.
«گرانتتار جاستارعا جاڭا يدەيالار مەن باستامالاردى ىسكە اسىرۋ ءۇشىن كونكۋرستىق نەگىزدە بەرىلەدى. بيىلعى «تاۋەلسىزدىك ۇرپاقتارى» گرانتىنىڭ يەگەرلەرىن انىقتاۋ بويىنشا قۇرىلعان كوميسسيا مۇشەلەرى اۋقىمدى جۇمىستار جۇرگىزدى. ونىڭ قۇرامىنا پارلامەنت دەپۋتاتتارى مەن قوعام قايراتكەرلەرى, بەلگىلى مادەنيەت جانە ونەر قايراتكەرلەرى, عالىمدار, جازۋشىلار, جۋرناليستەر كىردى. بارشا كوميسسيا مۇشەلەرىنە العىس ايتامىن!
وسى ورايدا, وزدەرىڭىزگە تاعى ءبىر جاعىمدى جاڭالىق ايتا كەتكىم كەلەدى. وتكەن اپتادا قازاقستان رەسپۋبليكاسى پارلامەنتى سەناتىندا «مەملەكەتتىك جاستار ساياساتى تۋرالى» زاڭ جوباسى ماقۇلداندى, زاڭ ودان ءارى مەملەكەت باسشىسىنا قول قويۋعا ەنگىزىلەدى. زاڭ جوباسىندا كوتەرىلگەن باستى ماسەلەنىڭ ءبىرى – جاستاردىڭ جاسىن 35 جاسقا كوتەرۋ بويىنشا ۇسىنىسىمىز قولداۋ تاپتى. ياعني بۇگىنگە دەيىن «تاۋەلسىزدىك ۇرپاقتارى» گرانتىنا جاس شەكتەۋىنە بايلانىستى قاتىسا الماعان تالانتتى جاستارىمىزعا مۇمكىندىك بەرىلدى», دەدى د.قىدىرالى.
