قازاق-قىرعىز ەلدەرى ەجەلدەن-اق تامىرى تەرەڭ تاتۋ كورشىلىك ورناتىپ, بارىس-كەلىس پەن الىس-بەرىس اياسى باياعىدا-اق اناعۇرلىم كەڭەيگەن مۇددەلەس مەملەكەتتەر ەكەنى بەسەنەدەن بەلگىلى.
قىرعىزستان – ءبىز ءۇشىن تامىرلاس, تاعدىرلاس جانە باۋىرلاس مەملەكەت. ەكى ەل اراسىندا ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق سالاداعى ىنتىماقتاستىق اياسى كەڭەيە تۇسۋدە. ەلدەرىمىز ايماقتىق جانە جاھاندىق ماسەلەلەردە ءوزارا ىقپالداستىق پەن ىنتىماقتاستىققا اسا ماڭىز بەرۋدە. سونىڭ ارقاسىندا قازىر قازاق-قىرعىز قاتىناسى جاڭا دەڭگەيگە كوتەرىلدى دەۋگە تولىق نەگىز بار.
ەل تىنىشتىعى مەن تۇراقتىلىقتى, قىرعىزستاندى مەكەن ەتكەن حالىقتار اراسىنداعى دوستىق, ىنتىماقتاستىق قاتىناستاردى نىعايتا تۇسۋگە قىرعىزستانداعى قازاق قاۋىمداستىعى دا زور سەپتىگىن تيگىزىپ ءجۇر.
مەرەكەلى مەرەيتوي اياسىنداعى العاشقى ءىس-شارا قىرعىز رەسپۋبليكاسىنىڭ الىقۇل وسمونوۆ اتىنداعى ۇلتتىق كىتاپحاناسىندا «قازاقستان-قىرعىزستان: 30 جىلدىق دوستىق پەن ىنتىماقتاستىق» اتتى وتىرىسپەن باستالدى. دوڭگەلەك ۇستەلدىڭ باستى تاقىرىبى – ازاتتىقتىڭ اق تاڭىمەن قاتار كەلگەن قىرعىزستان قازاقتارى قاۋىمداستىعىنىڭ 30 جىلدىق مەرەيتويى بولعاندىقتان, اۋقىمى كەڭ ءىس-شارا ەجەلدەن ەنشىسى ءبىر ەگىز حالىق قىرعىز باۋىرلارمەن بىرلەسە ۇيىمداستىرىلدى.
دوڭگەلەك ۇستەل قىرعىزستان رەسپۋبليكاسى مادەنيەت, اقپارات, سپورت جانە جاستار ساياساتى ءمينيسترىنىڭ قۇتتىقتاۋىمەن باستالدى. سونىمەن قاتار قازاقستان رەسپۋبليكاسىنىڭ قىرعىز رەسپۋبليكاسىنداعى ەلشىسى ءراپىل جوشىباەۆ بيىل تاۋەلسىز ەل رەتىندە قازاقستان مەن قىرعىزستان اراسىنداعى ديپلوماتيالىق قارىم-قاتىناستىڭ 30 جىلدىق مەرەكەسى ۇلتىمىزدى ۇيىستىرعان قاۋىمداستىقتىڭ مەرەيتويىمەن تۇسپا-تۇس كەلىپ وتىرعانىنا توقتالدى.
قازاقستاندىق دەلەگاتسيانى باستاپ بارعان «وتانداستار» قورىنىڭ پرەزيدەنتى ابزال ساپاربەك ۇلى وسى مەرەيتويدىڭ جوعارى دەڭگەيدە اتاپ وتىلۋىنە ايرىقشا ىقىلاس بىلدىرگەن قىرعىزستان باسشىلىعىنا, قىرعىزستاننىڭ حالقى اسسامبلەياسىنا, قازاقتار قاۋىمداستىعىنا, قوعامدىق ۇيىمدارعا, جاناشىر اعايىندار مەن بەلسەندى قانداستارعا ريزالىق ءبىلدىرىپ, العىسىن ايتتى.
ابزال ساپاربەك ۇلى ءوز سوزىندە ءبىر-بىرىنە دەگەن وسىنداي ىستىق ىقىلاستى قاتىناستىڭ ىرگەسىن قالىپتاستىرعان مۇحتار اۋەزوۆ, شىڭعىس ايتماتوۆ, مۇحتار شاحانوۆ سىندى ەكى ۇلتتىڭ ۇلى تۇلعالارى ەكەنىن ماقتانىشپەن اتاپ ءوتتى.
