اۋىل تۇرعىندارى ەمدەلۋ ءۇشىن قالاعا بارۋعا ءماجبۇر - سەناتور

سەناتوردىڭ پىكىرىنشە، اۋىلدىق مەديتسينالىق مەكەمەلەردىڭ بارلىق پروبلەمالارى ەلدەگى ەمحانالار مەن اۋرۋحانالاردىڭ دۇرىس قارجىلاندىرىلماۋىنىڭ سالدارىنان بولىپ وتىر.

«جىل سايىنعى بيۋدجەتتى بەكىتۋ كەزىندە ۇكىمەت 2021 جىلعى ناقتى تاپشىلىقپەن ناقتى شىعىندار بويىنشا ەسەپتەۋلەر جۇرگىزگەن، ايقىن تاپشىلىقتار بايقالادى. وكىنىشكە قاراي، دەنساۋلىق ساقتاۋ مينيسترلىگى دە، امسق دا وسى ۋاقىتقا دەيىن بۇل قاراجاتتىڭ ۇلعايۋىنا قول جەتكىزگەن جوق. سونىڭ سالدارىنان وسى جىلدىڭ 9 ايىنىڭ قورىتىندىسى بويىنشا دەنساۋلىق ساقتاۋ ۇيىمىن قارجىلاندىرۋدا كۇردەلى جاعداي قالىپتاستى. باستاپقىدا مىندەتتى مەديتسينالىق ساقتاندىرۋ جۇيەسىندە ستاتسيونارلىق جانە ستاتسيوناردى الماستىراتىن كومەك كورسەتۋگە بولىنگەن قاراجات كولەمى 2022 جىلى مەديتسينالىق ۇيىمدار مالىمدەگەننىڭ 70-77%-ىن قۇرادى. قازىرگى جاعدايدا دەنساۋلىق ساقتاۋ ۇيىمدارى ەڭبەكاقى تولەۋ بويىنشا، سالىقتى ۋاقىتىلى تولەۋدە، ءدارى-دارمەك پەن ازىق-ت ۇلىك ساتىپ الۋدا، كوممۋنالدىق قىزمەتتەردى تولەۋدە قيىندىقتارعا تاپ بولۋدا»، دەپ اتاپ ءوتتى امانگەلدى تولاميسوۆ.

سەناتور دەنساۋلىق ساقتاۋ سالاسىنداعى اۋىلدىق ەمحانالاردىڭ تەحنيكالىق جاراقتاندىرىلۋىن دا وزەكتى ماسەلە ەكەنىن اتاپ ءوتتى. اۋداندىق مەديتسينا ۇيىمدارىنىڭ تەڭگەرىمىندەگى اۆتوكولىكتەردىڭ 80%-ى تەحنيكالىق جاعىنان ەسكىرگەن.

«اۋىلدىق جەردەگى كورسەتىلەتىن مەديتسينالىق قىزمەتتىڭ قولجەتىمسىزدىگى مەن مامانداردىڭ تاپشىلىعىنان اۋىل حالقى جاپپاي اعايىن-تۋىس جاعالاپ، قالاعا كەلىپ ەمدەلۋگە ءماجبۇر بولىپ ءجۇر. وسى ورايدا، امبۋلاتوريالاردىڭ، اكۋشەرلىك پۋنكتتەر بويىنشا، جەدەل جاردەم كولىكتەرى بويىنشا، جالپى، العاشقى مەديتسينالىق كومەك كورسەتۋ جۇيەسىن جاقسارتۋ بويىنشا ۇكىمەت جەدەل شارالار قابىلداۋ كەرەك دەپ ەسەپتەيمىن»، دەپ اتاپ ءوتتى ول.