«قازىرگى گەوساياسي جاعدايدا ەلدەر تەحنولوگيا جاعىنان ءبىر-بىرىنەن وقشاۋلانىپ بارادى. سوندىقتان تۇركى ەلدەرىنىڭ IT سالاسىنداعى سوڭعى جاڭالىقتارىنا ءجىتى نازار اۋدارۋ كەرەك. بۇل ءبىزدىڭ تسيفرلىق دامۋىمىزعا جول اشادى», دەدى ق.توقاەۆ.
قازاقستان پرەزيدەنتى تاياۋدا استانادا «Digital Bridge» اتتى حالىقارالىق ءىس-شارا وتكەنىن, وندا ءىت سالاسىندا جۇمىس ىستەيتىن كرەاتيۆتى جاستار وزىق يدەيالارىن ۇسىنعانىن جەتكىزدى. «مەملەكەتتەرىمىزدىڭ IT حابتارى اراسىنداعى ءوزارا ءىس-قيمىل تۋرالى مەموراندۋمعا قول قويىلدى. وسى رەتتە مەن استانا حاب حالىقارالىق تەحنوپاركى نەگىزىندە تۇركى مەملەكەتتەرى ۇيىمىنىڭ تسيفرلاندىرۋ ورتالىعىن قۇرۋدى ۇسىنامىن. بۇل قۇرىلىم ساۋدا, كولىك, سۋ رەسۋرستارى, اقپاراتتىق قاۋىپسىزدىك جانە باسقا دا سالالارعا قاجەتتى تسيفرلىق شەشىمدەر ازىرلەۋگە مۇمكىندىك بەرەدى», دەدى ق.توقاەۆ.
