سوڭعى ۋاقىتتا الەم ەكونوميكاسىنىڭ قوزعاۋشى كۇشىنە اينالىپ كەلە جاتقان قىتايدا اۆتوساتىلىم ۇلەسى 8,2 پايىز ءوسىم كورسەتكەن. 19,4 ملن جاڭا كولىك ءوز يەلەرىن تاۋىپتى. قىتايداعى جاعدايدىڭ جاقسارۋى جاھاندىق نارىقتىڭ بىرتىندەپ قالپىنا كەلۋىنە اسەر ەتكەن. دەگەنمەن ساراپشىلار كوپ ەلدەردە احۋال ءالى دە بولسا ءماز ەمەس ەكەنىن ايتادى. بىلتىردىڭ ءۇش توقسانىمەن سالىستىرعاندا, وڭتۇستىك كورەيادا ساتىلىم – 6 پايىزعا, جاپونيادا – 10,1 پايىزعا, باتىس ەۋروپادا – 11,7 پايىزعا, اقش-تا 12,9 پايىزعا ازايعان. ال شىعىس ەۋروپا ەلدەرىندە جەڭىل جانە كوممەرتسيالىق كولىكتەردىڭ ساتىلىمى 30,5 پايىزعا تومەندەپتى.
كورشىلەس رەسەيدەگى اۆتوديلەرلەردىڭ جاعدايى ءتىپتى ناشار. بيىل قاڭتار-قىركۇيەك ايلارىندا 506,7 مىڭ جاڭا جەڭىل جانە كوممەرتسيالىق اۆتوموبيل ساتىلعان. 2021 جىلدىڭ ءۇش توقسانىمەن سالىستىرعاندا 59,8 پايىزعا تومەندەۋ بايقالادى. ال ەلىمىزدە 9 ايدا 87 مىڭ كولىك ساتىلدى. بىلتىرمەن سالىستىرعاندا 0,4 پايىزعا ءوسۋ بار. ءۇش توقساننىڭ قورىتىندىسى بويىنشا قازاقستاندىقتار اراسىندا Chevrolet جانە Hyundai ماركالارىنىڭ ەرەكشە تانىمالدىلىققا يە ەكەنى انىق بولىپ وتىر. وسى ەكى برەندكە بۇكىل ساتىلىمنىڭ 51,6 پايىزى تيەسىلى. 24,5 مىڭ Chevrolet, 20,4 مىڭ Hyundai ساۋدالانعان. بۇل رەتتە كورەي كولىگىنىڭ ساتىلىم ۇلەسى 14,7 پايىزعا وسسە, امەريكالىق كولىكتىڭ ساتىلىمى 9,4 پايىزعا ارتقان.
قاڭتار-قىركۇيەكتەگى ساتىلىم بويىنشا توپ-10 ماركا قاتارىنا تاعى ەكى قىتايلىق برەند كىرىپ وتىر, ولار – Chery (2,5 مىڭ اۆتو) جانە Jac (2,1 مىڭ اۆتو). وسى قارقىنمەن جاقىن كەلەشەكتە قىتايلىق برەندتەر نارىقتى ءبىرجولا جاۋلاۋى بەك مۇمكىن. قازىردىڭ وزىندە Astana Motors ءۇش بىردەي قىتايلىق اۆتوگيگانت – Changan, Chery جانە Haval اۆتوموبيلدەرىنىڭ ءوندىرىسى بويىنشا زاۋىت قۇرىلىسىنا كىرىستى. بۇل, ارينە, الداعى ۇلكەن الەۋەتتەن حابار بەرەدى. Changan قىتايداعى ءوندىرىس دەڭگەيى بويىنشا ءنومىرى ءبىرىنشى برەند بولسا, Chery ەكسپورت بويىنشا ليدەر اتانىپ وتىرعان كولىك ءتۇرى. ال Haval – قىتاي نارىعىنداعى ءتورتىنشى پوزيتسيانى ۇستاپ تۇرعان Great Wall Motor اۆتوكونتسەرنىنىڭ سۋببرەندى.
قازاقستان اۆتوموبيل بيزنەسى قاۋىمداستىعىنىڭ دەرەگىنە قاراعاندا, بيىل قىركۇيەك ايىندا 12 مىڭ جەڭىل جانە كوممەرتسيالىق اۆتوموبيل ساتىلعان. 2021 جىلدىڭ قىركۇيەگىمەن سالىستىرعاندا 19,3 پايىزعا ىلگەرىلەۋ بار. ەل تۇرعىندارى Chevrolet Cobalt پەن Nexia-نى (2,5 مىڭ جانە 1,1 مىڭ اۆتو), سونداي-اق Hyundai Tucson-دى (1,1 مىڭ اۆتو) كوپ ساتىپ العان. بۇدان وزگە قىركۇيەك ايىنداعى ساتىلىم بويىنشا ۇزدىك وندىققا Hyundai-دىڭ ءتورت مودەلى – Tucson, Santa Fe, Sonata, Elantra, Kia-نىڭ ەكى مودەلى – Ceed جانە Sportage, Toyota مەن Chery-ءدىڭ ءبىر-ءبىر مودەلى – Land Cruiser Prado مەن Tigo 7 Pro كىرگەن.
