سانيتارلىق-ەپيدەميولوگيالىق باقىلاۋ كوميتەتى تۇسىندىرگەندەي, باس سانيتارلىق دارىگەردىڭ قاۋلىسىنا سايكەس, جرۆي مەن تۇماۋ اۋرۋىنىڭ جوعارىلاۋى وقۋشىلاردىڭ قاشىقتىقتان وقىتۋعا كوشۋىنە بولادى.
ء«بىر ينكۋباتسيالىق كەزەڭ ىشىندە ءبىر سىنىپتاعى وقۋشىلار اراسىندا 20-30%-عا دەيىنگى جرۆي اۋرۋى تىركەلسە, كۇنتىزبەلىك ون كۇن ىشىندە سىنىپتارعا جاڭادان بالا قابىلداۋعا تىيىم سالۋ ۇسىنىلادى. ەپيدەميالىق پروتسەسكە جرۆي-مەن اۋىراتىن ناۋقاستاردىڭ جالپى سانى 30% جانە ودان كوپ بولعان جاعدايدا ءبىر ينكۋباتسيالىق كەزەڭ ىشىندە وقۋشىلاردى ونلاين-وقىتۋعا اۋىستىرۋ جۇزەگە اسىرىلادى», دەپ حابارلادى كوميتەت وكىلدەرى.
سانيتارلىق دارىگەرلەر اتاپ وتكەندەي, بۇعان دەيىن مەكتەپ وقۋشىلارى تەك كوروناۆيرۋستىڭ ورشۋىنە بايلانىستى ونلاين وقۋعا كوشكەن. تۇماۋ مەن جرۆي العاش رەت وقۋشىلاردى قاشىقتىقتان وقىتۋعا اۋىستىرۋعا سەبەپ بولۋى مۇمكىن.
ال وقۋ-اعارتۋ مينيسترلىگى سىنىپتاردا جرۆي ءورشۋى جاعدايىندا بالالاردى ونلاين وقىتۋعا اۋىستىرۋ تۋرالى ۇسىنىسپەن كەلىسپەيتىندەرىن حابارلادى.
«الەمدە مەكتەپتەر - ءبىرىنشى بولىپ اشىلىپ, سوڭعى بولىپ جابىلادى. بۇل تۋرالى يۋنيسەف وكىلدەرى دە مالىمدەدى. ءبىز بالالاردىڭ تولىققاندى ساپالى ءبىلىمى مەن ءال-اۋقاتىن قامتاماسىز ەتۋدى ماڭىزدى دەپ سانايمىز. وقۋ-اعارتۋ مينيسترلىگى ونلاين-رەجيمدە وقىتۋ بويىنشا ۇسىنىستى قولدامايدى», دەپ ءتۇسىندىردى ۆەدومستۆودا.
ايتا كەتەيىك, بۇعان دەيىن دەنساۋلىق ساقتاۋ مينيسترلىگىنىڭ وكىلى روزا قوجانوۆا ەپيدەميالىق ماۋسىم باستالعاننان بەرى قازاقستاندا جرۆي-ءنىڭ 764 247 جاعدايى تىركەلگەنىن حابارلاعان ەدى.
