كەڭەستە مەملەكەت باسشىسىنىڭ كاسىپكەرلىك قىزمەتتى «تازا پاراقتان باستاپ» رەتتەۋدى ەنگىزۋ, سونداي-اق مەملەكەتتىك باقىلاۋ جانە قاداعالاۋ جۇيەسىن اۆتوماتتاندىرۋ جونىندەگى تاپسىرمالارىن ورىنداۋ بارىسى تالقىلاندى.
ماسەلەن, بۇگىنگى تاڭدا ءبىرىنشى كەزەڭ اياسىندا قىزمەتتىڭ 17 سالاسىندا رەتتەۋشى اكتىلەردى تالداۋ اياقتالدى. ەندى بيزنەسكە قويىلاتىن نەگىزسىز تالاپتاردى جويۋ ءۇشىن مەملەكەتتىك ورگاندار زاڭعا تاۋەلدى (2022 جىلدىڭ سوڭىنا دەيىن) جانە زاڭنامالىق (2023 جىلدىڭ ناۋرىزىنا دەيىن) اكتىلەرگە وزگەرىستەر ەنگىزەتىن بولادى.
ودان بولەك, بەكىتىلگەن جوسپار-كەستەنى ىسكە اسىرۋدىڭ ەكىنشى كەزەڭى اياسىندا بيىلعى جەلتوقسانعا دەيىن كاسىپكەرلىك قىزمەتتىڭ تاعى 11 سالاسىندا رەتتەۋشى اكتىلەرگە تالداۋ جۇرگىزىلەدى.
كەڭەس قورىتىندىسى بويىنشا ەرۇلان جاماۋباەۆ تاۋەكەل دارەجەسىن باعالاۋ كريتەريلەرىن جانە سالالىق تاۋەكەلدەر ماتريتساسىن قالىپتاستىرۋدى قوسا العاندا, بارلىق جۇمىستاردى بەلگىلەنگەن مەرزىمدە اياقتاۋدى تاپسىردى.
