سەناتور ءبىزدىڭ ەلدەرىمىز اراسىندا جوعارى دەڭگەيدە سەنىمدى ديالوگ قالىپتاسقانى, ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى دامىتۋعا قولايلى جاعداي جاسالعانى تۋرالى ديپلوماتقا ايتىپ بەردى. سوڭعى جىلدارى قازاقستانعا سلوۆاكيانىڭ پرەمەر-ءمينيسترى مەن پارلامەنت توراعاسى, سىرتقى ىستەر جانە ەكونوميكا مينيسترلەرى كەلگەن بولاتىن. وسىنىڭ ءبارى ەكىجاقتى ىنتىماقتاستىقتى نىعايتۋعا جانە ارتتىرۋعا دەگەن ءوزارا ۇمتىلىستىڭ كورىنىسى بولىپ وتىر.
«ەۋروپالىق وداقپەن ستراتەگيالىق ارىپتەستىك تۇرعىسىندا سلوۆاكيامەن ەكىجاقتى ىنتىماقتاستىقتى دامىتۋ ءبىز ءۇشىن ماڭىزدى. ءبىزدىڭ ەلىمىز «جاسىل» ەكونوميكاعا كوشۋ, ساۋدا جانە ينۆەستيتسيا, ەنەرگەتيكا, اۋىل شارۋاشىلىعى, كولىك جانە لوگيستيكا, كليماتتىڭ وزگەرۋىنە قارسى كۇرەس, ءبىلىم بەرۋ, عىلىم جانە ت.ب. سياقتى باسىم باعىتتارعا نازار اۋدارا وتىرىپ, قازاقستان مەن ەو اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى ىسكە اسىرۋدا قارقىندى جۇمىس ىستەپ كەلەدى», دەپ اتاپ ءوتتى دەپۋتات.
مۇحتار قۇل-مۇحاممەد ەلشىمەن پارلامەنتارالىق بايلانىستاردى كەڭەيتۋدىڭ ماڭىزى مەن قازاقستاننىڭ ينۆەستورلاردى تارتۋعا مۇددەلى ەكەنىن جانە ەنەرگەتيكالىق قاۋىپسىزدىك ماسەلەلەرىن تالقىلادى.
سلوۆاكيا رەسپۋبليكاسىنىڭ ەلشىسى ءوز كەزەگىندە ەكى ەلدىڭ ىنتىماقتاستىعىن ودان ءارى نىعايتۋدىڭ ماڭىزى تۋرالى ايتا كەلىپ, مەملەكەتتەرىمىز اراسىنداعى ديپلوماتيالىق قاتىناستار ورناعان ساتتەن باستاپ 28 جىلدان استام ۋاقىت ىشىندە قازاقستان ءوزىن سەنىمدى ساياسي جانە ەكونوميكالىق ارىپتەس رەتىندە كورسەتكەنىن جەتكىزدى.
