«قازاقكونتسەرتتىڭ» شىعارماشىلىق ۇجىمى روزا تاجىبايقىزى ەرەكشە جاقسى كورگەن الماتى قالاسىنداعى بىرقاتار مادەنيەت ۇجىمدارىندا اۋقىمدى مەرەكەلىك شارالار وتكىزۋدى باستاپ كەتتى. فەستيۆال شىمىلدىعى 25 قىركۇيەكتە قۇرمانعازى اتىنداعى قازاق ۇلتتىق كونسەرۆاتورياسىنىڭ ەركەعالي راحماديەۆ اتىنداعى ۇلكەن كونتسەرت زالىندا ء«بىزدىڭ جارمەڭكە» اتتى ءداستۇرلى مۋزىكا كونتسەرتىمەن اشىلعان-تىن. كونتسەرتكە ۇلتتىق ونەر ورتالىعى مەن قۇرمانعازى اتىنداعى ۇلتتىق كونسەرۆاتوريانىڭ سوليستەرى مەن ۇجىمدارى, «استانا سازى» فولكلورلىق ءانسامبلى مەن «گۇلدەر» ءانسامبلىنىڭ جاڭا قۇرامى قاتىستى.
«قازاقكونتسەرت» انشىلەرى مەن ونەرپازدارى تامىز ايىندا ابايدىڭ تۋعان كۇنىنە ورايلاستىرا سەمەي قالاسىنان باستاپ, جاڭادان اشىلعان ۇلىتاۋ, الماتى وبلىستارىنا ساپارلاپ, كۋرچاتوۆ, قاراۋىل, جيدەباي-ءبورىلى, ريددەر, التاي, ۇلىتاۋ وبلىسىنىڭ جەزقازعان, ۇلىتاۋ, قاراجال, جەتىسۋ وبلىسىنىڭ تەكەلى وڭىرلەرىندە جانە كۇمىس كومەي ءانشىنىڭ تۋعان جەرى قىزىلوردا وبلىسىندا, ارال, قارماقشى, قازالى, بايقوڭىر ولكەسىندە ونەر كورسەتتى. مەكەمە مايتالماندارىنىڭ كوشپەلى كونتسەرت جاقىندا كەنتاۋ قالاسىندا, جامبىل وبلىسىندا جالعاسىن تابادى.
سونداي-اق اباي اتىنداعى قازاق ۇلتتىق وپەرا جانە بالەت تەاترىندا «كلاسسيكالىق مۋزىكا جاۋھارلارى» اتتى كلاسسيكالىق مۋزىكا كونتسەرتى ءساتتى ءوتتى. كونتسەرتتە ەڭ تانىمال كامەرالىق-اسپاپتىق انسامبلدەردىڭ ءبىرى «Forte Trio» مەملەكەتتىك تريوسى, قازاقستاننىڭ ەڭبەك سىڭىرگەن قايراتكەرلەرى ازامات جىلتىرگوزوۆ, بيبىگۇل جانۇزاق, مەدەت شوتاباەۆ, سالتانات احمەتوۆا, «دارىن» مەملەكەتتىك جاستار سىيلىعىنىڭ لاۋرەاتى ازات مالىك, حالىقارالىق جانە رەسپۋبليكالىق بايقاۋلاردىڭ لاۋرەاتى ايگەرىم التىنبەك ونەر كورسەتتى.
وسى جوبالاردىڭ جالعاسى ىسپەتتى «اlmaty Theatre» عيماراتىندا پيانيست ءالىم بەيسەمباەۆتىڭ مەملەكەتتىك اكادەميالىق سيمفونيالىق وركەسترىمەن بىرلەسكەن كونتسەرتى بولىپ ءوتتى. كونتسەرت باستالماس بۇرىن مەملەكەتتىك «قازاقكونتسەرت» ۇجىمىنىڭ ديرەكتورى اقتوتى رايىمقۇلوۆا, ديريجەر قانات وماروۆ جانە كەش قوناعى ءالىم بەيسەمباەۆ ءباسپاسوز ءماسليحاتىن وتكىزىپ, جاس ءپيانيستى جەتە تانىستىرىپ, شىعارماشىلىعى تۋرالى جان-جاقتى بايانداپ بەردى.
