«مەن وڭىرلەرگە ساپارىمدا جالپىۇلتتىق ماڭىزى بار ماسەلەلەرگە ارنايى توقتالىپ ءجۇرمىن. وسى جەردە دە كەيبىر وي-پىكىرىمدى ايتقىم كەلەدى. ءبىز مىقتى مەملەكەت قۇرىپ جاتىرمىز. بىراق ادىلدىك بولماسا, مىقتى مەملەكەتتىڭ ءوزى اۆتوكراتياعا اينالادى», دەدى پرەزيدەنت.
بۇل رەتتە قاسىم-جومارت توقاەۆ ءوزىنىڭ ساياسي باعدارىنىڭ ەڭ باستى وزەگىن اتادى.
«ەلدىڭ دامۋى ءۇشىن ادىلدىك تۇبەگەيلى ورنىعۋعا ءتيىس. ونسىز حالىقتىڭ مەملەكەتكە دەگەن سەنىمى دە بولمايدى. سوندىقتان ادىلدىك يدەياسى – مەنىڭ ساياسي باعدارىمنىڭ ەڭ باستى وزەگى. بۇل ماقساتقا جەتۋ ءۇشىن, ەڭ الدىمەن, زاڭدارىمىز ءادىل بولۋى كەرەك. ويتكەنى, مەملەكەتتىك ساياسات زاڭ ارقىلى جۇزەگە اسىرىلادى. رەفورمالاردىڭ باستى ماقساتى – حالىقتىڭ تۇرمىس ساپاسىن جاقسارتۋ», دەدى مەملەكەت باسشىسى.
سونداي-اق پرەزيدەنت ارالاس سايلاۋ جۇيەسىنىڭ ارتىقشىلىعىن اتادى.
«مەن وتكەن اپتادا ەلىمىز ءۇشىن ايرىقشا ماڭىزى بار بىرقاتار زاڭعا قول قويدىم. ونىڭ ىشىندە سايلاۋ زاڭناماسىنا ەنگىزىلگەن وزگەرىستەردى ەرەكشە اتاپ وتكىم كەلەدى. جاڭا زاڭدار شىن مانىندە حالىقتىق سيپاتقا يە وكىلدى ورگاندار قالىپتاستىرادى. ءبىزدىڭ مىندەتىمىز – ەل الدىندا ابىروي-بەدەلى بار, قولىنان ءىس كەلەتىن جاڭا تۇلعالاردىڭ ساياساتقا كەلۋىنە جاعداي جاساۋ. ارالاس سايلاۋ جۇيەسى دەپۋتاتتاردىڭ اتقارۋشى بيلىككە ىقپالىن كۇشەيتە تۇسەدى. سونداي-اق, وڭىرلەردىڭ ماسەلەسىن مەملەكەتتىك دەڭگەيدە ۋاقىتىلى كوتەرۋگە سەپتىگىن تيگىزەدى», دەپ ءتۇسىندىردى مەملەكەت باسشىسى.
وسى تۇستا پرەزيدەنت ەلدەگى مەملەكەتتىك قىزمەتكە اۋقىمدى رەفورما جۇرگىزۋ قولعا الىناتىنىن دا جەتكىزدى.
«پارتيا قۇرۋدىڭ جاڭا ءادىل ەرەجەلەرى ەنگىزىلدى. بۇل قادام ازاماتتاردىڭ ساياساتقا ارالاسۋ مۇمكىندىگىن ارتتىرادى. ولار مەملەكەتتىك ماڭىزى بار شەشىمدەردى قابىلداۋعا قاتىسا الادى. سونداي-اق, ەلىمىزگە باسقارۋشىلاردىڭ جاڭا بۋىنى كەرەك. اسىرەسە, جوعارى جانە ورتا بۋىن باسشىلارىنىڭ قۇرامىن جاڭارتۋ اسا ماڭىزدى. سول ءۇشىن مەملەكەتتىك قىزمەتكە اۋقىمدى رەفورما جۇرگىزۋدى جوسپارلاپ وتىرمىز», دەدى قاسىم-جومرت كەمەل ۇلى.
پرەزيدەنتتىڭ ايتۋىنشا, ەل يگىلىگى ءۇشىن ەڭبەك ەتكىسى كەلەتىن ءبىلىمدى, دارىندى ازاماتتارعا جول اشۋ قاجەت.
ء«تۇرلى سالاعا بىلىكتى ماماندار تارتۋ ءۇشىن بارىنە بىردەي مۇمكىندىك بەرىلەتىن بولادى. مەريتوكراتيا – باستى قاعيداتىمىز. اسىرەسە, باسقارۋ ىسىنە ايماقتارداڭ شىققان مىقتى مەنەدجەرلەردى تارتۋعا باسا ءمان بەرەمىز. ەل يگىلىگى ءۇشىن ەڭبەك ەتكىسى كەلەتىن ءبىلىمدى, دارىندى ازاماتتار ءار ايماقتا بار. ولارعا جول اشۋ – مەملەكەتتىڭ مىندەتى», دەدى مەملەكەت باسشىسى.
وسى تۇستا قاسىم-جومارت كەمەل ۇلى تۇتاس قازاقستاننىڭ دامۋىنا ءار ءوڭىر سۇبەلى ۇلەس قوسىپ وتىرعانىن ەرەكشە اتاپ ءوتتى.
ء«بىز «قۋاتتى وڭىرلەر – قۋاتتى ەل» قاعيداتىن ۇستانامىز. قازاقستاننىڭ دامۋىنا ءاربىر ايماق سۇبەلى ۇلەس قوسىپ وتىر. باتىستا مۇناي وندىرىلسە, ورتالىقتا كومىر, شىعىستا مەتالل شىعادى. سولتۇستىك ايماقتار استىعىمەن ايگىلى بولسا, وڭتۇستىك ءتورت ت ۇلىگىمەن, باۋ-باقشاسىمەن تانىمال. ءبىر سوزبەن ايتساق, ءار ولكەنىڭ ءوز ەرەكشەلىگى بار. تۇپتەپ كەلگەندە, ءبارى – ءبىر-بىرىنەن بولە-جارا قاراۋعا بولمايتىن ءبىرتۇتاس قازاقستان», دەپ تۇيىندەدى ەل پرەزيدەنتى.
