كۇنى كەشە الماتى وبلىسى اكىمدىگىنىڭ باستاماسىن قۇپ العان ايماق مەتسەناتتارى جىلۋسىز وتىرعان قالانىڭ تۇرعىندارىنا قاجەتتى گۋمانيتارلىق كومەك جيناپ, جونەلتتى. ايماقتاعى بەلسەندىلەر بۇل ىسكە شىنايى ۇلەس قوسۋدا. ماسەلەن قايىرىمى مول ءىستىڭ باسى-قاسىندا جۇرگەن كاسىپكەر جانە مەتسەنات زيا تالعاتوۆتىڭ كومپانياسى قيىن جاعدايدا قالعان ەكىباستۇزدىقتارعا الدىمەن قولۇشىن سوزدى.
– بىرەر كۇن بۇرىن 500 دانا ەلەكترلى جىلىتۋ قۇرالى تيەلگەن جۇك كولىگى ەكىباستۇز قالاسىنا قاراي جولعا شىققان بولاتىن. بۇل جولى لوگيستيكا جانە كوممۋنيكاتسيا ماسەلەسىندە الماتى وبلىسىنىڭ اكىمدىگى قولداۋ كورسەتتى. قازىر جىلىتۋ قۇرالدارى ەكىباستۇز قالاسى تۇرعىندارىنىڭ وتىنىمىنە سايكەس تاراتىلدى. جالپى, ءبىزدىڭ كومپانيا قايىرىمدىلىق جۇمىستارىمەن بەلسەندى تۇردە اينالىسادى. جىل سايىن بيۋدجەتكە حالىقتى الەۋمەتتىك قولداۋ ءۇشىن, ونىڭ ىشىندە مەكتەپتەر, ۇيلەر, مەشىتتەر سالۋعا جانە ەلدىڭ شالعاي وڭىرلەرىندەگى بالالارعا سىيلىقتار تاراتۋ ماقساتىندا شامامەن 30 ملن تەڭگە بولىنەدى. ەڭ قيىن كەزدە ادامداردىڭ ءبىر-ءبىرىن قولداپ, ءبىر مۇددە اياسىندا بىرىگە الۋى تۇتاس ەلدىڭ بىرلىگىن ارتتىرىپ, ەلدىڭ ىشكى رۋحىنىڭ مىقتى بولۋىنا سەپتىگىن تيگىزەدى, – دەيدى مەتسەنات زيا تالعاتوۆ.
الماتى وبلىسى
