وسى ءسوزدىڭ ارتىندا بابالاردىڭ اماناتى, حالىقتىڭ ەرتەڭگى كۇنگە دەگەن ۇكىلەگەن ءۇمىتى, جالىندى جاستاردىڭ بولاشاعى, انالاردىڭ تىلەگى, اكەلەردىڭ باتاسىنىڭ جەمىسى جاتىر. «امانات» ءسوزىنىڭ سالماعى دا اۋىر. اتا-بابامىز مال-مۇلكىن, ءومىرىن امانات دەپ ءبىلىپ: «امانات – ادامگەرشىلىكتىڭ ولشەمى» دەگەن ەكەن. ەندەشە, پرەزيدەنتىمىز وسىنداي ۇلكەن اماناتتى موينىنا تۇمار ەتىپ تاقتى دەسەك بولادى.
مەملەكەت باسشىسىنىڭ «ادىلەتتى مەملەكەت, ادىلەتتى ەكونوميكا, ادىلەتتى قوعام قۇرامىز» دەگەن سوزدەرى جاۋاپتى, ءادىل باستامالاردى كوزدەيدى. ەل مۇددەسىنىڭ بارىنەن بيىك ەكەنىن اتاپ كورسەتكەن ق.توقاەۆ قولىنان ءىس كەلەتىن, ەلگە ادال قىزمەت ەتەتىن جاندارعا عانا ورتامىزدا ورىن بار ەكەندىگىن قاداپ ايتتى. ونداي ازاماتتارعا قوعام قاشاندا قۇرمەتپەن قاراپ, ۇنەمى قولداپ وتىراتىنىن دا اشىق مالىمدەدى. قازىرگى قوعام ءاربىر ماماندىق يەسىنەن شەبەرلىكتى, كاسىبي بىلىكتىلىكتى تالاپ ەتەدى.
پرەزيدەنت باسىمدىق بەرگەن باستى قۇندىلىقتار – كاسىبيلىك, ادالدىق, قاراپايىمدىلىق. ءادىل ءارى شىنايى زاڭ ۇستەمدىك قۇرماي قوعامدى جايلاعان سىبايلاس جەمقورلىقتى دا جويۋدىڭ ءمانى جوق ەكەنىن كورسەتتى. ەلىمىز دامۋى ءۇشىن ءار ادام ءوزىن دامىتۋدى قولعا الىپ, ءوزىن-ءوزى قامشىلاۋى كەرەكتىگىن ايتتى.
پرەزيدەنت ءسوزى ءبىلىم سالاسىندا ەڭبەك ەتىپ جۇرگەن مەنىڭ دە جىگەرىمدى قايرادى. نامىس پەن ادىلدىكتى تۋ ەتىپ, ۇرپاق مۇددەسىنە بەرىلىپ جۇمىس ىستەۋگە كۇش بەردى. مەكتەپ ۇستازدارى كەلەشەك ۇرپاق ءبىلىمدى, سانالى, تاربيەلى بولۋى ءۇشىن ارتىلعان جاۋاپكەرشىلىك جۇگىنە قيانات جاساماي ادال جۇمىس ىستەپ كەلەدى. مۇعالىم – قۇرمەت كورسەتۋگە لايىقتى ماماندىقتىڭ ءبىرى. ويتكەنى ەرەن ەڭبەگى مەملەكەتىمىزدىڭ تۇتقاسى بولار ۇرپاقتىڭ ۇمتىلىسىمەن ەلەنەدى. پرەزيدەنت سەنىم ارتقان جاستاردىڭ ءبىلىمدى, بىلىكتى بولۋى مەكتەپكە دە بايلانىستى. ءبىلىمدى شاكىرت بىلىكتى مامان بولسا, بىلىكتى مامان ەلگە ادال قىزمەت ەتەرى ءسوزسىز.
قازىرگى كوپشىلىك اماناتتىڭ قادىرىن دۇرىس تۇسىنبەي, باعالاماي ءجۇر. ال اتا-اجەلەرىمىز اماناتتىڭ الدىندا ارىن دا, نامىسىن دا, ۇياتىن دا, سالتىن دا ساتپاعان. اماناتقا قىلداي قيانات جاساماعان. ەندەشە, ارقايسىمىزعا بابالاردىڭ اماناتتاپ قالدىرعان ۇلان-بايتاق جەرىن ساقتاپ, ۇرپاقتان-ۇرپاققا مۇرا ەتۋ جاۋاپكەرشىلىگى جۇكتەلسە, سول اماناتتى كوزىنىڭ قاراشىعىنداي ساقتايتىن ۇرپاق تاربيەلەۋ – قوعامنىڭ, وتباسىنىڭ, ۇستازدىڭ ەنشىسىندە. قوعاممەن دە, وتباسىمەن دە ىنتىماقتى بايلانىس جاساپ, ەلىمىزدىڭ وركەندەۋىنە ەرەكشە ۇلەس قوسقان ءبىلىم سالاسىنىڭ قىزمەتكەرى دە پرەزيدەنت ارقالاعان اماناتتى بىرگە كوتەرەدى, ءسوزىن قۇپتايدى دەپ سەنەمىن.
رىسجان شامۇراتوۆا,
استانا قالاسىنداعى №2 «دارىن» ليتسەي-مەكتەپ-ينتەرناتىنىڭ ديرەكتورى
