فورۋم جۇمىسىنا قمدب توراعاسى, باس ءمۇفتي ناۋرىزباي قاجى تاعان ۇلى باستاعان ءمۇفتيات ۇجىمى مەن ءدىن قىزمەتكەرلەرى, قوعام قايراتكەرلەرى, كاسىپكەرلەر مەن باق وكىلدەرى, سونداي-اق «زەكەت جانە قايىرىمدىلىق» قورىنىڭ وڭىرلەردەگى وكىلدەرى مەن ەرىكتىلەر قاتىستى. قاسيەتتى قۇران اياتتارى وقىلىپ, باس ءمۇفتي ەل اماندىعى ءۇشىن دۇعا جاساپ, ءىس-شارانىڭ ءساتتى ءوتۋىن تىلەدى.
سونداي-اق العاشقى بولىپ ءسوز العان قمدب توراعاسى ناۋرىزباي قاجى تاعان ۇلى ءدىن جولىندا ەرىكتى تۇردە قىزمەت ەتۋدىڭ ماڭىزى مەن ساۋابىن ايرىقشا اتاپ ءوتىپ, اسىرەسە جاستاردىڭ تاباندىلىعى قايىرىمدىلىق ىستەرىندە ەرەكشە كورىنىپ تۇراتىنىن تىلگە تيەك ەتتى.
«قۇران كارىمدەگى «كاھف» سۇرەسىندە يمانىن ساقتاپ, ۇڭگىرگە جاسىرىنعان جاستاردىڭ وقيعاسى باياندالادى. وسى سۇرەدە: «ولار يمان كەلتىرگەن جاستار ەدى» دەپ سيپاتتالادى. سول جاستاردىڭ وقيعاسى كەيىنگى تولقىندارعا ۇلگى رەتىندە كورسەتىلدى. جاراتقان ءجاببار حاقتان ۋاحي تۇسكەندە پايعامبارىمىزدىڭ (وعان اللانىڭ سالاۋاتى مەن سالەمى بولسىن) جاسى قىرىقتا بولاتىن. ال ناسيحاتىنا ەرىپ, يمانعا كەلگەندەردىڭ باسىم بولىگى جاستار ەدى. العاش يمان كەلتىرگەن كەزدە ءاليدىڭ جاسى 8-دە, تالحا يبن ۋبايدۋللا 11-دە, ابدۋللا يبن ماسعۇت 14-تە, ساعىد يبن ءابۋ ۋاققاس 17-دە, زۋبەير يبن اۋام (بارشاسىنا اللا رازى بولسىن) 18-دە ەدى.
بۇلاردىڭ بارلىعى پايعامبار (وعان اللانىڭ سالاۋاتى مەن سالەمى بولسىن) مەكتەبىنىڭ پاراساتتى دا العىر تۇلەكتەرى بولاتىن. اۋەلى اللانىڭ قالاۋىمەن, سوسىن سول جاستاردىڭ جۇمىلا كۇش سالۋىمەن حاقتىڭ قاسيەتتى ءسوزى, ياعني قۇران كارىم كىتابىمىز شارتاراپقا جايىلدى.
پرەزيدەنت قاسىم-جومارت توقاەۆ ەلىمىزدە وتكەن ەرىكتىلەر جىلىنىڭ جابىلۋ راسىمىندە: «ەرىكتىلەر جىلى جالىندى جاستارىمىزدىڭ بويىنداعى ەڭ اسىل قاسيەتتەردى دارىپتەگەن ەرەكشە جىلعا اينالدى. بۇل جاناشىرلىققا, جاۋاپكەرشىلىك پەن قامقورلىققا ۇندەگەن كەزەڭ بولدى. ءبىز مۇقتاج جاندارعا قولۇشىن بەرىپ, ءتۇرلى قيىندىقتارمەن بىرگە كۇرەستىك. وسىلايشا, ادامگەرشىلىك قۇندىلىقتاردى جوعارى باعالايتىن قوعام ەكەنىمىزدى تانىتتىق. ەرىكتىلەر – وزگەنىڭ ماسەلەسىن ءوز ىسىندەي كورەتىن جۇرەگى كەڭ, نيەتى دۇرىس جاندار. ءبىزدىڭ ەلىمىز ءدال وسىنداي ازاماتتاردان كەندە ەمەس. سىزدەردىڭ قوعام ءۇشىن جاساعان پايدالى ىستەرىڭىز, كوپشىلىكتىڭ ىستىق ىقىلاسى مەن اق باتاسى – سونىڭ ايقىن دالەلى» دەگەن ەدى.
راسىندا, ناعىز جاناشىر ادام ەرىكتى بولا الادى. وسى فورۋمدا قابىلداناتىن قۇجاتتار «زەكەت جانە قايىرىمدىلىق» قورىنىڭ يگى باستامالارىن قولدايتىن ەرىكتىلەر قاتارىنىڭ كوبەيۋىنە, ساۋاپتى ىستەردىڭ باسى-قاسىنان تابىلاتىن جانداردىڭ بەلسەندىلىگىنە ىقپال ەتەدى دەپ سەنەمىن», دەدى باس ءمۇفتي.
ايتا كەتەيىك, فورۋم بارىسىندا Qaiyrymdylyq Jarshylary «ەرىكتىلەرىنىڭ تۇعىرناماسى», «ەرىكتىلەر كۇنى» جانە ەرىكتىلەردىڭ جىلدىق جوسپارى بەكىتىلدى. سونداي-اق «ۇزدىك قايىرىمدىلىق جوبا» تاڭدالىپ, «جىل جاناشىرى» انىقتالدى جانە «زەكەت جانە قايىرىمدىلىق» قورىنىڭ ديرەكتورى ماقساتبەك قايىرعاليەۆ قازىرگى تاڭداعى اتقارىلىپ جاتقان جوبالاردى تانىستىرىپ ءوتتى.
اتاپ ايتساق, «ۇزدىك قايىرىمدىلىق جوبا» نوميناتسياسى بويىنشا «زەكەت جانە قايىرىمدىلىق» قورىنىڭ الماتى قالاسىنداعى جاۋاپتى وكىلى تەمىربەك پەرنەبەك ۇلى ماراپاتتالسا, «جىل جاناشىرى» نوميناتسياسى وكسانا شۋمەيكوعا تابىستالدى. وكسانانىڭ قوستاناي وبلىسىنداعى توتەنشە جاعداي كەزىندە «زەكەت جانە قايىرىمدىلىق» قورى قۇرعان ارنايى شتابىندا كۇنى-ءتۇنى قىزمەت ىستەپ, اۋليەكول اۋدانى تۇرعىندارىنا جەدەل كومەك بەرۋگە اتسالىسقانىن ەرەكشە اتاي كەتكەن ءجون.
