مەملەكەتارالىق قاتىناستار جالپى كۇش-جىگەرمەن جوعارى دەڭگەيگە كوتەرىلدى. تۇراقتى ساياسي ديالوگ ساقتالىپ, دەلەگاتسيالار الماسۋ جۇزەگە اسىرىلدى, قۇقىقتىق بازانىڭ بەرىك ىرگەتاسى قالاندى. پارلامەنتارالىق جانە وڭىرارالىق ىنتىماقتاستىق, ىسكەرلىك جانە مادەني-گۋمانيتارلىق بايلانىستار دامىپ كەلەدى.
ماسەلەن, قازاقستان مەن حورۆاتيا ءوزارا سىيلاستىق قاعيداتى نەگىزىندە ەكى ەلدىڭ الەمدىك ارەناداعى ىنتىماقتاستىعىن نىعايتۋدى قولدايدى. بۇۇ, ەقىۇ جانە باسقا دا حالىقارالىق ۇيىمدار شەڭبەرىندە حالىقارالىق قاۋىپسىزدىك, حالىقارالىق تەرروريزمگە قارسى كۇرەس, ۇيىمداسقان قىلمىس, ەسىرتكى قۇرالدارىنىڭ زاڭسىز اينالىمى, زاڭسىز كوشى-قون جانە باسقا دا ترانسۇلتتىق سىن-قاتەرلەر ماسەلەلەرى بويىنشا تىعىز قارىم-قاتىناس ورناعان.
مادەني بايلانىستاردى دامىتۋمەن قاتار, قازاقستان مەن حورۆاتيا اراسىنداعى جان-جاقتى ءوزارا ءىس-قيمىلدى نىعايتۋعا حورۆاتيا-قازاقستان دوستىعى قوعامى سالماقتى ۇلەس قوسىپ كەلەدى.
كەيىنگى جىلدارى قازاقستان مەن حورۆاتيا اراسىنداعى سىرتقى ساۋدا اينالىمى تۇراقتى ءوسۋ ۇردىسىنە يە. ستاتيستيكاعا سۇيەنسەك, 2021 جىلدىڭ قورىتىندىسى بويىنشا ءوزارا تاۋار اينالىمى 680,96 ملن دوللاردى قۇراعان. 2022 جىلدىڭ ءبىرىنشى جارتىجىلدىعىندا تاۋار اينالىمى 349 ملن دوللارعا جەتتى. ياعني بىلتىرعى كەزەڭمەن سالىستىرعاندا 82 پايىزعا وسكەن. قازاقستاندا قۇرىلىس, فارماتسەۆتيكا, IT, تاماق ونەركاسىبى جانە ساۋدا سالالارىندا جيىرمادان اسا حورۆات كومپانياسى تىركەلگەن. كولىك-لوگيستيكا, ونىڭ ىشىندە تەڭىز ينفراقۇرىلىمىن دامىتۋ, تۋريستىك جانە سپورت سالالارىندا ناقتى جوبالاردى ىسكە اسىرۋ جونىندە ۋاعدالاستىق بار.
سونداي-اق سلوۆەنيامەن ديپلوماتيالىق بايلانىس ورناعانىنا دا 30 جىل تولدى. وسى ۋاقىت ارالىعىندا ەكىجاقتى جانە كوپجاقتى فورماتتاعى سىندارلى قاتىناستار مەن ءوزارا ءتيىمدى ىنتىماقتاستىقتى نىعايتۋعا ىقپال ەتەتىن اسا جوعارى جانە جوعارى دەڭگەيدە سەنىمدى ديالوگ ورناتىلىپ, قولداۋ تاۋىپ كەلەدى.
