«كەزدەسۋدە جالاقى تولەۋ جۇيەسى, وقۋدا ارتتا قالعان بالالارمەن جۇمىس, «جايلى مەكتەپ» ۇلتتىق جوباسىن جۇزەگە اسىرۋ, قاۋىپسىزدىكتى قامتاماسىز ەتۋ, مەكتەپ پسيحولوگتارىنىڭ جۇمىسى, مۇعالىمدەردىڭ اتتەستاتسيادان ءوتۋ ەرەجەلەرى, اتا-انالارمەن جۇمىستى نىعايتۋ, پەداگوگتەردى قايتا دايارلاۋ مۇمكىندىكتەرى, جاڭا مجمبس جانە ت.ب. سياقتى ماسەلەلەر تالقىلاندى. مەكتەپ باسشىلارى وزدەرىن قىزىقتىرعان سۇراقتارىن قويىپ, ۇسىنىستارىن ايتتى», دەپ جازدى مينيستر.
سونىمەن قاتار كوللەدج ديرەكتورلارى مەن مەكتەپكە دەيىنگى ءبىلىم بەرۋ ۇيىمدارى باسشىلارىمەن دە كەزدەسىپ, ولاردىڭ سۇراقتارىنا جاۋاپ بەرىپ, ۇسىنىستارىن تىڭدادى.
«ارىپتەستەرىممەن دۋالدى وقىتۋدى دامىتۋ, تالىمگەرلىك قىزمەتكە اقى تولەۋ, جان باسىنا شاققانداعى قارجىلاندىرۋ, «جاس مامان» جوباسىن جۇزەگە اسىرۋ, ينكليۋزيۆتى ءبىلىم بەرۋدى دامىتۋ, سونداي-اق تجكب جانە بالاباقشالارداعى تاماقتانۋ ماسەلەلەرى بويىنشا نورماتيۆتىك قۇقىقتىق اكتىلەرگە قاجەتتى وزگەرىستەر ەنگىزۋ ماسەلەلەرىن تالقىلادىق. سونىمەن بىرگە مەكتەپكە دەيىنگى ۇيىمداردا پەداگوگ-اسسيستەنت لاۋازىمىن ەنگىزۋ ماسەلەسى دە نازاردان تىس قالعان جوق. كوللەدج ديرەكتورلارىنىڭ نەگىزگى ماسەلەسى تجكب-دا وقۋ ءۇشىن جان باسىنا شاققانداعى قارجىلاندىرۋ نورماتيۆىنە قاتىستى بولدى. بۇل ستاندارت شىن مانىندە قايتا قاراۋدى قاجەت ەتەدى. وسى ماسەلەنى شەشۋ ماقساتىندا مەملەكەتتىك ورگاندارمەن بەلسەندى جۇمىس ىستەپ جاتىرمىز.
ارىپتەستەرىمە قىزىقتى جانە مازمۇندى پىكىرتالاس ءۇشىن العىس ايتقىم كەلەدى. ايتىلعان ۇسىنىستار كەزەڭ-كەزەڭىمەن جۇزەگە اسىرىلادى», دەپ تۇيىندەدى ا.ايماعامبەتوۆ.
