وتكەن جىلدىڭ وزىندە ءوڭىر مارشرۋتتارىنا 36 جاڭا اۆتوبۋس شىعارىلعان. بۇل شارالار – جولاۋشىلار تاسىمالى سالاسىنداعى قوردالانعان پروبلەمالاردى جۇيەلى تۇردە شەشۋگە باعىتتالعان جۇمىستاردىڭ ءبىر پاراسى.
جوسپارلى جاڭارتۋ باستالعانعا دەيىن قوعامدىق كولىك سالاسىنداعى جاعداي اۆتوبۋستاردىڭ توزۋ دەڭگەيىنىڭ جوعارى بولۋىنا, كولىك قولجەتىمدىلىگىنىڭ بىركەلكى ەمەستىگىنە بايلانىستى كۇردەلەنە تۇسكەن. اۆتوبۋس پاركى سوڭعى رەت 2018 جىلى جاڭارتىلعان, ول قوناەۆ قالاسىندا نەبارى 11 كولىكپەن شەكتەلگەن ەدى. بۇل قارقىندى دامىپ, اۋماعى كەڭەيە تۇسكەن ءوڭىردىڭ قاجەتتىلىگىن تولىق قامتۋعا مۇمكىندىك بەرمەدى. اسىرەسە ىشكى اۋدانارالىق باعىتتار مەن شالعاي اۋىلدىق ەلدى مەكەندەردە ماسەلە ايقىن سەزىلىپ, قوعامدىق كولىك كوپ جاعدايدا جالعىز قاتىناس قۇرالى بولىپ قالا بەردى.
ماسەلەنىڭ وزەكتىلىگى ەسكەرىلىپ, 2023 جىلدان باستاپ وبلىستا اۆتوبۋس پاركىن كەزەڭ-كەزەڭىمەن جاڭارتۋ تەتىگى قالىپتاستىرىلدى. سول جىلى تاسىمالداۋشىلار ءوز قاراجاتى ەسەبىنەن 33 اۆتوبۋس ساتىپ السا, ودان كەيىنگى جىلى 44 اۆتوبۋس جاڭارتىلدى. ونىڭ 27-ءسى جەڭىلدەتىلگەن ليزينگ باعدارلاماسى اياسىندا الىنعان. بىلتىر تاعى 33 اۆتوبۋس جەڭىلدەتىلگەن قارجىلىق قۇرالدار ارقىلى ساتىپ الىنىپ, ىسكە قوسىلدى. بۇل ءتاسىل بىررەتتىك ساتىپ الۋدان تۇراقتى جاڭعىرتۋ مودەلىنە كوشۋگە جول اشتى.
بۇل باعىتتاعى جۇمىس الداعى ۋاقىتتا دا جالعاسىن تابادى. الماتى وبلىسى جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىنشە, بيىل تاعى 31 اۆتوبۋستى جاڭارتۋ جوسپارلانىپ وتىر. ونىڭ ىشىندە 11 اۆتوبۋس قاڭتار ايىندا ساتىپ الىندى.
بيىلعا ارنالعان جوسپاردى قالىپتاستىرۋ كەزىندە الەۋمەتتىك جۇكتەمەسى جوعارى مارشرۋتتارعا, بۇرىن كولىك قولجەتىمدىلىگى جونىندە كۇردەلى ماسەلە تىركەلگەن باعىتتارعا باسىمدىق بەرىلىپ وتىر. نەگىزگى ماقسات – توزىعى جەتكەن اۆتوبۋس پاركىنىڭ ۇلەسىن بىرتىندەپ ازايتىپ, مارشرۋتتىق جەلىنىڭ تۇراقتى جۇمىسىن قامتاماسىز ەتۋ.
اۆتوبۋس پاركىن جاڭعىرتۋ ارقىلى جولاۋشىلار تاسىمالى سالاسىنداعى جۇيەلى ماسەلەلەر شەشىمىن تاۋىپ, تۇرعىنداردىڭ قوعامدىق كولىكپەن قاتىناۋىنا قولايلى جاعداي جاسالىپ كەلەدى.
الماتى وبلىسى
