كوپكە توپىراق شاشۋعا بولمايدى, ايتسە دە كەيبىر جاستار انا ءتىلىن ۇمىتىپ, رۋحانياتىن جوعالتۋدا. انا ءتىلى – قاي ۋاقىتتا دا قاستەرلى, قۇدىرەتتى ۇعىم. ءبىز ءوز ەلىمىزدىڭ دامۋىنا ۇلەس قوسۋشى رەتىندە الدىمەن ءوزىمىزدى سىيلاپ, تۋعان ءتىلىمىزدى قادىر تۇتىپ, ماقتان ەتە ءبىلۋىمىز قاجەت. قازاقستان مەملەكەت بولىپ قالىپتاسۋى ءۇشىن انا ءتىلىنىڭ ءرولى باسىم بولۋى شارت.
ۇلتتىق قاۋىپسىزدىك, ىشكى جانە سىرتقى تىنىشتىق, ۇلتتىق ەكونوميكا, زايىرلى مەملەكەت بولعاندىقتان ءتۇرلى ەتنوستىق جانە ءدىني توپتاردىڭ كەلىسىمى مەن تاتۋلىعى, اتا زاڭىمىزدى ساقتاۋ سەكىلدى ماڭىزدى ماسەلەلەر دە مەملەكەت دامۋى مەن ونىڭ ساياسي ارەناعا شىعۋىنا سەپتىگىن تيگىزەدى.
بۇل سايلاۋ دا – تاۋەلسىز قازاقستان تاريحىنىڭ ءبىر بولشەگى. ەلىمىز شىن مانىندە ادىلەتتى, حالىق يگىلىگىنە جۇمىس ىستەيتىن قۋاتتى رەسپۋبليكاعا اينالاتىنىنا ءوز باسىم كامىل سەنەمىن. تاريحسىز بولاشاق جوق. اتاقتى عۇلاما ءماشھۇر ءجۇسىپ كوپەي ۇلى: «قازاققا قوي ۇستىنە بوزتورعاي جۇمىرتقالايتىن زامان ءالى-اق كەلەدى» دەپ ايتىپ كەتكەن. ءوزىم تاڭداۋ جاساعان ازامات ەل تىزگىنىن ۇستاپ, اتا-بابامىز اڭساپ كەتكەن بەرەكەلى زامان ورنايتىنىنا سەنىمىم بەرىك. بارلىق جۇرتتىڭ ويلاعانى دا, كوزدەگەنى دە – تىنىشتىق. ەلىمىزدىڭ شەكاراسى ءبۇتىن, حالىقتىڭ كوڭىلى توق بولسا, ودان ارتىق باقىت جوق.
باقىتجامال ماكسيلوۆا,
پاۆلودار وبلىسىنداعى «نۇر انا الەمى» قوعامدىق بىرلەستىگىنىڭ توراعاسى
