ء«بىرىنشى, 2022 جىلعى 19 شىلدەدە تەگەراندا وتكەن استانا پروتسەسىنىڭ كەپىلگەر ەلدەرىنىڭ ۇشجاقتى ءسامميتى اياسىندا قول جەتكىزىلگەن ۋاعدالاستىقتاردى باسشىلىققا الا وتىرىپ, الەمدەگى جانە وڭىردەگى احۋالدى دامىتۋدى قاراستىرىپ, سيريا داعدارىسىن ورنىقتى رەتتەۋدى ىلگەرىلەتۋدە استانا پروتسەسىنىڭ جەتەكشى ءرولىن اتاپ ءوتتى.
ەكىنشى, سيريا اراب رەسپۋبليكاسىنىڭ ەگەمەندىگىنە, تاۋەلسىزدىگىنە, بىرلىگى مەن اۋماقتىق تۇتاستىعىنا, سونداي-اق بۇۇ جارعىسىنىڭ ماقساتتارى مەن قاعيداتتارىنا ءوزىنىڭ وزگەرىسسىز بەرىلگەندىگىن راستادى جانە بۇل قاعيداتتاردىڭ جالپىعا بىردەي ساقتالۋى مەن قۇرمەتتەلۋىنە جاتاتىنىن اتاپ ءوتتى», دەدى مالىمدەمەنى وقىعان ۆيتسە-مينيستر ءا.تۇرسىنوۆ.
مينيستر ورىنباسارىنىڭ ايتۋىنشا, تاراپتار تەرروريزمگە قارسى كۇرەستىڭ بارلىق نىساندارى مەن كورىنىستەرىندە ءوزارا ءىس-قيمىلدى جالعاستىرۋعا كەلىسكەن. سيريانىڭ ەگەمەندىگى مەن اۋماقتىق تۇتاستىعىنا نۇقسان كەلتىرۋگە باعىتتالعان ءارى كورشى ەلدەردىڭ ۇلتتىق قاۋىپسىزدىگىنە, ونىڭ ىشىندە ترانسشەكارالىق شابۋىلدار مەن ينفيلتراتسياعا قاۋىپ توندىرەتىن سەپاراتيستىك جوسپارلارعا قارسى تۇرۋعا بەل بۋاتىنىن اتاپ وتكەن.
سيريانىڭ تۇكپىر-تۇكپىرىندە ارەكەت ەتەتىن تەرروريستىك توپتار مەن ولاردىڭ فيليالدارىنىڭ كوبەيۋىن, بەيبىت تۇرعىندار قازا تاپقان ازاماتتىق ينفراقۇرىلىمعا جانە ىشكى كوشى-قون لاگەرلەرىنە جاسالعان شابۋىلداردىڭ ارتۋىن ايىپتادى. كەپىلگەر مەملەكەتتەر سيريانىڭ سولتۇستىگىنە قاتىستى قولدانىستاعى كەلىسىمدەردى تولىق ورىنداۋ قاجەت ەكەنىنە نازار اۋدارعان.
ء«تورتىنشى, يدليب دەەسكالاتسيا ايماعىنداعى جاعداي ەگجەي-تەگجەي قاراستىرىلدى. گۋمانيتارلىق احۋالدى قوسا العاندا, يدليب دەەسكالاتسيا ايماعىنداعى جانە ونىڭ اينالاسىنداعى جاعدايدى تۇراقتى قالىپقا كەلتىرۋدى قامتاماسىز ەتۋ ءۇشىن ودان ءارى كۇش سالۋعا كەلىستى. يدليب تۋرالى بۇكىل كەلىسىمدى تولىق ورىنداۋ ارقىلى «جەردە» تىنىشتىقتى ساقتاۋ قاجەتتىگىن اتاپ ءوتتى.
بەسىنشى, سيريا اراب رەسپۋبليكاسىنىڭ سولتۇستىك-شىعىسىنداعى جاعدايدى تالقىلادىق. بۇل ايماقتا قاۋىپسىزدىك پەن تۇراقتىلىققا قول جەتكىزۋ سيريانىڭ ەگەمەندىگى مەن اۋماقتىق تۇتاستىعىن ساقتاۋ نەگىزىندە عانا مۇمكىن بولاتىنىنا كەلىستىك. تەرروريزمگە قارسى كۇرەس سىلتاۋىمەن ءوزىن ءوزى باسقارۋدىڭ زاڭسىز باستامالارىن قوسا العاندا, «جەردە» جاڭا احۋال قۇرۋ ارەكەتتەرىنىڭ ءبارىن جوققا شىعاردى», دەلىنگەن مالىمدەمەدە.
