قازىر قور توبى ەلىمىزدەگى ەڭ ءىرى جۇمىس بەرۋشى سانالادى. ياعني «سامۇرىق-قازىنا» كومپانيالارىندا 250 مىڭنان استام ادام جۇمىس ىستەيدى. ولاردىڭ 92%-ى – وندىرىستىك سەكتور جۇمىسشىلارى. اتاپ ايتقاندا ەنەرگەتيكتەر, مۇنايشىلار, پوشتا قىزمەتكەرلەرى, تەمىرجولشىلار, مەتاللۋرگتەر, اتوم سالاسىنىڭ ماماندارى, بايلانىسشىلار جانە باسقالار.
قور جاڭا كادرلىق ساياساتتى جۇزەگە اسىرۋعا كىرىستى. ع.اۋعانوۆتىڭ ايتۋىنشا, نەگىزگى قاعيدالار – اشىقتىق پەن تيىمدىلىك. بۇل رەتتە Samruk Qyzmet اتالاتىن رەكرۋتينگتىڭ بىرىڭعاي ونلاين پلاتفورماسى ەنگىزىلدى. مىندەت – ۇمىتكەرلەردى ىرىكتەۋدە, ياعني تۇيىندەمە جولداعان ساتتەن باستاپ, جۇمىس تۋرالى كەلىسىمشارت جاساعانعا دەيىنگى پروتسەستى تولىق اۆتوماتتاندىرۋ. Samruk Qyzmet جۇيەسىندە 480-نەن استام كومپانيا جانە 123 مىڭ ۇمىتكەر تىركەلگەن. پلاتفورمادا 2019 جىلدان بەرى 20 مىڭنان استام بوس جۇمىس ورنى جاريالانسا, بيىل جاريالانعان بوس ورىندار سانى 11 مىڭنان استام. 7 مىڭنان استام ادام جۇمىسقا ورنالاستى. پرەزيدەنتتىڭ كادرلىق رەزەرۆىنە قاتىسۋشىلارعا جەكە بلوك ازىرلەندى. قوردىڭ كادرلىق ساياساتىنىڭ ەڭ كوپ تالقىلانعان جاڭاشىلىعى – ۇمىتكەرلەردى ىرىكتەۋ پروتسەسىندە جاڭا ءتاسىل قولدانۋ. ءبىرىنشى باسشى, باسقارۋشى ديرەكتور جانە قۇرىلىمدىق بولىمشە باسشىلارى لاۋازىمدارىنا ۇمىتكەرلەردىڭ ءبارى قور كومپانيالارىنىڭ لاۋازىمدى تۇلعالارىنا قاتىسى بارى-جوعىن, كوماندالىق اۋىس-ءتۇيىس, كوررۋپتسيالىق جانە رەپۋتاتسيالىق تاۋەكەلدەردى انىقتاۋ ءۇشىن كومپلاەنس-تەكسەرۋدەن وتەدى. ساتىپ الۋ سالاسىنداعى باسشىلىق لاۋازىمدارعا ۇمىتكەرلەر ءۇشىن 25 ناۋرىزدان باستاپ پروفايلينگ نەمەسە «وتىرىكتى انىقتاۋ» دەتەكتورىن قولدانا وتىرىپ, پوليگراف ارقىلى قوسىمشا تەكسەرۋ ەنگىزىلدى. زەرتتەۋدى قازاقستان پوليگرافولوگتار قاۋىمداستىعىنىڭ ماماندارى جۇرگىزەدى. قازىر قور توبىنداعى 38 كومپانياداعى 96 ۇمىتكەر پوليگرافتان ءوتتى, 18 ۇمىتكەر بۇل سىناقتان وتپەي قالدى. اتالعان پروتسەستەرگە بىرىڭعاي وپەراتور – Samruk Business Academy ەنشىلەس ۇيىمى جەتەكشىلىك ەتەدى. Samruk Business Academy قور كومپانيالارى ءۇشىن قىزمەتكەرلەردى ىزدەۋ مەن ىرىكتەۋ پروتسەسىن ءبىر ورتالىقتان جۇزەگە اسىرادى. بۇل الەۋەتتى كانديداتتاردى ساپالى باعالاۋعا مۇمكىندىك بەرەدى.
«HR-پروتسەستەر تاقىرىبىن جالعاي كەلە, پرەزيدەنت تاپسىرماسى اياسىندا كومپانيالاردىڭ باسشىلىق ورگاندارىنداعى ايەلدەر ۇلەسىن كەزەڭ-كەزەڭىمەن ارتتىرۋ اياسىندا قازاقستان ايەلدەر كۇشى اليانسىمەن بىرگە «گەندەرلىك تەڭدىك» ءمودۋلدى وقىتۋ جوباسىن ىسكە قوستىق. جوبانىڭ ماقساتى – ايەلدەردىڭ باسقارۋشىلىق قابىلەتىن ارتتىرۋ جانە ولاردىڭ قور توبىنىڭ ديرەكتورلار كەڭەسى, باقىلاۋشىلار كەڭەسى جانە اتقارۋشى ورگاندارىنا قاتىسۋ ۇلەسىن 2023 جىلى 20%-عا دەيىن جانە 2030 جىلى 30%-عا دەيىن ارتتىرۋ», دەدى قوردىڭ باسقارۋشى ديرەكتورى.
