ەر ادام قازاقستان رەسپۋبليكاسى قىلمىستىق كودەكسىنىڭ 296-بابى «ەسىرتكى, پسيحوتروپتىق زاتتارمەن, سول تەكتەستەرمەن وتكىزۋ ماقساتىنسىز زاڭسىز جۇمىس ىستەۋ» بويىنشا كىنالى دەپ تانىلدى.
بۇعان دەيىن «قاراسورا» جەدەل الدىن الۋ ءىس شاراسى اياسىندا تۇركىستان وبلىسى ءىىد ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى ەسىرتكى زاتتارىن ساقتاعان كۇدىكتىنى ۇستاعان بولاتىن. كەلەس اۋدانىنداعى اۋىلداردىڭ بىرىندە پوليتسەيلەر «لادا پريورا» كولىگىن توقتاتتى. ءتىنتۋ كەزىندە تەرگەۋشىلەر وسىمدىك تەكتەس زات سالىنعان سومكە تاپتى. الىنعان دالەلدەمە ساراپتاماعا جىبەرىلدى. قورىتىندىعا سايكەس, تاركىلەنگەن ەسىرتكى زاتى جالپى سالماعى 1 كەلىدەن اساتىن «كوكنار» بولىپ شىقتى.
كۇدىكتى ماقتاارال اۋدانىنىڭ تۇرعىنى ەكەنى انىقتالدى. قارت ءوز ارەكەتىن مويىنداپ, ەسىرتكىنى ءوزى تۇتىنۋى ءۇشىن ساقتاعانىن ءتۇسىندىردى. جيناقتالعان سوتقا دەيىنگى تەرگەپ-تەكسەرۋ ماتەريالدارى ايىپتاۋ اكتىسىمەن بىرگە زاڭدى شەشىم قابىلداۋ ءۇشىن سوتقا جولداندى. سوت ۇكىمىمەن سوتتالۋشى 3 جىلعا باس بوستاندىعىن شەكتەۋ جازاسىنا كەسىلدى.