ءوز كەزەگىندە قىرعىزستان حالقى اسسامبلەياسىنىڭ توراعاسى, اكادەميك ابدىعاني ەركەباەۆ تا ەجەلدەن تاتۋ ەكى ەلدىڭ اراسىنداعى بەرىك دوستىقتىڭ تاريحي تامىرى تەرەڭ ەكەنىن تەبىرەنە جەتكىزدى. ءوزىنىڭ دە قازاق دوستارى كوپتىگىن ماقتان تۇتىپ, ولاردىڭ جاقسى قاسيەتتەرىن دارىپتەدى.
قازاقستاننىڭ ەڭبەك ەرى, حالىق جازۋشىسى, قازاقستان رەسپۋبليكاسىنىڭ قىرعىزستانداعى تۇڭعىش ەلشىسى, قىرعىز رەسپۋبليكاسىنىڭ حالىق اقىنى مۇحتار شاحانوۆتىڭ جان تەربەتەر جاقسى سوزدەرى ەل جۇرەگىن ەلجىرەتتى. «ادامزاتتىڭ ايتماتوۆى اتانعان شىڭعىس دوسىم فانيدەن باقيعا وزعالى جانىم جابىرقاپ, جالعىز قالعانداي كۇي كەشىپ ءجۇرمىن», دەگەن ءبىر اۋىز ءسوزىنىڭ ءوزى توننىڭ ىشكى باۋىنداي, بىرگە تۋعان باۋىرداي ەكى ەلدىڭ ەگىزدەي ۇيلەسىمىنىڭ ۇلگىسى بولدى. جاسامپاز حالىقتاردىڭ جارقىن بولاشاعى جاستاردىڭ قولىندا ەكەنىن ايتقان اقيىق اقىن وسكەلەڭ ۇرپاققا ولەڭدەتە باتا بەردى.
تۇعىرلى تۇلعادان كەيىن ءسوز العان تاراپتار تاتۋ كورشىلىك ساياساتتى دامۋدىڭ جاڭا ساتىسىنا كوتەرۋ جونىندە كەلەلى ءسوز قوزعاپ, وي-پىكىرلەرىن ورتاعا سالدى. جيىن سوڭىندا الىس-جاقىن شەتەلدەردەگى قالىڭ قازاقتىڭ قامىن ويلايتىن «وتانداستار قورىنىڭ» باسشىسى ابزال ساپاربەك ۇلى كورشىلەس ەلدەگى قانداستار قاۋىمىنا اتاجۇرتتىڭ اتىنان ارنايى «قورجىن» توپتاماسىن تارتۋ ەتتى. ەستەن كەتپەس ەستەلىك رەتىندە قازاقتىڭ قاسيەتتى دومبىراسىنان باستاپ, ۇلتتىق كيىمدەر, باعالى كادەسىيلار ۇسىنىپ, ۇلتتىق قۇندىلىقتارىمىزدى تاعى ءبىر ۇلىقتادى.
كەزدەسۋدە قىرعىز اعايىندار شەكارالاس جامبىل وبلىسىنىڭ كەنەن ازىرباەۆ اتىنداعى فيلارمونياسى ونەرپازدارىنىڭ مەرەيتويعا ارنايى الا كەلگەن ءان-شاشۋىن تاماشالادى. تارازدىق ساحنا ساڭلاقتارى مەرەيتوي قوناقتارىنىڭ مەيىرىن قاندىرىپ, قانداستارىمىزدىڭ ابىرويىن اسىردى.
سونىمەن قاتار كونتسەرتتىك باعدارلاما اياسىندا قىرعىز رەسپۋبليكاسى مادەنيەت, اقپارات, سپورت جانە جاستار ساياساتى ءمينيسترىنىڭ ورىنباسارى سامات شاتمانوۆ, جوگوركۋ كەنەشتىڭ حالىقارالىق ىستەر, قورعانىس, قاۋىپسىزدىك جانە كوشى-قون كوميتەتى توراعاسىنىڭ ورىنباسارى لەيلا لۋروۆا ءسوز سويلەپ, العىس ءبىلدىردى.
بىشكەك قالاسىن قازاقتىڭ حالىق اندەرىمەن الديلەپ, قىرعىز اسپانىن كۇي كۇمبىرىمەن تەربەتكەن ونەر كەشى كوپشىلىكتىڭ جادىندا جاتتالىپ, كورەرمەن كوڭىلىندە كوپكە دەيىن ساقتالىپ قالارى انىق.
