ۇكىمەتتە سۋ شارۋاشىلىعى ماسەلەلەرى تالقىلاندى

وندا سۋ رەسۋرستارىن باسقارۋ جۇيەسىن دامىتۋدىڭ 2023-2027 جىلدارعا ارنالعان تۇجىرىمداماسىنىڭ جوباسى جانە سۋ سالاسىن رەفورمالاۋ جونىندەگى رەسپۋبليكالىق كەڭەسكە دايىندىق بارىسى قارالدى.

ماسەلەن, 2023-2027 جىلدارعا ارنالعان تۇجىرىمداما جوباسىندا سۋ شارۋاشىلىعى ينفراقۇرىلىمى مەن تابيعي سۋ وبەكتىلەرىن قالپىنا كەلتىرۋ, سۋ ۇنەمدەۋدى ەكونوميكالىق ىنتالاندىرۋ, مونيتورينگ جۇيەسىن دامىتۋ, كادرلار دايارلاۋدى جاقسارتۋ جانە ت.ب. ءىس-شارالار كوزدەلگەن.

وتىرىس بارىسىندا الداعى رەسپۋبليكالىق كەڭەستە ەلدىڭ سۋ قاۋىپسىزدىگىن قامتاماسىز ەتۋ بويىنشا ۇسىنىستار پاكەتى قارالاتىنى اتاپ ءوتىلدى. اتاپ ايتقاندا, سۋ رەسۋرستارىن باسقارۋداعى عىلىمنىڭ ءرولىن ارتتىرۋ, سۋ زاڭناماسىن جەتىلدىرۋ جانە ۇلتتىق جوبالاردى ىسكە اسىرۋ قارالماق.

بۇل ماسەلەلەردى تالقىلاۋعا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, اۋىل شارۋاشىلىعى ۆيتسە-ءمينيسترى ابىلقايىر تامابەك, يندۋستريا جانە ينفراقۇرىلىمدىق دامۋ ۆيتسە-ءمينيسترى ەركەبۇلان داۋىلباەۆ, قىزىلوردا وبلىسى اكىمىنىڭ ءبىرىنشى ورىنباسارى سەرىك قوجانيازوۆ, حالىقارالىق ارالدى قۇتقارۋ قورىنىڭ وكىلى ءامىرحان كەنشىموۆ جانە ت.ب. قاتىستى.