قازاقتان شىققان تۇڭعىش كەڭەستىك ديپلومات ءنازىر تورەقۇلوۆ بابامىز حاقىندا مەن اتام ىبىراي قاجىدان كوپ ەستىپ ءوستىم. سول كۇندەر قازىر ساعىنىشقا اينالعانداي. ولاي دەيتىنىم اتامنىڭ قايتىس بولعانىنا دا بەس جىلدىڭ ءجۇزى اۋىپتى.
ءنازىرتانۋدىڭ انىق عىلىمي جولىن قالاۋعا بۇل كىسىنىڭ تاۋەكەلگە بارعان بۇل كىسىنىڭ سوڭعى ون جىلى قىزىق ءارى قيىنشىلىقپەن ءورىلىپ جاتتى. قىزىعى باسىم دەپ ايتۋىمىزعا ابدەن بولار. ويتكەنى جۇمىسى ناتيجەلى بولدى. توڭىرەگىنە عالىمداردى, اقىن-جازۋشىلاردى كوپ توپتاستىردى. قوقان, تاشكەنت, ماسكەۋ, شىمكەنت, الماتى, استانا, ءتىپتى ساۋد ارابياسىنىڭ باس قالاسى ەر-ريادقا دەيىن بايلانىس جاسادى جارىقتىق.
وسىلايشا ءنازىرتانۋدا ءتاۋىر جول قالىپتاستى. اللاعا شۇكىر, بۇل باعىتتا قازىر قاتارى قالىڭ, جۇرەگى جالىن زەرتتەۋشىلەر ەڭبەك ەتۋدە. ساۋد ارابياسىنداعى ەلشىلىكتە جۇمىس ىستەپ جاتقانىما ءۇش جىلدىڭ توڭىرەگى بولدى. ءنازىر بابام مەن ىبىراي اتامدى ءبىر ساتكە جادىمنان شىعارمادىم. كوپ ويلاندىم. زەرتتەۋ جۇمىسىن جالعاستىرۋدى پارىز سانادىم. ءسويتىپ اينالاما بىرتىندەپ سۇراۋ سالا باستادىم. العاشقى ۇلكەن ولجام – “ەگەمەن قازاقستان” گازەتىنە جىبەرىپ وتىرعان تومەندەگى جادىگەرلەر. بۇل كورول فەيسال اتىنداعى زەرتتەۋلەر مەن يسلام وقۋلارى ورتالىعىنداعى جوعارى مارتەبەلىنىڭ جەكە فوتوارحيۆىندە ساقتالعان 9 مىڭنان استام سۋرەتتەردىڭ ىشىنەن تابىلدى.
بەس فوتو! ءيا, ءنازىر تورەقۇلوۆ بەينەلەنگەن بەس ءراسىم. وسى ولجانى كورگەندە قۋانىشتان كوز جاسىمدى ارەڭ ىرىكتىم.
ەل اتىنان سويلەگەن ەرەن بابام! ەرلىگىڭە نەگە ءتانتى بولماسقا؟! وتىزىندا وردا بۇزىپ, قىرقىندا قامال العان تۇركىستان قايراتكەرى... وسى فوتودەرەكتەردى جانە دە ءنازىر تورەقۇلوۆقا قاتىستى كوپتەگەن قۇجاتتاردى ۇستىمىزدەگى جىلدىڭ 1-5 ماۋسىم ارالىعىندا استانا مەن الماتى قالالارىندا وتەتىن ساۋد ارابياسىنىڭ قازاقستانداعى مادەني كۇندەرى اياسىنداعى كورمەدەن تاماشالاپ كورىپ,
جاقىن تانىسۋعا بولادى.
ماديار يسمايل, قازاقستان رەسپۋبليكاسىنىڭ ساۋد ارابياسى كورولدىگىندەگى
ەلشىلىگىنىڭ ەكىنشى حاتشىسى.