ىنتىماقتاستىقتىڭ سەرپىندى باعىتتارىنىڭ ءبىرى – كوپجاقتى ءوزارا ارەكەتتەستىك. سلوۆەنيا قازاقستاننىڭ 2010 جىلى ەقىۇ-عا توراعالىعىن قولدادى. اتاپ ايتقاندا, سلوۆەنيا باسشىلىعى استانادا سامميت وتكىزۋگە, استانا قالاسىندا «ەكسپو-2017» حالىقارالىق كورمەسىن وتكىزۋگە ءوتىنىمنىڭ العاشقى جاقتاۋشىلارىنىڭ ءبىرى بولدى. قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە, 2022-2024 جىلدارى بۇۇ ادام قۇقىقتارى جونىندەگى كەڭەسىنە كانديداتۋراسىن قولدادى. ءوز كەزەگىندە قازاقستان 2021-2022 جىلدارعا ارنالعان ماگاتە باسقارۋشىلار كەڭەسىنە سلوۆەنياعا داۋىس بەردى.
ەكىجاقتى قاتىناستاردا پارلامەنتارالىق ءوزارا ءىس-قيمىل ەرەكشە ورىن الادى. قازاقستان مەن سلوۆەنيا پارلامەنتتەرىندە ساپارلار مەن تاقىرىپتىق ءىس-شارالار وتكىزۋ ارقىلى دەپۋتاتتار اراسىنداعى بايلانىستاردى كەڭەيتۋگە ىقپال ەتەتىن دوستىق پەن ىنتىماقتاستىق توپتارى جۇمىس ىستەيدى.
ەكىجاقتى ىنتىماقتاستىقتىڭ ماڭىزدى تەتىگى رەتىندە ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانى ايتا الامىز. 2014 جىلدان باستاپ قازاقستان مەن سلوۆەنيا كاسىپكەرلەرىنىڭ باستاماسىمەن ىسكەرلىك ىنتىماقتاستىقتى كەڭەيتۋ ماقساتىندا «قازاقستاندىق-سلوۆەن بيزنەس-كلۋبى» (KSBC) قۇرىلدى. ينۆەستيتسيا, كولىك جانە لوگيستيكا, اقپاراتتىق تەحنولوگيالار, تۋريزم, دەنساۋلىق ساقتاۋ, فارماتسەۆتيكا, ءبىلىم بەرۋ, سونداي-اق ەكىجاقتى قاتىناستاردىڭ شارتتىق-قۇقىقتىق بازاسىن كەڭەيتۋ سياقتى سالالارداعى ءوزارا ءىس-قيمىلدىڭ پەرسپەكتيۆالارى بەلگىلەندى.
قازىرگى تاڭدا ەلىمىزدە سلوۆەنيا كاپيتالىنىڭ قاتىسۋىمەن فارماتسەۆتيكا, جاڭارتىلاتىن ەنەرگيا كوزدەرى, ينجەنەريا, تەلەكوممۋنيكاتسيا سالالارىنداعى 19 كاسىپورىن تىركەلگەن.
بۇعان قوسا, ەكىنشى دۇنيەجۇزىلىك سوعىس كەزىندە فاشيزمگە قارسى كۇرەس ەكى ەلگە دە ورتاق. سلوۆەنيانىڭ تىرنوۆو قالاسىندا كەڭەس وداعى جاۋىنگەرلەرىنە ارنالعان مەموريال ورناتىلدى. وندا قازا تاپقان قازاقستاندىق ساربازداردىڭ ەسىمدەرى ەسكەرتكىش تاقتالاردا جازىلعان.
سونىمەن قاتار 2018 جىلى پوۆير اۋىلىندا يۋگوسلاۆيا پارتيزاندارىمەن بىرگە فاشيزمگە قارسى سوعىسىپ, بالقان تۇبەگىن ازات ەتۋ جولىندا قازا تاپقان قازاقستاندىق باتىر كاسسە سەبەرونى ەسكە الۋعا ارنالعان «جىراقتا جاتساڭ دا, وشپەس ەرلىگىڭ ەلىڭنىڭ جادىندا!» سوزدەرى بار مەموريالدىق تاقتاسىنىڭ سالتاناتتى اشىلۋ ءراسىمى وتكەنىن دە ايتا كەتكەن ءجون.
