ءىس-شارادا ازاماتتىق قوعام ينستيتۋتتارىنىڭ ءرولىن نىعايتۋ ماسەلەلەرى تالقىلاندى. دوڭگەلەك ۇستەل جۇمىسىن قازاقستاننىڭ ازاماتتىق اليانسى ۇيىمداستىردى. جيىن بارىسىندا ءسوز سويلەگەن اقپارات جانە قوعامدىق دامۋ ءمينيسترى د.قىدىرالى ازاماتتىق قوعام ينستيتۋتتارىنىڭ قوعامداعى رولىنە ەرەكشە توقتالدى.
«وزدەرىڭىزگە ءمالىم, مەملەكەت باسشىسى قازاقستان حالقىنا جولداۋىندا ەلدەگى قوعامدىق-ساياسي رەفورمالاردىڭ جاڭا باعىتىن جاريالادى. مىقتى مەملەكەت ورناتۋ ءۇشىن مىقتى ازاماتتىق قوعام ورناۋى كەرەك. ەلىمىزدە سونداي-اق ۇكىمەتتىك ەمەس ۇيىمدارعا ەرەكشە ءمان بەرىلىپ جاتىر. وسى ورايدا, زاڭنامالىق تۇرعىدا ازاماتتىق قوعامعا سەرپىن بەرەتىن قادام جاسالدى دەپ ەسەپتەيمىز.
سوندىقتان اقپارات جانە قوعامدىق دامۋ مينيسترلىگى دە بۇل باعىتتا اۋقىمدى شارۋا اتقارىپ جاتىر. ونىڭ ءبىرىنشىسى زاڭناماعا قاتىستى. قازىرگى تاڭدا بىرنەشە زاڭ جوباسى قارالىپ جاتىر. ازاماتتىق قوعام وكىلدەرىمەن بىرلەسىپ قۇجاتتى جەتىلدىرەمىز», دەدى د.قىدىرالى.
وسى ورايدا, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قوعامدىق بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تۇجىرىمداماسىنىڭ جوباسى ماقۇلدانعانىن ايتا كەتكەن ءجون. وعان قوسا, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۆولونتەرلىك قىزمەت, قايىرىمدىلىق, مەملەكەتتىك الەۋمەتتىك تاپسىرىس جانە ۇكىمەتتىك ەمەس ۇيىمدارعا ارنالعان گرانتتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قابىلداندى.
«زاڭنامانى جەتىلدىرۋ شەڭبەرىندە, ۇكىمەتتىك ەمەس ۇيىمداردى گرانتتىق قارجىلاندىرۋ جۇيەسى قايتا جاسالدى. ەلدەگى ۇكىمەتتىك ەمەس سەكتوردى دامىتۋدىڭ جاڭا ۆەكتورىن قامتيتىن ازاماتتىق قوعامدى دامىتۋدىڭ 2020-2030 جىلدارعا ارنالعان تۇجىرىمداماسى – باستى ستراتەگيالىق قۇجات قابىلدانعان. سونىڭ اياسىندا بىرقاتار اۋقىمدى جوبا جۇزەگە اسىرىلىپ جاتىر. سول ءىس-شارالاردىڭ بەل ورتاسىندا ازاماتتىق اليانس ەلگە تانىمال ازاماتتاردىڭ باسىن قوسىپ ءجۇر», دەدى د.قىدىرالى.
ۆەدومستۆو باسشىسى قازاقستاننىڭ ازاماتتىق اليانسى قوعامدىق باستامالاردى ءتيىمدى ۇيلەستىرىپ جۇرگەنىنە نازار اۋداردى. سونداي-اق مينيسترلىكتىڭ بۇل باعىتتاعى جۇمىستارعا قولداۋ كورسەتۋگە ءازىر ەكەنىن جەتكىزدى.
قازاقستاننىڭ ازاماتتىق اليانسىنىڭ پرەزيدەنتى بانۋ نۇرعازيەۆا اتاپ وتكەندەي, بۇگىندە قازاقستان الدىندا تۇرعان مىندەتتەر مەملەكەت پەن ۇكىمەتتىك ەمەس ۇيىمداردىڭ ءوزارا ءىس-قيمىلىن كۇشەيتۋدى, ازاماتتىق قوعام ينستيتۋتتارىن جۇيەلى تۇردە قايتا جۇكتەۋدى تالاپ ەتەدى. رەفورمالاردى دايىنداۋ مەن ىسكە اسىرۋعا قوعامدىق ۇيىمدار مەن بەلسەندىلەردى نەعۇرلىم كەڭ تارتۋ قاجەت.
«مەملەكەت باسشىسى اشقان جانە قوعام قولداعان ەل تاريحىنىڭ جاڭا بەتى – جاڭا قازاقستان, ەكىنشى رەسپۋبليكا جاڭارتىلعان ازاماتتىق قوعامدى دا تالاپ ەتەدى. باسقارۋشىلىق شەشىمدەر قابىلداۋعا اركىمنىڭ بارىنشا تارتىلۋىن قامتاماسىز ەتۋ قاجەت, قازاقستاندىقتار ەل ءۇشىن ءوز جاۋاپكەرشىلىك دارەجەسىن ءتۇسىنۋى ءتيىس. بىراق بۇل ازاماتتاردىڭ ءبىلىم جانە مادەني دەڭگەيىن ارتتىرۋ قاجەت», دەدى ب.نۇرعازيەۆا.
ءىس-شارا اياسىندا ىنتىماقتاستىق تۋرالى بىرنەشە مەموراندۋمعا قول قويىلدى. دوڭگەلەك ۇستەل بارىسىندا ادام قۇقىقتارى جونىندەگى ۋاكىل ەلۆيرا ءازىموۆا, سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى دميتري مالاحوۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ باسقارما توراعاسى-رەكتور ەرلان سىدىقوۆ, «قازاقستان حالقىنا» قق باسقارما توراعاسى بولات جامىشەۆ پىكىرىن ورتاعا سالدى.
ءىس-شارا قازاقستان رەسپۋبليكاسى اقپارات جانە قوعامدىق دامۋ مينيسترلىگىنىڭ قولداۋىمەن «ازاماتتىق باستامالاردى قولداۋ ورتالىعى» كەاق-نىڭ «ۇكىمەتتىك ەمەس ۇيىمداردى قولداۋعا ارنالعان رەسپۋبليكالىق ازاماتتىق ورتالىق» گرانتتىق جوباسى شەڭبەرىندە ءوتتى.
