باعدارلاما قىزىل كىلەم راسىمىمەن باستالدى. سالتاناتتى تۇردە بەزەندىرىلگەن تەاتردىڭ باس زالىندا ءىس-شارانى فەستيۆال پرەزيدەنتى ارداق امىرقۇلوۆ پەن باعدارلاما ديرەكتورى گۇلنارا ابىكەەۆا اشتى. قازاقستان رەسپۋبليكاسىنىڭ مادەنيەت جانە سپورت ءمينيسترى داۋرەن اباەۆتىڭ كىرىسپە ءسوزى وقىلدى جانە ول قاتىسۋشىلارعا شىعارماشىلىق جەتىستىكتەر مەن جەمىستى كۇن, جاقسى كوڭىل كۇي تىلەدى.
«ەۋرازيا» بايقاۋ باعدارلامالارىنا قاتىساتىن بارلىق فيلمدەردى قامتيتىن ترەيلەر دە كورسەتىلدى. وعان قوسا, كورەرمەندەر قازىلار القاسىنىڭ مۇشەلەرىمەن تانىستى. ءبىر قىزىعى, ساحناعا شىققان شەتەلدىك قوناقتار الدىمەن قازاق تىلىندە كەم دەگەندە ءبىر-ەكى ءسوز ايتۋعا تىرىستى.
سالتاناتتى شارانىڭ باستى توسىنسىيى فەستيۆالدىڭ ارنايى جۇلدەلەرىن تابىستاۋ بولدى. «ورتالىق ازيا كينەماتوگرافىنىڭ دامۋىنا قوسقان ۇلەسى ءۇشىن» جۇلدەسىن اتاقتى وزبەك رەجيسسەرى ءالي حامراەۆ الدى, ول وسى فەستيۆالدە حالىقارالىق بايقاۋدىڭ قازىلار القاسىن باسقارادى.
«بۇگىن قازاقستان جەرىنە مەرەكە كەلدى – الەمدىك كينو وكىلدەرى سىزدەردىڭ شاڭىراقتا قوناقتا. مەنىڭ ويىمشا, قيىن كەزەڭدە باسقا حالىقتاردى جىلى قابىلداي الاتىن ادامدار كەرەمەت! «ەۋرازيا» فەستيۆالى ءومىر سۇرەدى – بۇل ەڭ باستىسى! ءبىز ونى ساعىندىق. فەستيۆالگە جانە قازاقستانعا ساتتىلىك!», دەدى 85 جاستاعى وزبەك كينوسى شەبەرى.
تاعى ءبىر ارنايى سىيلىق – «قازاق كينەماتوگرافىنا قوسقان ۇلەسى ءۇشىن» – مادەنيەتتانۋشى جانە قوعام قايراتكەرى مۇرات اۋەزوۆكە تابىستالدى.
باعدارلامانىڭ اشىلۋى قازاقستاندىق كينورەجيسسەر ءسابيت قۇرمانبەكوۆتىڭ «بوران» كارتيناسىنىڭ كورسەتىلىمىمەن اياقتالدى.
بىراق اشىلۋ سالتاناتىنا دەيىن فەستيۆال ورتالىعىندا العاشقى ءباسپاسوز كونفەرەنتسيالارى ءوتتى.
الدىمەن ءىس-شارا ۇيىمداستىرۋشىلارى ءسوز سويلەدى. گۇلنار ابىكەەۆانىڭ ايتۋىنشا, بيىلعى فەستيۆالدە جۇلدىزدى قازىلار القاسى جيناقتالعان.
«ەگەر ءبىر كەزدەرى بىزدە «ديناميكالىق دامىپ كەلە جاتقان قازاق كينوسى», سودان كەيىن «ديناميكالىق قازاق كينوسى» باعدارلامالارى بولسا, قازىر ءبىزدىڭ كينەماتوگرافتار حالىقارالىق بايقاۋمەن تەڭ جەكە ۇلتتىق كونكۋرس وتكىزۋگە مۇمكىندىك بەرەتىن دەڭگەيگە جەتتى. XVI «ەۋرازيا» كينوفەستيۆالىنىڭ باستى ەرەكشەلىگى مەن جاڭالىعى وسى», دەدى ول.
ايتا كەتەيىك, بايقاۋعا قاتىساتىن ءتورت كارتينا ءوز ەلدەرىنەن «وسكار» سىيلىعىنا ۇسىنىلعان. سونىمەن قاتار فەستيۆالدە بىردەن ءتورت الەمدىك پرەمەرا وتەدى.
تاعى ءۇش ءباسپاسوز كونفەرەنتسياسىندا ۇلتتىق, حالىقارالىق بايقاۋلاردىڭ جانە NETPAC (ازيا كينوسىن ىلگەرىلەتۋ جونىندەگى حالىقارالىق جەلى) قازىلار القاسىنىڭ «تۇساۋكەسەرى» ء وتتى.
نەگىزگى ءىس-شارامەن قاتار كينوپارك 10 Forum كينوتەاترىندا فيلم كورسەتىلىمدەرى باستالدى. حالىقارالىق بايقاۋدان «يل بوەمو» (چەحيا – يتاليا – سلوۆاكيا; رەجيسسەر پەتر ۆاتسلاۆ) جانە «ايەل» (قىتاي; رەجيسسەر ۆان چاو) فيلمدەرى كورسەتىلدى. ۇلتتىق بايقاۋدان – «تاۋ پيازى» (رەجيسسەر ەلدار شيبانوۆ), «زەرە» (رەجيسسەر داۋرەن قامشىباەۆ) جانە «وت» (رەجيسسەر ايجان قاسىمبەك) فيلمدەرى كورسەتىلدى. ال كونكۋرستان تىس «ەرەكشە وقيعا» باعدارلاماسى بولگار رەجيسسەرى, ۇلتتىق بايقاۋدىڭ قازىلار القاسىنىڭ مۇشەسى ميلكو لازاروۆتىڭ «اگا» كارتيناسىمەن اشىلدى. ول بۇكىل الەم بويىنشا كينوفەستيۆالدەردە كوپتەگەن ماراپاتتارعا يە بولدى, ال XIV «ەۋرازيا» كينوفەستيۆالىندە ۇزدىك رەجيسسۋرالىق جۇمىسى ءۇشىن ماراپاتتالدى.