كەيىنگى جاس بۋىن تالانتتاردىڭ كوپشىلىگىنە ءتان ءومىربايان دەرەگى: قازاقستاندا تۋعان, زياتكەرلىك مەكتەپتەردىڭ بىرىندە ءبىلىم العان, شەتەلدە شىڭدالعان. قاعازداعى ومىردەرەك قىسقا ءارى نۇسقا سويلەگەنىمەن, ەڭبەكپەن عانا قول جەتەتىن جەتىستىكتىڭ وڭاي ورىلمەيتىنى بەلگىلى. الەمگە اتى ءماشھۇر پيانيست ءالىم بەيسەمباەۆتىڭ دا شىعارماشىلىق جەتىستىگى شامامەن وسىلاي تارقاتىلادى: الماتىدا تۋعان, 5 جاسىنان كۇيساندىقتان ساز ساۋلاتىپ, ءبىلىمىن جەتىلدىرۋ ءۇشىن رەسەيگە اتتانعان, ءارى قاراي لوندونداعى كورولدىك كوللەدجىنىڭ ستۋدەنتى. 2008 جىلى الەمدەگى ەڭ مىقتى مۋزىكالىق مەكتەپتەردىڭ ءبىرى سانالاتىن ماسكەۋدەگى ورتالىق مۋزىكالىق مەكتەپكە قابىلدانعاندا, ءالىم وڭ-سولىن تانىپ ۇلگەرمەگەن ون جاستاعى ويىن بالاسى ەدى. وسى جىلى حالىقارالىق «ششەلكۋنچيك» تەلەۆيزيالىق بايقاۋىندا جەڭىمپاز اتانىپ, ون ەكى جاسىندا بەلگىلى سيمفونيالىق وركەسترلەرمەن, ايگىلى ديريجەرلەرمەن جۇمىس ىستەۋ تاجىريبەسى قالىپتاسىپ ۇلگەردى. پ.چايكوۆسكي اتىنداعى ماسكەۋ مەملەكەتتىك كونسەرۆاتورياسى جانىنداعى ورتالىق مۋزىكالىق ۋچيليششەسى الىمگە ۇشان تەڭىز ءبىلىم بەرىپ قانا قويماي, مۋزىكالىق مادەنيەت, ەستەتيكالىق جان-جاقتى ءىلىم, رۋحاني تەرەڭدىك ءسىڭىردى. ال 2010 جىلى انگلياعا كوشىپ بارىپ, پەرسەلل جاس مۋزىكانتتار مەكتەبىنىڭ وقىتۋشىسى تەسسا نيكولساننان ءبىلىم الادى. ءالىم 25-كە ەندى عانا اياق باستى. ال ول بولسا ۆان كلايبەرن اتىنداعى جاس پيانيستەرگە ارنالعان ءى حالىقارالىق بايقاۋدىڭ جەڭىمپازى, ليست جانە ۆەيمار قالالارىنداعى حالىقارالىق جاسوسپىرىمدەر جانە مانچەستەردەگى پيانيستەر بايقاۋىنىڭ لاۋرەاتى اتانعان. ساۋساعىنان ساز تامشىلاعان تالانتتى پيانيست ۇلىبريتانيانىڭ ليدس قالاسىندا وتەتىن اسا بەدەلدى حالىقارالىق پيانيستەر بايقاۋىنىڭ تاريحىنداعى ءبىرىنشى سىيلىقتى جەڭىپ العان تۇڭعىش قازاقستاندىق-لاۋرەات, ۋوتەرمان التىن مەدالىنىڭ يەگەرى, Royal College of Music ماگيسترى.
