ماسەلەن, كەيىنگى 7 ايدا, ياعني وسى جىلدىڭ 1 مامىرىنان باستاپ 15 قاراشاعا دەيىن استاناعا 259,2 مىڭ توننا كومىر جەتكىزىلگەن. قازىر ەلىمىزدەگى تەمىرجول تۇيىقتارىنداعى قاتتى وتىننىڭ كولەمى 317,8 مىڭ توننادان اسادى. ونىڭ ىشىندە باس قالاداعى تەمىرجول تۇيىقتارىندا كومىر قورى شامامەن 19,2 مىڭ تونناعا تەڭ. اقمولا وبلىسىندا – 58 مىڭ توننا. بۇل پۋنكتتەر ءتيىستى ينفراقۇرىلىممەن, ونىڭ ىشىندە تيەپ-ءتۇسىرۋ تەحنيكاسىمەن تولىق جابدىقتالعان.
استاناداعى تەمىرجول تۇيىقتارىنان كومىر اقمولا وبلىسىنىڭ تاياۋ ماڭداعى ەلدى مەكەندەرىنە (جىبەك جولى, تالاپكەر, قوسشى جانە ارشالى جانە تاعى باسقالارى) ساتىلادى.
يندۋستريالىق دامۋ كوميتەتى توراعاسىنىڭ ورىنباسارى تۇرار جالماعامبەتوۆتىڭ ايتۋىنشا, حالىقتى قاتتى وتىنمەن قامتاماسىز ەتۋ جۇمىستارى يندۋستريا جانە ينفراقۇرىلىمدىق دامۋ مينيسترلىگىنىڭ تۇراقتى باقىلاۋىندا. بيىل جىلىتۋ ماۋسىمىنا دايىندىق ناۋرىز ايىندا باستالدى. وسىعان بايلانىستى قازىر كۇندەلىكتى مونيتورينگ جۇرگىزىلىپ كەلەدى.
– مينيسترلىك تۇراقتى نەگىزدە جەرگىلىكتى اتقارۋشى ورگاندار, «قازاقستان تەمىر جولى» ۇلتتىق كومپانياسى جانە كومىر رازرەزدەرىمەن قاتتى وتىنمەن قامتاماسىز ەتۋگە بايلانىستى, سونداي-اق وڭىرلەردە دۇربەلەڭدى بولدىرماۋ ءۇشىن كۇندەلىكتى كەڭەس وتكىزىپ كەلەدى. باعانىڭ وسۋىنە جول بەرمەۋ ماقساتىندا تامىزدا بارلىق كومپانيا باعانى بەكىتۋ تۋرالى مەموراندۋمعا قول قويدى. كومىردىڭ ورتاشا باعاسى بىلتىرعى دەڭگەيدە ساقتالىپ وتىر, – دەيدى ت.جولماعامبەتوۆ.
ونىڭ ايتۋىنشا, يندۋستريا جانە ينفراقۇرىلىمدىق دامۋ مينيسترلىگى وڭىرلەردىڭ اكىمدىكتەرىمەن بىرلەسىپ, كومىردى جەتكىزۋ جانە ءبولۋ ماسەلەلەرىن ەرەكشە نازاردا ۇستاپ وتىر. حالىقتى قاتتى وتىنمەن قامتاماسىز ەتۋ ءۇشىن جاۋاپتى ۆەدومستۆو بىرقاتار شارا قابىلدادى. ونىڭ ىشىندە الداعى جىلىتۋ ماۋسىمىندا قاتتى وتىن تاپشىلىعىن بولدىرماۋ ءۇشىن قۇزىرلى ورگان جىلىتۋ ماۋسىمى كەزەڭىندە اۆتوكولىكپەن كومىردى اكەتۋدى 6 ايعا شەكتەۋ تۋرالى بۇيرىقتى قابىلدادى. اتالعان شەشىم كومىر رازرەزدەرى جانە وڭىرلىك اكىمدىكتەرمەن بىرلەسىپ ازىرلەندى.
– قازىر قانداي دا ءبىر دۇربەلەڭ جوق. مۇمكىن بۇل ادامداردىڭ كومىر قورىن الدىن الا جيناقتاپ الۋىمەن بايلانىستى شىعار. سونداي-اق قالانىڭ كوگىلدىر وتىنعا كوشىرىلىپ جاتقانىن ەسكەرۋ قاجەت. قازىر حالىقتىڭ ەداۋىر بولىگى كومىردى ساتىپ العان. ۆاگونداردى جىبەرۋ مەن ولاردى تازالاۋعا قاتىستى ماسەلە تۋىنداپ وتىرعان جوق, – دەدى كومىر قويماسىنىڭ مەڭگەرۋشىسى التىنبەك ەسجانوۆ.
بۇل رەتتە كومىردىڭ قورى, باعاسى جانە بار-جوقتىعىن انىقتاۋ تۋرالى سۇراقتاردىڭ جاۋابىن 109 سەنىم تەلەفون نومىرىنە حابارلاسۋ ارقىلى الۋعا بولادى. تەمىرجول تۇيىقتارىنداعى كومىردىڭ باعاسى, ونىڭ ىشىندە استاناداعى قاتتى وتىننىڭ قۇنى تۋرالى ايتساق, مايكوبە كومىرىنىڭ تونناسى – 13 200 تەڭگە, شۇباركول كومىرىنىڭ باعاسى – 13 900 تەڭگە, قاراجىرا كومىرىنىڭ قۇنى – 14 600 تەڭگە.
سونىمەن قاتار Halyk Market پلاتفورماسىنا وڭىرلىك وپەراتورلاردى قوسۋ جۇمىستارى جالعاسىپ جاتىر. وسى ورايدا زاماناۋي شەشىمدەردىڭ قاتتى وتىندى تىكەلەي تەمىرجول تۇيىقتارىنان كەزەكسىز ساتىپ الۋدا سەپتىگى مول ەكەنىن ايتا كەتكەن ابزال. بۇل ءوز كەزەگىندە حالىقتى جىلىتۋ ماۋسىمىنا ۋاقتىلى دايىنداۋعا مۇمكىندىك بەرەدى. اتالعان قاناتقاقتى جوباعا قىزىلوردا, جامبىل, پاۆلودار, قوستاناي, قاراعاندى, سولتۇستىك قازاقستان جانە اقمولا وبلىستارى مەن الماتى قالاسى قوسىلدى.
