ء«وڭىردىڭ دەنساۋلىق ساقتاۋ جۇيەسىن دامىتۋعا باسا ءمان بەرگەن ءجون. وبلىستا وكپە جانە جۇرەك-قان تامىرلارى اۋرۋىنا شالدىققان ناۋقاستاردىڭ سانى كوبەيىپ بارادى. انا مەن بالا ءولىمى دە از ەمەس. بۇعان وڭىردەگى ەكولوگيالىق احۋالدىڭ ناشارلىعى, بىلىكتى دارىگەرلەردىڭ تاپشىلىعى سەبەپ بولىپ وتىر. وسى ورايدا, باستى مىندەتتىڭ ءبىرى – مەديتسينالىق ينفراقۇرىلىمدى جاقسارتۋ», دەدى پرەزيدەنت.
سونداي-اق مەملەكەت باسشىسى اتىراۋ قالاسىندا ەمحانا عيماراتتارى تاپشى ەكەنىن اتاپ ءوتتى.
«وبلىستاعى مەديتسينا مەكەمەلەرىنىڭ 40 پايىزعا جۋىعى وسىنداي جاعدايدا جۇمىس ىستەپ جاتىر. پسيحيكالىق دەنساۋلىق ورتالىعى, ونكولوگيالىق ديسپانسەر, جەدەل جاردەم ستانتسيالارىنىڭ جاعدايى سىن كوتەرمەيدى. ءتىپتى, بۇل مەكەمەلەردىڭ عيماراتتارى پايدالانۋعا جارامسىز. وسى ماسەلەنىڭ ءبارىن شۇعىل شەشۋ قاجەت», دەدى توقاەۆ.