بەس جاسىنان كۇيساندىقتا ويناپ, جيىرماعا جەتەر-جەتپەس جاسىندا داقپىرتى جەر جارعان دۋالى اۋىز بىلگىرلەر تاراپىنان «الەم كلاسسيكالىق مۋزىكاسىنىڭ قۇبىلىسى» دەپ باعالانعان جاس دارىن ءا.بەيسەمباەۆتىڭ بۇل كۇنى ءار كونتسەرتى جىل بۇرىن جوسپارلانىپ, ءار ساپارى مينۋتىنا دەيىن ەسەپتەلىپ, الدىن-الا كەلىسىلەدى. ءالىم تانىمال مۋزىكانتتارمەن ىنتىماقتاسا جۇمىس ىستەپ كەلەدى جانە لوندوننىڭ كامەرالىق انسامبلدەرىنىڭ قۇرامىندا كونتسەرتتەرگە ءجيى شىعادى. ەرتە تانىلعان ەرەكشە تالانت يەسى ۋاقىتىنىڭ تىعىزدىعىنا قاراماستان روزا باعلانوۆا اتىنداعى قازاقكونتسەرت مەملەكەتتتىك فيلارمونياسىنىڭ ۇسىنىسىن قابىل الىپ, وڭتۇستىك كورەياداعى كونتسەرتىنەن كەيىن «الماتىداعى التىن كۇز قازاقكونتسەرتپەن بىرگە» اتتى ونەر فەستيۆالىنە تىكەلەي ۇشىپ كەلگەن ەكەن. اقتوتى راحمەتوللاقىزى دۇنيەجۇزىلىك دەڭگەيدە جارق ەتىپ تانىلعان جاڭا ەسىمنىڭ قولداۋعا دايار ءوز تاۋەلسىز ەلى بار ەكەنىن جانە قازاقستانعا كەرەك ەكەنىن ءبىلدىرىپ, ءار شىعارماشىلىق جەتىستىگىن باعالاپ, رۋحاني دەمەۋ بولىپ وتىرۋ ءۇشىن ءالىمدى «قازاقكونتسەرتتىڭ» ءسوليسى بولۋعا شاقىرىپ, ۇسىنىس بىلدىرگەنىن جەتكىزدى. قوعاممەن قارىم-قاتىناسىن اعىلشىن تىلىندە اتقارىپ جۇرگەن ازامات التىن قازىعى, ءتۇپ-تامىرى قازاق توپىراعىنا بايلاۋلى ەكەنىن ءبىر ءسات ەسىنەن شىعارمايتىندىقتان, بۇل ۇسىنىسقا قۋانا كەلىسىمىن بەرگەن. كىشكەنتاي كۇنىنەن تۋعان جەرىنەن جىراقتا جۇرگەن جاس پيانيست ءاردايىم الماتىنى كورگەنشە اسىق. سەبەبى بۇل قالادا ونىڭ اجەسى, اتا-اناسى, باۋىرلارى تۇرادى. بۇل – ءا.بەيسەمباەۆتىڭ قازاقستانداعى العاشقى جەكە كونتسەرتى. ءالىمنىڭ كونتسەرتى كسرو حالىق ءارتىسى ەركەعالي راحماديەۆتىڭ «قۇداشا-دۋمان» سيمفونيالىق شىعارماسىمەن باستالدى. قانات وماروۆتىڭ ديريجەرلىگىمەن قازاق مەملەكەتتىك سيمفونيالىق وركەسترىمەن بىرگە ءا.بەيسەمباەۆ بەتحوۆەننىڭ «№3 سيمفونياسىن», س.راحمانينوۆتىڭ «پاگانيني تاقىرىبىنا راپسوديا» اتتى شىعارماسىن ورىندادى.
مۋزىكاعا ماحابباتى بالا كۇنىنەن ءبۇر جارىپ, بۇگىندە شەبەرلىكتىڭ شىڭىنا شىعىپ, شارتاراپتىڭ الدىندا قازاقستاننىڭ اتىن اسقاقتاتىپ جۇرگەن ءالىم بەيسەمباەۆتىڭ كلاسسيكالىق مۋزىكاداعى قادامى ەرتە باستالعانىمەن, قاناتىن كەرىپ, زەڭگىر كوكتە باۋىرىن جازىپ ۇشقانى وسى كەزەڭ. ءالىم الەمدىك دەڭگەيدەگى وسى زاماننىڭ ەڭ وزىق ون ءپيانيسىنىڭ قاتارىنان نىق ورنىن العان. ماڭداي تەرمەن جەتكەن ايتۋلى جەڭىس پەن جەتىستىكتىڭ ءبارى جاس تالانتتى كەمەل جولعا ەندى باستاپ كەلەدى.
الماتى
