وسكەلەڭ ۇرپاقتى تۋعان ەلىنىڭ دامۋ جانە قالىپتاسۋ تاريحىمەن تانىستىرۋ, وتكەنگە قۇرمەت, كەلەشەككە سەنىم ۇيالاتۋ, پاتريوتتىق سەزىمدى ۇشتاپ, وتانعا سۇيىسپەنشىلىك ۇعىمىن كەڭ اۋقىمدا پايىمداۋ تاقىرىبى ەلدىككە باستايتىن ەرەكشە مەرەكەنىڭ مانىمەن جان-جاقتى ۇيلەسىمىن تاپتى.
مەرەكەلىك ءىس-شارانى قازاقستان رەسپۋبليكاسى ىشكى اسكەرلەرى 804-پولكىنىڭ ءبىرىنشى كومانديرى, پولكوۆنيك سويۋزجول جۇمانوۆ جانە قازاقستان رەسپۋبليكاسى مەملەكەتتىك ورتالىق مۋزەيىنىڭ ديرەكتورى راشيدا ەرىمقىزى اشىپ, جاس ساربازداردى رەسپۋبليكا كۇنىمەن قۇتتىقتاپ, وتان قورعاۋدىڭ, اتا-بابا ەرلىگىنىڭ جىلناماسى تاريحي جادىگەرلەر كومبەسى بولىپ وتىرعان مۋزەيلەردە جازۋلى ەكەنىن اتاپ ءوتتى.
مۋزەيگە كەلگەندەردىڭ نازارىنا قازاقستان رەسپۋبليكاسى ۇلتتىق ۇلاننىڭ «جاۋىنگەرلىك جانۇياداي ۇيىسقان, ۇلتتىق ۇلان – ەلى مەن حالقىنا قورعان» كورمەسى ۇسىنىلدى. كورمەگە اسكەري-جاۋىنگەرلىك مازمۇنداعى فوتوسۋرەتتەر, كىتاپتار, مەملەكەتتىك ماراپاتتار قويىلدى.
ءىس-شارا بارىسىندا ق.ساتباەۆ اتىنداعى №56 گيمنازيا, ماحاتما گاندي اتىنداعى №92 مامانداندىرىلعان ليتسەيدىڭ وقۋشىلارى «قازاقستان – ماقتانىشىم» ءانىن ورىنداپ, ء«بىزدىڭ وتانىمىز – قازاقستان» تاقىرىبىندا مانەرلەپ ولەڭ وقۋدان ونەر كورسەتتى. ورال تاڭسىقباەۆ اتىنداعى رەسپۋبليكالىق ساندىك-قولدانبالى ونەر كوللەدجى ءداستۇرلى قولونەر تۋىندىلارى, «تۆوريم ۆمەستە» كەسكىندەمە مەكتەبى مەن «Giraffe art school» قوسىمشا ءبىلىم بەرۋ ورتالىعىنىڭ ماماندارى ساندىك-قولدانبالى ونەر بويىنشا شەبەرلىك ساباقتارىن وتكىزدى. وسىنىڭ ءبارىن اسقاق كوڭىل كۇيمەن تاماشالاعان مەيماندار مەرەكەلىك ءىس-شارانى مۋزەي كينوتەاترىندا كورسەتىلگەن «كوشپەندى», ء«بىز وسىندا تۇرامىز» فيلمدەرىمەن تۇيىندەدى.
الماتى
