بالالارعا بەيقام قارامايىق

جامانات حاباردى جاسىرىپ قالۋعا بولماس, جاقىندا  تالعار اۋدانىنا قاراستى جالعامىس اۋىلدىق ورتا مەكتەبىنىڭ 10-سىنىپ وقۋشىسى وزىنە قول جۇمساپ, ومىرمەن قوشتاستى. اۋىل ادامدارىن دۇرلىكتەرگەن جاعدايدى وبلىستىق ءبىلىم باسقارماسىنىڭ وكىلدەرى راستاعانىمەن, قىز بالانىڭ سۋيتسيد جاساۋ سەبەبىن سىرت كوزگە جاريا ەتپەدى. ال تۇرعىندار قايعىلى وقيعا مەكتەپ اۋماعىندا بولعان دەيدى.

– تالعار اۋدانىنىڭ جالعامىس اۋىلىندا مەكتەپ وقۋشىسى سۋيتسيد جاساعانى راستالدى. قايعىلى وقيعا ساباقتان تىس ۋاقىتتا بولعان. قايتىس بولعان وقۋشىنىڭ وتباسىنا قايعىرىپ كوڭىل ايتامىز. ءبىلىم باسقارماسى قاجەتتى كومەك كورسەتەدى. قازىرگى ۋاقىتتا قۇقىق قورعاۋ ورگاندارى تەرگەۋ شارالارىن جۇرگىزىپ جاتىر, – دەيدى وقيعاعا وراي اقپارات تاراتقان وبلىستىق ءبىلىم باسقارماسىنىڭ ءباسپاسوز قىزمەتى.

راسىمەن, الماتى وبلىسىنداعى جاسوسپى­رىمدەردىڭ جاعدايىنا الاڭداۋ­عا نەگىز بار سياقتى. ويتكەنى بالالاردىڭ وزىنە قول جۇمساۋ دەرەكتەرى كوبەيىپ وتىر. مىسالى, اي­ماقتا وتكەن التى ايدا 7 بالا ءوز-وزىنە قول جۇمساپ, ومىرىمەن قوشتاسقان بولاتىن. قىرشىننان قيىلعان جەتى جاس عۇمىردىڭ ەكەۋى ەڭبەكشىقازاق اۋدانىندا, ەكەۋى ۇيعىر اۋدانىندا تۇرعان بولسا, جامبىل, ىلە جانە قاراساي اۋداندارىندا ءبىر-ءبىر وقيعادان تىركەل­گەن ەكەن. ال وزىنە قول سالۋعا وقتالعان 11 بالا قۇتقارىلىپتى. ال تالعار اۋدانىندا بولعان وقيعانىڭ جاي-جاپسارىن تەرگەۋ انىقتاي جاتار.

جالپى, بالا ءولىمىنىڭ سانى ارتقانىن دا جاسىرۋعا بولماس. تاعى ءبىر قايعىلى وقيعا جاقىندا عانا ىلە اۋدانىنىڭ اششىبۇلاق اۋىلىنا قاراستى «جومارت» ساياجايىندا بولدى. بۇل رەتتە ءبىر وتباسىنىڭ 3 بالاسى گازعا ۋلانىپ قايتىس بولعان. وبلىستىق توتەنشە جاعداي قىزمەتى «جومارت» ساياجايىندا ءبىر وتباسىنىڭ گازدان ۋلانعانىن حابارلادى. وقيعا ورنىنان 52 جاستاعى ەر ادام مەن ونىڭ ءۇش ۇلى تابىلعان. جان تاپسىرعان بالالاردىڭ ۇلكەنى 13 جاستا, ەكەۋى 8 جاستا ەكەن.

وكىنىشكە قاراي, جول اپاتىنان زارداپ شەككەن بالا سانى دا ارتىپ وتىر. ەڭ اۋىرى, اپات سالدارىنان ءتىل تارتپاي كەتكەن بالالار دا بار. ايماقتا جىل باسىنان بەرى جاسوسپىرىمدەردىڭ قاتىسۋىمەن 207 جول اپاتى بولىپ, 9 بالا قازا بولعان كورىنەدى. تاعى 300 بالا ءارتۇرلى دەنە جاراقاتىن العان. كۇنى كەشە قاراساي اۋدانىندا 14 جاستاعى 2 وقۋشى موپەدپەن گاز قۇبى­رىنا سوعىلىپ, بىرەۋى قايتىس بولدى.

– الدىن الا مالىمەتتەر بويىنشا 14 جاستاعى ءجاسوسپىرىم موتوتسيكلدى  باسقارا الماي, گاز قۇبىرىنا سوعىل­عان. وقيعا ورنىندا كامەلەتكە تولما­عان جۇرگىزۋشى قازا تاۋىپ, ونىڭ سىنىپتاسى اۋرۋحاناعا جەتكىزىلدى, – دەپ حابارلايدى وبلىستىق پوليتسيا دەپارتامەنتىنىڭ ءباسپاسوز قىزمەتى.

الماتى وبلىسى