سۋرەتتى تۇسىرگەن – اۆتور
جىلجىمالى كورمەگە اقىننىڭ شاحمات تاقتاسى, دومبىراسى, جازۋ ماشىڭكەسى, پورتفەلى, قول ساعاتى, سيا ساۋىتى, قولجازبالارى مەن فوتوسۋرەتتەرى قويىلدى. اسىرەسە عابيت مۇسىرەپوۆ تارتۋ ەتكەن التىن قالامساپ, ءابدىلدا تاجىباەۆ سىيعا تارتقان ناسىباي شاقشاسى, 96 بەتتەن تۇراتىن قولجازبا داپتەر, اقىن قولىنىڭ تابى قالعان كىتاپتار ەكسپوزيتسيا مازمۇنىن ارتتىرا تۇسكەن.
«الماتى قالاسى مەن الماتى وبلىستىق مۋزەيلەر بىرلەستىگى مۇرىندىق بولعان كوشپەلى كورمەگە نەگىزگى جادىگەرلەردى اكەلىپ وتىرمىز. قالادان 320 شاقىرىم قاشىقتا ورنالاسقان ءبىزدىڭ اۋىلعا مۇقاعالي مۋزەيىن تاماشالاۋ ءۇشىن ەلىمىزدىڭ تۇكپىر-تۇكپىرىنەن, الىس-جاقىن شەتەلدەردەن جىلىنا مىڭداعان ادام كەلەدى. اقىن اۋىلى قوناقتارىن قۇشاق جايا قارسى الۋعا ءار كەز دايىن. مەرەيتويعا وراي ۇيىمداستىرىلىپ وتىرعان كوشپەلى كورمە قاراساز اۋىلىنا بارۋعا مۇمكىندىگى جوق ازاماتتار ءۇشىن تاپتىرماس ولجا بولدى دەپ سانايمىز», دەيدى م.ماقاتاەۆتىڭ ادەبي-مەموريالدىق مۇراجايىنىڭ عىلىمي قىزمەتكەرى باتتال ادىلەت.
ايرىقشا كورمەنىڭ اشىلۋ سالتاناتى «جىرلايدى جۇرەك» دەپ اتالعان ادەبي-سازدى كەشكە ۇلاسىپ, ج.ەلەبەكوۆ اتىنداعى رەسپۋبليكالىق ەسترادا-تسيرك كوللەدجىنىڭ ستۋدەنتتەرى اقىن ولەڭدەرىنە جازىلعان اندەردى ورىندادى.
ادەبي-سازدى كەش اياسىندا مۇقاعالي ماقاتاەۆ اتىنداعى قوعامدىق قوردىڭ ديرەكتورى باقىتكۇل ايداروۆا, «مۇقاعالي» جۋرنالىنىڭ باس رەداكتورى دۇيسەن ماعلۇموۆ, اقىن باقىت بەدەلحان, اقىن باقىت جاعىپار ۇلى قالامگەردىڭ شىعارماشىلىق مۇراسى تۋرالى وي ءبولىستى.
ۇلتتىق ورتالىق مۋزەي ديرەكتورىنىڭ مىندەتىن اتقارۋشى سەرجان ساروۆ, جىر مەرەكەسىنىڭ كورىگىن قىزدىرعان كوركەم جوبا الماتىدا سالتانات قۇرىپ, حالقىنىڭ سۇيىكتى پەرزەنتىن جىر بەسىكتە تەربەگەن قاراسازداعى اقىن مۇراجايىنىڭ ارنايى كەلۋى ساۋلەلى جىردان قۋات الىپ, مۇقاعالي الەمىمەن ۇندەسكىسى كەلگەن كورەرمەنگە قۋانىش سىيلاعانىن جەتكىزدى.
اقىن داڭقى اسقاقتاعان سايىن, ۇلى قالامگەردىڭ ساۋساعى تيگەن زاتتاردىڭ ءبارى قىمبات. ءوز كەزەگىندە باقىتكۇل ايداروۆا اقىن ۇرپاقتارىنىڭ اتىنان مۇقاعاليدىڭ ءوزى تۇتىنعان كەسەسى مەن ءومىرىنىڭ سوڭعى كەزدەرىندە اۋرۋحانادا كيگەن كيىمىن, سونداي-اق اقىن مۇراسىن قامتىعان بىرنەشە كىتاپتى ۇلتتىق ورتالىق مۋزەيدىڭ قورىنا تابىستادى.
الماتى
