قاتەرلى دەرتپەن كۇرەس

ءسۇت بەزى قاتەرلى ىسىگىنىڭ ەرتە ساتىسىندا ۋاقتىلى دياگنوز قويىلعان كەزدە پاتسيەنتتەردىڭ تولىق ەمدەلۋى 95 پايىزعا دەيىن جەتەدى. قازاقستاندا 10 جىلدان استام ۋاقىت بويى ءسۇت بەزى قاتەرلى ىسىگىن ەرتە انىقتاۋ بويىنشا ايەلدەرگە ارنالعان ۇلتتىق سكرينينگ جۇرگىزىلىپ كەلەدى. تەگىن سكرينينگتى تۇرعىلىقتى جەرى (تىركەلگەن جەرى) بويىنشا ەمحانالاردا 40-70 جاس ارالىعىنداعى ايەلدەرگە وتۋگە بولادى. 2021 جىلى ءسۇت بەزى قاتەرلى ىسىگىنىڭ سكرينينگى بو­يىنشا 787 619 ايەل تەكسەرىلدى (بۇل جوسپاردىڭ 85,5%-ىن قۇرادى). تەكسەرۋ قورىتىندىسى بويىنشا ءسۇت بەزى قاتەرلى ىسىگى 1 403 ايەلدە انىقتالدى.

ونكولوگتەر ايەلدەرگە گينەكولوگ پەن ماممولوگتەن كەمىندە جىلىنا ءبىر رەت تەكسەرىلۋ كەرەكتىگىن ەسكەرتەدى.

ء«سۇت بەزدەرىنىڭ قانداي وزگەرىستەرىنە نازار اۋدارۋ كەرەك؟ ءسۇت بەزىنىڭ مولشەرى مەن ءپىشىنىنىڭ وزگەرۋىنە, ەمىزىكتىڭ تارتىلۋىنا جانە ونىڭ باسقا جاققا وزگەرۋىنە, ەروزيا, قاقىرىق نەمەسە ەمىزىك قىرتىسى, ەمىزىكتەن سۇيىق اعۋى, ەمىزىكتىڭ سىرتقى ءتۇرىنىڭ وزگەرۋى, كەۋدەدە, قورشاعان تىندەردە نەمەسە قولتىق استى ايماعىندا ءىسىنۋ, قالىڭداۋ نەمەسە ىسىكتىڭ پايدا بولۋىنا, كەۋدەنىڭ ءبىر بولىگىندە, ءسۇت بەزىنىڭ اينالاسىندا نەمەسە قولتىق استى ايماقتا تۇراقتى اۋىرسىنۋدىڭ پايدا بولۋىنا نازار اۋدارۋ كەرەك», دەيدى سالا ماماندارى.

ءسۇت بەزى قاتەرلى ىسىگىمەن اۋىراتىن ناۋقاستاردى حيميوتەراپيا, ساۋلەلىك تەراپيا, راديكالدى حيرۋرگيالىق ارالاسۋ سياقتى مامانداندىرىلعان ەمدەۋمەن قاتار قازاقستاندا ايەلدەرگە رەكونسترۋكتيۆتى قالپىنا كەلتىرۋ (پلاستيكالىق) وپەراتسيالارى قولدانىلادى. بۇل ەمدەۋ ءادىسى كوسمەتيكالىق اقاۋدى جويا وتىرىپ, راديكالدى ەمدەۋدەن كەيىن بىردەن جەتىسپەيتىن ءسۇت بەزىن حيرۋرگيالىق مودەلدەۋدەن تۇرادى. ءسۇت بەزى قاتەرلى ىسىگىنىڭ رەكونسترۋكتيۆتى وپەراتسيالارى ايەلگە ءسۇت بەزىنىڭ ءپىشىنىن قالپىنا كەلتىرۋگە جانە ايتارلىقتاي پسيحولوگيالىق ديسكومفورتتان ارىلۋعا مۇمكىندىك بەرەدى. قازاقستانداعى بارلىق ونكولوگيالىق اۋرۋ­­دى ەمدەۋدى تمككك شەڭبەرىندە مەملەكەت تولى­عى­مەن قارجىلاندىرادى.