فرانتسيالىق كورەرمەن 27-30 قازان ارالىعىندا Lincoln كينوتەاترىنان «پاراليمپياداشى» سپورتتىق دراماسىن, « ۇلى دالا تاڭى» تاريحي بلوكباستەرىن, «سوڭعى سەانس», «وت», «زويانىڭ ورالۋى», «تارلان» (قازاقستان مەن تاتارستاننىڭ بىرلەسىپ شىعارعان ءفيلمى) كارتينالارىن تاماشالاپ, قازاق كينو ونەرىنىڭ بۇگىنگى اياقالىسىنا باعا بەردى. سونداي-اق فرانتسيا, بەلگيا, قازاقستان, ۋكراينا جانە باسقا دا ەلدەردىڭ كينەماتوگرافيستەرى بىرلەسىپ شىعارعان «ينفينيتي» جوباسىنىڭ ەكسكليۋزيۆتى كورسەتىلىمى مەن «قىزعالداق» ءفيلمىنىڭ رەتروسپەكتيۆتى كورسەتىلىمىنە كوزايىم بولدى.
فەستيۆالدىڭ سالتاناتتى اشىلۋىنا وتاندىق فيلمدەردىڭ اۆتورلارى, ولاردىڭ فرانتسيالىق ارىپتەستەرى, فرانتسياداعى قازاقستان ەلشىلىگى مەن كينو ورتالىعىنىڭ وكىلدەرى, جۋرناليستەر قاتىستى. اتاپ ايتساق, ءىس-شاراعا قاتىسۋشىلار مەن قوناقتار قاتارىندا اكتريسا سامال ەسلياموۆا, رەجيسسەرلەر – دارەجان ومىرباەۆ, سەرگەي دۆورتسەۆوي, الديار بايراكيموۆ, ايجان قاسىمبەك, پروديۋسەرلەر – ديانا ءاشىموۆا مەن لاۋرا ەرعاليەۆا جانە تاعى دا باسقا كينو ماماندارى بار.
ۇلتتىق كينونى قولداۋ ورتالىعى باسقارما توراعاسىنىڭ ورىنباسارى باۋىرجان شوكەنوۆ باستاعان كينو ورتالىعى دەلەگاتسياسىنىڭ ىسكەرلىك باعدارلاماسى اۋقىمدى بولدى. الدىن الا دايىندالعان جوسپار بويىنشا كينو وكىلدەرى فرانتسيانىڭ كينوتەاتر جەلىلەرىنىڭ باسشىلىعىمەن كەزدەسۋ, فرانتسۋز كينو بيزنەسى وكىلدەرىنىڭ ىسكەرلىك الاڭىنىڭ جۇمىسىنا قاتىسۋ, بىرلەسىپ شىعارۋعا ارنالعان جوبالاردى ۇسىنۋ جانە CNC (فرانتسيانىڭ ۇلتتىق كينەماتوگرافيا جانە انيماتسيا ورتالىعى) مەن UniFrance (فرانتسۋز كينوسىن بۇكىل الەمدە ناسيحاتتاۋعا جاۋاپتى ۇيىم) وكىلدەرىمەن كەلىسسوزدەر جۇرگىزۋ سىندى بىرقاتار ماڭىزدى ىسكەرلىك شارانى دا تابىستى جۇزەگە اسىردى.
مادەنيەت جانە سپورت مينيسترلىگىنىڭ قولداۋىمەن ۇلتتىق كينونى قولداۋ مەملەكەتتىك ورتالىعى ۇيىمداستىرعان پاريجدەگى قازاقستان كينوسىنىڭ كۇندەرىن وتكىزۋگە فرانتسياداعى قازاقستان رەسپۋبليكاسىنىڭ ەلشىلىگى تىكەلەي مۇرىندىق بولدى. سونداي-اق اندرە رافاەل يۆانوۆ باسقاراتىن قازاقستاندىق كينونىڭ فرانتسۋزدىق قاۋىمداستىعىنىڭ دا سىڭىرگەن ەڭبەگى زور.
بۇدان بولەك, ايرىقشا اتاپ وتەرلىك تاعى ءبىر قۋانىشتى جاڭالىق – بيىل قازاقستان مەن فرانتسيا اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىنا ورايلاستىرىلعان قازاق كينوسىنىڭ دۇنيەجۇزىلىك دۋمانى ءوز شەكاراسىن كەڭەيتتى. ۇلتتىق كينو فەستيۆالى ەندى پاريج, ستراسبۋرگ, بريۋسسەل, ليۋكسەمبۋرگ, جەنەۆا قالالارىندا وتكىزىلەتىن بولادى.
