وزەكتى ماسەلەنى اباي وبلى-سىنىڭ اكىمدىگى نازارعا الىپ, الداعى ۋاقىتتا ءبىلىم ورداسى قالانىڭ جىلۋ جەلىسىنە قوسىلاتىن بولدى. بۇل تۋرالى اتالعان پەداگوگيكالىق كوللەدجدىڭ ديرەكتورى شاعانگۇل جاناەۆا حابارلادى.
جالپى, وقۋ ورنىنىڭ اكىمشىلىگى كوللەدجدىڭ جىلۋ قازاندىعىن ورتالىقتاندىرىلعان جىلۋ جۇيەسىنە قوسۋ ماسەلەسىن ون جەتى جىلدان استام ۋاقىت قالا اكىمشىلىگىنىڭ الدىندا كوتەرىپ كەلدى. بۇل شەشىمىن تاپپاعان, ابدەن «تيتىقتاتقان» ماسەلە ەدى. ورتالىقتا ورنالاسقان جىلۋ قازاندىعى قالانىڭ ەكولوگياسىنا, ۇلت ۇلىلارىنىڭ ءىزى قالعان تاريحي عيماراتتىڭ ساقتالۋىنا وراسان زور زيان كەلتىرىپ كەلەدى.
اباي وبلىسىنا نۇرلان ۇرانحاەۆ اكىم بولىپ تاعايىندالعاننان كەيىن قىزمەتىن قالاداعى تەحنيكالىق جانە كاسىپتىك ءبىلىم بەرۋ ۇيىمدارىنىڭ جۇمىسىمەن تانىسۋدى, ونىڭ ىشىندە 119 جىلدىق تاريحى بار اتالعان كوللەدجدەن باستادى. سول كەزدەسۋدە نۇرلان تەلمان ۇلى وقۋ ورنىنىڭ بارلىق شەشىمىن كۇتكەن ماسەلەسىن نازارعا الىپ, ورىندالۋىن باقىلاۋىنا الاتىنىن ايتقان بولاتىن.
«وبلىس اكىمى ۋادەسىنە بەرىك ەكەن. تىزىمدە تۇرعان وتىنىشتەرىمىز بىردەن شەشىلە باستادى. ريزا بولدىق. كوڭىلىمىزدە جۇرگەن, شەشىمىن كۇتكەن كوپ ماسەلە ورىندالىپ جاتىر. 1987 جىلى م.اۋەزوۆتىڭ 90 جىلدىعىندا سالىنعان عيماراتىمىزدا بار-جوعى 100-اق ورىندىق ءماجىلىس زالى, 400 ورىنعا ارنالعان كيىمىلگىشىمىز بار. قازىر وقۋ ورنىندا 1 500-دەي ستۋدەنت ءبىلىم الىپ جاتىر. اۋقىمدى مادەني شارالاردى وتكىزۋدە, التى اي قىستا ستۋدەنتتەردىڭ كيىمىن ورنالاستىرۋدا قاتتى قينالاتىنبىز», دەيدى ش.جاناەۆا.
وقۋ ورنىنىڭ باسشىسى ايتقانداي, كوللەدجدىڭ جىلۋ قازاندىعى قالانىڭ ورتالىقتاندىرىلعان جىلۋ جۇيەسىنە قوسىلعان جاعدايدا, ورنىنا ءماجىلىس زالى مەن كيىمىلگىش, باسقا دا قوسالقى قاجەتتى كابينەتتەر قامتىلعان ەكى قاباتتى زاماناۋي عيمارات سالىنادى.
«وسى جوبانىڭ دايىندالۋىنا ايرىقشا كوڭىل بولگەن اباي وبلىسىنىڭ اكىمى نۇرلان تەلمان ۇلىنا ريزاشىلىعىمىزدى بىلدىرەمىز. اكىمنىڭ ۇلىلاردىڭ ءبىلىم ۇياسى سانالاتىن كوللەدجدىڭ تاريحىنا قۇرمەتى – ەلىمىزدىڭ تاريحىنا قۇرمەتى! وبلىس بولىپ قۇرىلعاننان بەرى 3-4 ايدا قالادا قانشاما وزگەرىس بولىپ جاتىر. كوڭىلىمىز ءوسىپ ءجۇر! جولىمىز دا سايراپ, باعىمىز دا جايناپ, قالامىز شۋاقتى نۇرعا بولەنىپ كەلە جاتىر!», دەدى پەداگوگيكالىق كوللەدجدىڭ ديرەكتورى.
تاياۋدا مەملەكەت باسشىسى اباي وبلىسىنا جاساعان ساپارىندا اتالعان كوللەدجدىڭ جۇمىسىمەن تانىسىپ, وقۋ ورنىنىڭ تاريحى مەن جەتىستىكتەرىنە, ءبىلىم ورداسىنان ءبىلىم العان ۇلى تۇلعالاردىڭ ومىرىنە ارنالعان كورمەنى ارالاپ, وقىتۋشىلار ۇجىمى جانە ستۋدەنتتەرمەن پىكىر الماسقان بولاتىن.
«ۇستاز دەگەن – قاسيەتتى ماماندىق. ءبارىمىز ۇستازدى سىيلايمىز. سەبەبى ۇستاز – جوعارى دەڭگەيدەگى تۇلعا. بالالارعا لايىقتى ءبىلىم بەرىلىپ جاتىر. ءبىلىمسىز ادام قاۋقارسىز دەپ ايتۋعا بولادى. قاۋقارسىز ادام قازىرگى باسەكەگە تولى الەمدە قالاي ءومىر سۇرەدى؟ سوندىقتان جاس ماماندارعا مەن ريزامىن. وزدەرىڭىز سياقتى جاستاردى مەملەكەت تە ارقاشان قولدايدى», دەگەن ەدى ق.توقاەۆ.
سونداي-اق پرەزيدەنت ەلىمىزدە جاستارعا جاعداي جاساۋ ءۇشىن ءبىراز رەفورما جۇزەگە اسىرىلىپ جاتقانىن دا جەتكىزگەن-ءدى.
سەمەي
