بۇل جيىندا تۇرعىنداردى, اسىرەسە جاستاردى باسپانامەن قامتاماسىز ەتۋ جايى دا قوزعالدى. ەلىمىزدەگى ەڭ ۇلكەن قالادا باسپانا ماسەلەسىن شەشۋ جايى قاشاندا كۇردەلى. اكىمدىك جالعا بەرىلەتىن تۇرعىن ءۇي سالۋ ءۇشىن ينۆەستورلارعا تارتىمدى بولاتىن ءتيىمدى تاسىلدەر ويلاستىرۋعا ءتيىس ەكەنى ەسكەرتىلدى. كەلەسى جىلدان باستاپ تۇرعىن ءۇي قۇرىلىسىن جىل سايىن 10 پايىزعا ارتتىرۋ قاجەت ەكەنى ايتىلدى.
پرەزيدەنت الماتى قالاسىن دامىتۋعا قاتىستى ماسەلەلەردىڭ ۇنەمى باقىلاۋدا ەكەنىن اتاپ ءوتىپ, قالا جۇرتشىلىعىن الداعى ماقساتتاردى بىرلەسىپ ىسكە اسىرۋعا شاقىردى. ال ستۋدەنتتەرمەن جانە جاس عالىمدارمەن كەزدەسۋىندە مەملەكەت دامۋىنا جاستاردىڭ قوساتىن ۇلەسى جانە ادىلەتتى قازاقستانداعى جاستار ساياساتىن جەتىلدىرۋ جونىندەگى پايىمدارىمەن ءبولىستى.
مەملەكەت باسشىسى بايانداماسىندا بۇعان دەيىن نەگىزىنەن ەلىمىزدىڭ قازبا بايلىقتارىنا, مۇناي قورىنا ارقا سۇيەپ كەلسەك, ەندى زاماننىڭ, ۋاقىتتىڭ ىڭعايىنا قاراي ادام كاپيتالىنىڭ ماڭىزى ارتقان داۋىرگە قادام باسقانىمىزعا توقتالدى.
سونداي-اق الداعى ۋاقىتتا ءبىلىم كۋلتكە اينالىپ, تەحنيكالىق ماماندىقتارعا باسەكەلەستىك ارتاتىنىن جەتكىزدى. قازىرگى تاڭداعى باسى اشىق ماسەلە – ەلىمىزدىڭ ەڭ ءىرى مەگاپوليسىندە 37 مىڭ ستۋدەنتكە جاتاقحانا جەتىسپەيتىنىن, تۇرعىن جاي تاپشىلىعىن جويۋ ءۇشىن تىڭ تاسىلدەر ازىرلەنەتىنىن اتاپ ءوتتى. بۇل جاڭالىقتى كەزدەسۋگە بارعان شاكىرتتەرىمىز دە, وقىتۋشىلارىمىز دا قۋانا قابىلدادى. ويتكەنى ءال-فارابي اتىنداعى قازاق ۇلتتىق ۋنيۆەرسيتەتى ماۋسىم ايىندا وقۋ ورنىنا رەسمي ساپارمەن كەلگەن پرەزيدەنتكە قالاشىق قۇرىلىسىنىڭ ءىى كەزەڭىن سالۋ جوسپارىن تانىستىرعان ەدى. دامۋ جوسپارى بويىنشا كامپۋس اۋماعىندا وقۋ كورپۋستارى, قىزمەتتىك تۇرعىن ءۇي, جاتاقحانالار سالۋ كوزدەلىپ وتىر.
ازىرگە قالاشىق اۋماعىنداعى جاتاقحانالاردى كەڭەيتۋ ارقىلى ورىن سانىن كوبەيتۋدى قاراستىرىپ وتىرمىز. جاقىندا №5 جانە №10 جاتاقحانا كۇردەلى جوندەۋدەن ءوتىپ, ستۋدەنتتەر يگىلىگىنە بەرىلدى. №10 جاتاقحانانىڭ اشىلۋىنا عىلىم جانە جوعارى ءبىلىم ءمينيسترى ساياسات نۇربەك ارنايى قاتىستى. بۇل جاتاقحانالاردى جوندەۋ جۇمىستارى بارىسىندا تۇرعىن جاي كەڭەيتىلىپ, ءار بولمەگە قوسىمشا ءبىر توسەكتەن قويىلدى. وسى ءتاسىل ارقىلى الداعى ۋاقىتتا جاتاقحانالارداعى ورىن سانىن 2 مىڭعا ارتتىرۋ نيەتىمىز بار.
پرەزيدەنت اتاپ وتكەندەي, شەتەلدىك جەتەكشى ۋنيۆەرسيتەتتەرمەن اكادەميالىق ىنتىماقتاستىعىمىز دا نىعايا ءتۇستى. مەملەكەت باسشىسىنىڭ قولداۋىمەن قازۇۋ بازاسىندا ميفي (ماسكەۋ ينجەنەرلىك-فيزيكالىق ينستيتۋتى) ۇلتتىق زەرتتەۋ يادرولىق ۋنيۆەرسيتەتى فيليالى اشىلدى. سونداي-اق بيىل ءبىلىم ورداسىنىڭ ىستانبۇل مەن بىشكەكتەگى فيليالدارى جۇمىس ىستەي باستادى.
مەملەكەت باسشىسى كەلەر جىلدىڭ 1 شىلدەسىنەن باستاپ وقىتۋشىلاردىڭ, سونداي-اق جوعارى وقۋ ورىندارى مەن عىلىمي-زەرتتەۋ ينستيتۋتتارىنداعى عالىمداردىڭ ەڭبەكاقىسىن ۇلعايتۋ مەحانيزمدەرىن پىسىقتاۋدى تاپسىردى. قازىرگى تاڭدا QS الەمدىك رەيتينگىندە 150-ورىنعا كوتەرىلگەن ۇلتتىق ۋنيۆەرسيتەتتە وقىتۋشى-پروفەسسورلار قۇرامىنىڭ جالاقىسى ايتارلىقتاي ءوستى. 2021-2022 وقۋ جىلىنان باستاپ وقىتۋشى جالاقىسى – 38, اعا وقىتۋشىنىكى – 75, دوتسەنتتىكى – 88, پروفەسسوردىڭ جالاقىسى 163 پايىزعا ارتتى. بۇگىندە وقىتۋشى – 200 مىڭ, اعا وقىتۋشى – 280 مىڭ, دوتسەنت – 330 مىڭ, پروفەسسور 500 مىڭ تەڭگە جالاقى الادى.
پرەزيدەنت كەزدەسۋ قورىتىندىسىندا ء«بىزدىڭ ستۋدەنتتەرىمىز بەن جاس عالىمدارىمىز ەلىمىزدەگى رەفورمالارعا قولداۋ ءبىلدىرىپ, وزگەرىستەرگە سەنەتىنى ءسوزسىز. ءبىز بۇل وزگەرىستەردىڭ ءبارىن ەلىمىزدىڭ كەلەشەگى – بۇگىنگى جانە ەرتەڭگى جاستار ءۇشىن جاساپ وتىرمىز. ءبىز مەملەكەت پەن قوعام دامۋىنىڭ جاڭا باعىت-باعدارىن تەك بىرگە ايقىنداي الامىز», دەپ, جاس بۋىن وكىلدەرىنە ەرەكشە ءۇمىت ارتتى.
جانسەيىت تۇيمەباەۆ,
ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما توراعاسى-رەكتور
