1996 جىلى اتلانتادا الاۋى تۇتانعان جازعى وليمپيا ويىندارىنا قازاقستان تاۋەلسىز مەملەكەت رەتىندە العاش رەت قاتىسقاندا, اتالعان جارىستىڭ اشىلۋ سالتاناتىندا كوك بايراعىمىزدى كوتەرىپ شىعۋ باقىتىنا يە بولدىم. 2000 جىلى سيدنەي وليمپياداسىندا دا ءدال سونداي قۇرمەتكە بولەندىم. سول باسەكەلەردىڭ ەكەۋىنەن دە ولجالى ورالدىم. اقش-تا قولا مەدالدى موينىما ىلسەم, اۋستراليادا التىن تۇعىرعا كوتەرىلدىم. سول كەزدەردە كەۋدەمدى ماقتانىش سەزىمى كەرنەپ, ءوزىمدى بۇل الەمدەگى ەڭ باقىتتى ادامداي سەزىندىم.
بۇگىن وتباسىممەن بىرگە پرەزيدەنت سايلاۋىنا قاتىسۋ ءۇشىن الماتى قالاسىنداعى №361 سايلاۋ ۋچاسكەسىنە كەلىپ, ءوز تاڭداۋىمىزدى جاسادىق. پرەزيدەنت – مەملەكەتتىڭ تۇراقتىلىعى, ەلدىڭ تىنىشتىعى مەن قاۋىپسىزدىگىنىڭ كەپىلى, ەكونوميكالىق جانە الەۋمەتتىك تۇرعىدا ءوسىپ-ونۋىنە, وركەندەۋىنە ەڭ جاۋاپتى ادام. سول ءۇشىن دە ءبىز دۇرىس تاڭداۋ جاساي ءبىلۋىمىز كەرەك. مەن قازاقستاننىڭ تۇتاستىعى, بەيبىتشىلىك پەن جاسامپازدىق, حالىقتىڭ ءال-قۋاتىنىڭ ارتۋى جانە بالالارىمنىڭ بولاشاعى ءۇشىن داۋىس بەردىم. جەكە ءوز باسىم, قازاقستاننىڭ كەلەشەگى جارقىن بولاتىنىنا كامىل سەنىمدىمىن. ءبىز ءالى بارلىق سالا بويىنشا الەمنىڭ الدىڭعى قاتارىندا كەلە جاتقان الپاۋىت ەلدەردىڭ قاتارىنا قوسىلامىز. سول ءۇشىن دە بارلىعىمىز ەرىنبەي ەڭبەك ەتىپ, كوزدەگەن ماقساتىمىزعا جەتۋ جولىندا وجەتتىك پەن تاباندىلىق تانىتۋىمىز كەرەك. تەك سوندا عانا جاڭا قازاقستان قۇرا الامىز.
ەرماحان ىبىرايىموۆ,
بوكستان وليمپيادا چەمپيونى
