ءجۇزۋ جارىسىنا قاتىسقان اقتاۋ قالاسىنىڭ تۇرعىنى قۇرال جولامان 30 قىركۇيەكتە يسپانيادان ماروككوعا دەيىنگى 16,7 شاقىرىمدى ءجۇزىپ ءوتتى. قۇرالدىڭ سۋداعى ساپارى افريكا جاعالاۋلارىنا قاراي ەۋروپانىڭ وڭتۇستىكتەگى شەتكى نۇكتەسى تاريفادان باستالدى.
يسپانيانىڭ تاريفاسىنان ماروككونىڭ پۋنتا-سيرەسكە نۇكتەسىنە دەيىنگى ەڭ قىسقا قاشىقتىق – 14,4 شاقىرىم, بىراق اعىستىڭ قاتتى بولۋى سالدارىنان جول ۇزارىپ, جۇزۋشىلەر 16-22 شاقىرىم قاشىقتىقتى باعىندىرادى.
گيبرالتار بۇعازى – اتلانت مۇحيتىن جەرورتا تەڭىزىمەن بايلانىستىراتىن ەۋروپا مەن افريكا قۇرلىعى اراسىنداعى بۇعاز. قۇرال جولامان گيبرالتار بۇعازىن سۋ كيىمىنسىز 5 ساعات 58 مينۋتتا ءجۇزىپ وتكەن.
– قۇرال بۇعان دەيىن ىستانبۇلدا قۇرلىقارالىق جۇزۋگە قاتىسقان. ول بوسفور بۇعازىن ءجۇزىپ ءوتىپ, 6,5 شاقىرىمدى باعىندىردى. كاسپي تەڭىزىندە گيبرالتار بۇعازى ارقىلى جۇزۋگە دايىندالدى. گيبرالتاردان ءوتۋ وڭاي ەمەس, جەل قاتتى, تولقىن كۇشتى جانە سۋى سۋىق. قۇرال – 740 ءجۇزۋشىنىڭ ىشىنەن گيبرالتاردى سۋ كيىمىنسىز كەسىپ وتكەن ءبىرىنشى قازاق. الداعى ۋاقىتتا ۇلىمنىڭ بۇكىل مۇحيتتى باعىندىرۋ جوسپارى بار, – دەيدى ەكسترەمال سپورتشىنىڭ اكەسى تولىباي تالاسباەۆ.
ماڭعىستاۋ وبلىسى
