بايقاۋ قورىتىندىسى بويىنشا جاس ەرەكشەلىگىنە سايكەس ءۇش توپ اراسىندا I, II جانە III ورىن يەگەرلەرى انىقتالدى. ۇزدىك مۋزىكانتتارعا اقشالاي سەرتيفيكاتتار تابىستالدى.
ماسەلەن, الماتى قالاسىنان كەلگەن 15 جاستاعى جۇلدىز ەرجەڭىس Astana Piano Passion گران-پري يەگەرى اتانىپ, 3 000 000 تەڭگە ۇتىپ الدى. سونداي-اق وعان «استانا وپەرا» تەاترىنىڭ كامەرالىق زالىندا جەكە كونتسەرت ۇيىمداستىرۋعا نەمەسە الەمگە ايگىلى ماەسترو الان بورىباەۆتىڭ جەتەكشىلىگىمەن سيمفونيالىق كونتسەرتكە قاتىسۋعا مۇمكىندىك بەرىلدى.
«مادەنيەت سالاسىنداعى ماڭىزدى باعىتتارىنىڭ ءبىرى – ەلىمىزدەگى جاس تالانتتاردى قولداۋ, ولاردىڭ شىعارماشىلىعىنا جول اشۋ. بۇگىن جەڭىمپاز اتانعان ۇل-قىزدارىمىز بولاشاقتا الەم ساحنالارىن باعىندىرا الاتىنىنا سەنىمدىمىن. الداعى ۋاقىتتا ءىس-شارا اۋقىمىن بۇدان دا كەڭەيتۋىمىز كەرەك. سەبەبى, مۋزىكادا شەكارا بولمايدى, كەز كەلگەن اۋەننىڭ ءتىلى بارشا حالىققا ورتاق. بۇگىن ماراپاتقا يە بولعان جەڭىمپازداردى شىن جۇرەكتەن قۇتتىقتايمىن», دەدى مادەنيەت جانە سپورت ءمينيسترى داۋرەن اباەۆ گالا-كونتسەرتتە.
ايتا كەتسەك, اۋقىمدى بايقاۋدىڭ ىرىكتەۋ كەزەڭىنە 112 بالا قاتىستى, ونىڭ 59-ى جارتىلاي فينالعا ءوتتى. قازىلار القاسى ەلىمىزدىڭ بارلىق وبلىس ورتالىقتارىنا بارىپ, ىرىكتەۋ تۋرلارىن جانە بالالارعا ارنالعان شەبەرلىك ساباقتارىن وتكىزگەن. قازىلار القاسى قۇرامىندا ەلىمىزدىڭ كورنەكتى مادەنيەت جانە ونەر قايراتكەرلەرى, سونداي-اق فورتەپيانو ونەرى سالاسىنداعى حالىقارالىق بايقاۋلاردىڭ لاۋرەاتتارى بولدى.