سونداي-اق سيريانىڭ بىرلىگىنە نۇقسان كەلتىرۋگە جانە كورشىلەس ەلدەردىڭ ۇلتتىق قاۋىپسىزدىگىنە, ترانسشەكارالىق شابۋىل جاساۋدى كوزدەيتىن سەپاراتيستىك جوسپارلارعا قارسى تۇرۋعا كەلىسكەن. وسىعان بايلانىستى ەۆفرات وزەنى ماڭىنداعى بەيبىت حالىققا قارسى سەپاراتيستىك توپتاردىڭ سوعىس قيمىلدارىنىڭ كۇشەيۋىنە الاڭداۋشىلىق ءبىلدىرىپ وتىر. بەيبىت شەرۋلەردىڭ جولىن كەسۋگە, كۇشتەپ اسكەرگە شاقىرۋعا جانە ءبىلىم بەرۋ سالاسىنداعى كەمسىتۋشىلىككە قاتىستى ماسەلە دە تالقىلانعان.
كەپىلگەر مەملەكەتتەر سيرياعا تيەسىلى مۇناي تابىسىنىڭ زاڭسىز تاركىلەنۋىنە قارسىلىق بىلدىرگەن. تەرروريستىك ەلەمەنتتەرگە قولداۋ كورسەتەتىن ەلدەردىڭ ارەكەتتەرىن, سونىڭ ىشىندە سيريانىڭ سولتۇستىك-شىعىسىنداعى ءوزىن ءوزى باسقارۋدىڭ زاڭسىز باستامالارىن ايىپتايتىنىن جەتكىزگەن.
كەلىسسوزدەردىڭ كۇن تارتىبىندە بىرقاتار ماسەلە قارالدى. سيرياداعى جاعداي, ونىڭ ىشىندە گۋمانيتارلىق جانە الەۋمەتتىك-ەكونوميكالىق احۋال, ساياسي پروتسەستى كەشەندى ىلگەرىلەتۋ تالقىلانعان. بۇدان بولەك, سەنىم شارالارى, ونىڭ ىشىندە كەپىلگە الىنعانداردى بوساتۋ جانە ءىز-ءتۇسسىز جوعالعانداردى ىزدەۋ دە كۇن تارتىبىنە ەندى. بۇۇ قاۋىپسىزدىك كەڭەسىنىڭ 2642 قارارىنا سايكەس سيريانى قايتا قالپىنا كەلتىرۋ جانە سيريالىق بوسقىنداردى وتانىنا قايتارۋ ءۇشىن جاعداي جاساۋ ماقساتىندا حالىقارالىق قاۋىمداستىقتىڭ كۇش-جىگەرىن جۇمىلدىرۋ جونىندە پىكىر الماستى.
«استانا فورماتىنداعى ءتيىستى جۇمىس توبى شەڭبەرىندە ۇستالعانداردى/ۇرلانعان ادامداردى بوساتۋ جونىندەگى وپەراتسيالاردى جالعاستىرۋعا بەل بايلاعانىمىزدى راستادى. جۇمىس توبىنىڭ سيريالىق تاراپتار اراسىنداعى سەنىمدى نىعايتۋداعى وزەكتىلىگى مەن تيىمدىلىگىن راستاعان بىرەگەي مەحانيزم ەكەنىنە كەلىستى. ۇستالعانداردى/ۇرلانعانداردى بوساتۋ بويىنشا جۇمىستى جالعاستىرۋ جانە مايىتتەردى بەرۋ, حابارسىز كەتكەندەردى ىزدەۋ جونىندەگى قولدانىستاعى مانداتقا سايكەس ءىس-قيمىلدى كەڭەيتۋگە كەلىستى.
قازاقستان تاراپىن 2022 جىلعى 20 قاراشاداعى پرەزيدەنت سايلاۋىنىڭ ءساتتى وتۋىمەن قۇتتىقتاپ, استانادا سيريا بويىنشا 19-شى حالىقارالىق كەزدەسۋدى استانادا وتكىزگەنى ءۇشىن قازاقستان بيلىگىنە شىنايى العىسىن ءبىلدىردى. سيريا جونىندەگى 20-حالىقارالىق كەزدەسۋدى 2023 جىلدىڭ ءبىرىنشى جارتىسىندا استانادا وتكىزۋگە كەلىستى», دەلىنگەن مالىمدەمەدە.
