ۇكىمەت • 29 قاراشا، 2022

بارلىق اكىم بۇدان قورىتىندى شىعارۋى ءتيىس: پرەمەر-مينيستر ەكىباستۇزداعى جاعداي تۋرالى

67 رەت كورسەتىلدى

بۇل تۋرالى ءاليحان سمايىلوۆ ۇكىمەت وتىرىسىندا ايتتى، دەپ حابارلايدى Egemen.kz.

«ەكىباستۇز قالاسىندا جىلۋ بەرۋدى قالپىنا كەلتىرۋ جۇمىستارىن جالعاستىرۋ كەرەك. اپاتقا سەبەپ بولعان بارلىق ماسەلەنى تەز ارادا شەشۋ قاجەت»، دەدى ۇكىمەت باسشىسى.

سونداي-اق ەنەرگەتيكا مينيسترلىگى مەن يندۋستريا مينيسترلىگى بىرلەسە وتىرىپ، «ەكىباستۇزجىلۋەنەرگو» مەكەمەسىندەگى تەحنولوگيالىق ەرەجەلەردى بۇزۋعا قاتىستى تەكسەرۋ جۇرگىزۋدى تاپسىردى.

«قىس باستالماي جاتىپ، وسىنداي توتەنشە جاعداي ورىن الىپ وتىر. بارلىق اكىم بۇدان قورىتىندى شىعارۋى ءتيىس. ەنەرگەتيكا جانە يندۋستريا مينيسترلىكتەرى اكىمدىكتەرمەن بىرلەسىپ، وڭىرلەردەگى ەنەرگەتيكالىق وبەكتىلەرگە تولىقتاي تەحنيكالىق اۋديت جۇرگىزىپ، ۇكىمەتكە ءتيىستى اقپاراتتى ەنگىزسىن. جۇرگىزىلگەن جوندەۋ جۇمىستارىنىڭ ساپاسىن تەكسەرۋ قاجەت»، دەدى ءا.سمايىلوۆ.

پرەمەر-ءمينيستردىڭ ايتۋىنشا «اپات قاۋپى» جوعارى وبەكتىلەر بويىنشا جابدىقتار مەن ينفراقۇرىلىمدارعا ەرەكشە نازار اۋدارۋ قاجەت.

«بارلىق جىلۋ جانە ەنەرگيا جۇيەلەرىنىڭ قاۋىپسىز ءارى ۇزدىكسىز جۇمىسىن قامتاماسىز ەتۋ ءۇشىن وسى وبەكتىلەردىڭ مەنشىك يەلەرىمەن جۇمىس جۇرگىزۋ كەرەك. ۇلتتىق ەكونوميكا، ەنەرگەتيكا جانە يندۋستريا مينيسترلىكتەرى اكىمدىكتەرمەن بىرلەسىپ، ء«تاريفتى ينۆەستيتسياعا ايىرباستاۋ» باعدارلاماسى اياسىندا كوممۋنالدىق كاسىپورىنداردان كەلىپ تۇسەتىن ءاربىر ءوتىنىمدى مۇقيات زەرتتەۋى ءتيىس. تۇرعىن ءۇي-كوممۋنالدىق شارۋاشىلىعىنىڭ ينفراقۇرىلىمىن جاڭعىرتۋعا جانە جوندەۋگە بولىنەتىن قاراجاتتىڭ ناقتى، ماقساتتى جۇمسالۋىن قاتاڭ باقىلاۋعا الۋ كەرەك. اكىمدەر جىلۋ بەرۋ ماۋسىمىن تۇراقتى جەكە باقىلاۋدا ۇستاسىن»، دەپ تولىقتىردى ۇكىمەت باسشىسى.

سوڭعى جاڭالىقتار

ۇقساس جاڭالىقتار