كەزدەسۋ بارىسىندا جاھاندىق دىنارالىق جانە وركەنيەتارالىق ديالوگتى ىلگەرىلەتۋ جونىندەگى الداعى ءوزارا ءىس-قيمىل ماسەلەلەرى ءسوز بولدى.
سەنات سپيكەرى مۇحاممەد ابدەلسالامعا بيىل قىركۇيەك ايىندا استانا قالاسىندا وتكەن الەمدىك جانە ءداستۇرلى دىندەر ليدەرلەرىنىڭ VII سەزىنە قاتىسقانى ءۇشىن العىسىن ءبىلدىردى. سونداي-اق ول مۇسىلمان اقساقالدارى كەڭەسىنىڭ الەمدەگى بەيبىتشىلىكتى, بىرلىكتى جانە ءدىني توزىمدىلىكتى ساقتاۋعا قوسىپ كەلە جاتقان ۇلەسىن ەرەكشە اتاپ ءوتتى.
ماۋلەن اشىمباەۆ كەڭەستىڭ مۇسىلمان قاۋىمداستىعىندا بەيبىتشىلىكتى نىعايتۋ, ءدىني ەكسترەميزمگە قارسى تۇرۋ جانە ءداستۇرلى يسلام قۇندىلىقتارىن دارىپتەۋ جولىندا اۋقىمدى جۇمىس اتقارىپ كەلە جاتقانىن تىلگە تيەك ەتتى.
سونىمەن قاتار سەنات توراعاسى بۇگىندە قازاقستاندا مەملەكەت باسشىسىنىڭ تاپسىرماسىمەن 2023-2033 جىلدارعا ارنالعان الەمدىك جانە ءداستۇرلى دىندەر ليدەرلەرىنىڭ سەزىن دامىتۋ تۇجىرىمداماسى ازىرلەنىپ جاتقانىن ايتتى. بۇل قۇجاتتا فورۋمدى ودان ءارى دامىتۋدىڭ ناقتى قادامدارى مەن كەزەڭدەرى بەلگىلەنەدى.
ءوز كەزەگىندە مۇحاممەد ابدەلسالام الەمدىك جانە ءداستۇرلى دىندەر ليدەرلەرى سەزىنىڭ بەدەلى مەن رولىنە, سونداي-اق, قازاقستاننىڭ الەمدەگى كونفەسسياارالىق جانە وركەنيەتارالىق ديالوگتى دامىتۋعا قوسىپ وتىرعان ۇلەسىنە نازار اۋداردى.
ايتا كەتەيىك, مۇسىلمان اقساقالدارى كەڭەسى تاۋەلسىز حالىقارالىق ۇيىم. ونىڭ قىزمەتى مۇسىلمان قاۋىمداستىقتارىنداعى بەيبىتشىلىكتى نىعايتۋعا, ءدىني شيەلەنىستى ازايتۋعا جانە توزىمدىلىكتى ارتتىرۋعا ىقپال ەتۋگە باعىتتالعان.
