مەملەكەت باسشىسى «ارناۋلى قۇقىقتىق رەجيم بار, ەندى مىندەتتى تۇردە تابىسقا جەتەمىز» دەپ ويلاۋ قاتەلىك بولاتىنىن ايتتى.
«ويتكەنى ءدال وسىنداي رەجيم ەنگىزىلگەن ەكونوميكالىق ايماقتاردىڭ تالاي رەت ءىس جۇزىندە ناقتى ناتيجە بەرمەگەنى بەلگىلى. ساپالى ينستيتۋتتار, اشىق ءارى تۇراقتى ەرەجەلەر, دەربەس رەتتەۋ تەتىكتەرى بولعان جوق. سونىڭ سالدارىنان كوپتەگەن جوبا ويداعىداي جۇزەگە اسىرىلماي قالدى. بۇدان ءتيىستى ساباق الىپ, دۇرىس قورىتىندى شىعارۋ قاجەت. ارناۋلى رەجيم ءتيىمدى جۇمىس ىستەۋى ءۇشىن ءبىرتۇتاس زاڭناما جۇيەسى قاجەت.
قالانىڭ ىسكەرلىك بەلسەندىلىگىنە جانە كۇندەلىكتى تىرشىلىگىنە قاتىستى ماسەلەلەردى رەتتەيتىن اشىق, ايقىن ءارى ساپالى قۇقىقتىق نەگىز بولۋعا ءتيىس. بۇل جۇمىستى ەكى دەڭگەيدە اتقارۋ قاجەت. ءبىرىنشىسى – نەگىزگى قاعيدالاردى بەلگىلەيتىن كونستيتۋتسيالىق دەڭگەي. بۇل ماسەلە ءوز شەشىمىن تاپتى. ال ەكىنشىسى – قۇقىقتىق رەتتەۋ دەڭگەيى, ياعني, ەكونوميكالىق قىزمەتتىڭ ءار سالاسى بويىنشا ناقتى زاڭنامالىق تەتىكتەر ايقىندالادى», دەدى پرەزيدەنت.
مەملەكەت باسشىسى, سونداي-اق الاتاۋ جوباسىنا قاتىستى زاڭنامالىق جۇمىس جىلدام ءارى ساپالى جۇرگىزىلۋ كەرەك ەكەنىن ايتتى.
«تۇپتەپ كەلگەندە, مۇنداي جۇمىس جۇيەسى قۇقىقتىق تۇراقتىلىقتى ساقتاۋعا مۇمكىندىك بەرەدى جانە ورىنسىز زاڭنامالىق وزگەرىستەردەن قورعاپ, جەدەل جانە تەز شەشىمدەر قابىلداۋعا ىقپال ەتەدى. الاتاۋ جوباسىنا قاتىستى رەتتەۋ اكتىلەرىن ازىرلەۋ بارىسىندا مىندەتتى تۇردە وسىنداي قۇقىقتىق جۇيەلەردى قۇرۋ ىسىندە مول تاجىريبەسى بار بىلىكتى شەتەلدىك ساراپشىلاردى تارتۋ قاجەت. قالا اكىمشىلىگى نەگىزگى رەتتەۋ اكتىلەرىنىڭ بارلىعىن ءبىر جىلدىڭ ىشىندە قابىلداۋدى جوسپارلاپ وتىر. قالانى دامىتۋ جونىندەگى كەڭەس بۇل ءىستى مەيلىنشە تەز قولعا الۋى كەرەك. جۇمىستى سوزا بەرۋگە بولمايدى. ايتپەسە, ينۆەستيتسيادان قۇر قالامىز. بيزنەس وكىلدەرى دە بىزگە سەنىپ وتىر, سوندىقتان, بۇل جۇمىسقا نۇقسان كەلتىرۋگە بولمايدى. حالىقارالىق ينۆەستورلار قولايلى جاعداي جاسايدى دەپ, جىلدار بويى كۇتىپ وتىرمايدى. ولار قاي جەردە مول مۇمكىندىك بولسا, سوعان ساي بىردەن شۇعىل شەشىم قابىلدايدى. الاتاۋ جوباسىنا قاتىستى زاڭنامالىق جۇمىس جىلدام ءارى ساپالى جۇرگىزىلۋگە ءتيىس. بۇل – اسا ماڭىزدى ستراتەگيالىق مىندەت», دەدى مەملەكەت باسشىسى.