بيىل باتىس وڭىرلەرىندەگى ەڭبەك ۇجىمدارىندا ورىن العان ەرەۋىلدەر تولقىنىنا كۋا بولدىق. جىل باسىنداعى وقيعالار توپتىڭ كاسىپورىندارىنداعى احۋالعا ايتارلىقتاي اسەر ەتتى. وندىرىستىك ۇجىمدارداعى الەۋمەتتىك احۋالدى جاقسارتۋ بويىنشا اۋقىمدى جۇمىس جۇرگىزىلىپ جاتىر. اكىمشىلىك-باسقارۋشىلىق پەن وندىرىستىك قىزمەتكەرلەردىڭ ەڭبەكاقىسىنداعى ايىرماشىلىقتى ازايتۋ, الەۋمەتتىك-ەڭبەك داۋلارى مەن جانجالداردى بولجاۋ جانە ولاردىڭ الدىن الۋ بويىنشا جۇمىس جالعاسىن تاپتى. توپ كاسىپورىندارىنداعى جاعدايعا 24/7 رەجىمىندە مونيتورينگ جۇرگىزەتىن كورپوراتيۆتىك سيتۋاتسيالىق ورتالىق قۇرىلدى. توقسان سايىن وندىرىستىك الاڭدارداعى الەۋمەتتىك تۇراقتىلىق دەڭگەيىن انىقتاۋ بويىنشا ساۋالداما جۇرگىزىلىپ, الدىن الۋ شارالارى جوسپارى جۇزەگە اسىرىلادى. الەۋمەتتىك-ەڭبەك قاتىناستارى ماسەلەلەرى بويىنشا تاۋلىك بويعى «نىسانا» بايلانىس ورتالىعى ىسكە قوسىلدى. جىل باسىنان بەرى بۇل ارقىلى 20 مىڭنان استام حابارلاما (رەلەۆانتتىسى – 622) قابىلداندى. ومبۋدسمەن جانە مەدياتسيا ينستيتۋتتارى جاساقتالدى. ەڭبەك داۋى تۋىنداعان جاعدايدا ماسەلەلەر مەدياتسيا تاسىلدەرىن قولدانۋ جانە كاسىپوداق ۇيىمدارىن تارتۋ ارقىلى قۇقىق اياسىندا شەشىلەدى. «مەدياتورلاردىڭ كورپوراتيۆتىك پۋلى» جوباسى اياسىندا بيىل قورجىندىق كومپانيالاردىڭ 102 جۇمىسشىسى وقۋدان ءوتتى. «كاسىپوداق بەلسەندىلەرىنىڭ مەكتەبى» جوباسى ىسكە قوسىلىپ, قوردىڭ ەنشىلەس ۇيىمدارى كاسىپوداقتارىنىڭ جۇزدەن استام وكىلى وقۋعا قاتىستى. وندىرىستىك قىزمەتكەرلەردىڭ 84%-دان استامى – كاسىپوداق مۇشەلەرى. ۇجىمدىق شارتتار اياسىندا جۇمىسشىلار مەن ولاردىڭ وتباسىلارىنىڭ مۇشەلەرى ءۇشىن الەۋمەتتىك جەڭىلدىكتەردىڭ 20-دان استام ءتۇرى قاراستىرىلعان.
«كورپوراتيۆتىك الەۋمەتتىك جاۋاپكەرشىلىك – قوردىڭ تۇراقتى دامۋ قاعيدالارىنىڭ ءبىرى. بۇل رەتتە Samruk-Kazyna Trust قايىرىمدىلىق قورىن قارجىلاندىرۋ ۇلەسى ارتىپ كەلەدى. 2021 جىلى ونىڭ بيۋدجەتى 7 ملرد تەڭگە بولسا, بيىل – 10 ملرد تەڭگە. بۇگىنگە دەيىن جالپى قۇنى 7,2 ملرد تەڭگە بولاتىن جوبالار قولداۋ تاپتى. قور 370 مىڭ قازاقستاندىق ازاماتقا, ونىڭ ىشىندە 48 مىڭ بالاعا كومەك كورسەتۋگە ارنالعان 44 قايىرىمدىلىق جوباسىن جۇزەگە اسىردى», دەدى ع.اۋعانوۆ.
سونداي-اق 2022 جىل «سامۇرىق-قازىنا» قورىندا قاۋىپسىزدىك جانە ەڭبەكتى قورعاۋ جىلى بولىپ جاريالاندى. ع.اۋعانوۆتىڭ ايتۋىنشا, «نول جاراقاتتانۋ» كونتسەپتسياسىنىڭ «جەتى التىن ەرەجەسىن» جۇزەگە اسىرۋ اياسىندا بيزنەستى جۇرگىزۋ مودەلى قايتا قارالدى. وندىرىستىك جاراقاتتانۋدى تومەندەتۋگە باعىتتالعان تسيفرلىق شەشىمدەر ەنگىزىلدى. ەڭبەكتى قورعاۋ, ونەركاسىپتىك قاۋىپسىزدىك جانە قورشاعان ورتانى قورعاۋ جونىندەگى كوميتەتتىڭ وتىرىستارىندا ۇزدىك كەيستەر تانىستىرىلىپ, قايعىلى وقيعالاردى زەرتتەۋ ناتيجەلەرى تالقىلاندى, وعان جول بەرمەۋ شارالارى ازىرلەنىپ, ونەركاسىپتىك نىساندارعا كوشپەلى اۋديت جۇرگىزۋ تاجىريبەسى قولعا الىندى.
