پارلامەنت • 01 قازان، 2022

احمەت بايتۇرسىن ۇلىنىڭ ەسىمى ەشقاشان ۇمىتىلمايدى - ماۋلەن اشىمباەۆ

161 رەت كورسەتىلدى

مەملەكەت باسشىسىنىڭ تاپسىرماسىمەن پارلامەنت سەناتىنىڭ توراعاسى ماۋلەن اشىمباەۆ احمەت بايتۇرسىن ۇلىنىڭ 150 جىلدىعىنا ارنالعان ءىس-شارالارعا قاتىستى، دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.

«ۇلتىنا عۇمىرىن ارناعان ۇلى تۇلعا» اتتى عىلىمي-تاجىريبەلىك كونفەرەنتسيادا سەنات سپيكەرى ەل پرەزيدەنتى قاسىم-جومارت توقاەۆتىڭ قۇتتىقتاۋ حاتىن وقىپ بەردى.

«احمەت بايتۇرسىن ۇلى – تاريحىمىزدا ايرىقشا ورنى بار بىرەگەي تۇلعا. الاش جۇرتىنىڭ اسىل پەرزەنتى حالقىمىزدىڭ تاعدىرى سىنعا تۇسكەن كۇردەلى كەزەڭدە ەرەكشە قايراتكەرلىك تانىتتى. شىن مانىندە، احاڭنىڭ ءومىر جولى – ۇلتقا قىزمەت ەتۋدىڭ جارقىن ۇلگىسى. ارىستارىمىزدىڭ ەسىمىن ارداقتاپ، ۇلاعاتتى ءىسىن جالعاستىرۋ – حالقىمىزدىڭ قاستەرلى پارىزى»، دەلىنگەن مەملەكەت باسشىسىنىڭ قۇتتىقتاۋىندا.

ءوز سوزىندە ماۋلەن اشىمباەۆ ۇلت ۇستازى، اسا كورنەكتى عالىم، اعارتۋشى، تاريحي تۇلعا احمەت بايتۇرسىن ۇلىنىڭ ساياسي جانە رۋحاني مۇراسىنا كەڭىنەن توقتالىپ ءوتتى.

سونداي-اق سەنات توراعاسى مەرەيتويدىڭ قازاق ءۇشىن قاستەرلى تورعاي جەرىندە اتالىپ ءوتۋىنىڭ ايرىقشا ماڭىزىنا نازار اۋداردى. ول مەملەكەت باسشىسى ەل دامۋىنىڭ جاڭا تاريحي كەزەڭىندە وڭىرلەردى وركەندەتۋ ماسەلەسىنە باسا ءمان بەرىپ وتىرعانىن، وسى باعىتتا ءتيىستى ورگاندارعا ناقتى تاپسىرمالار بەرگەنىن جانە الداعى مىندەتتەردى ناتيجەلى ورىنداۋ ءۇشىن پارلامەنت جۇيەلى جۇمىس جۇرگىزىپ جاتقانىن ايتتى.

«مەملەكەت باسشىسى جاڭا جانە ادىلەتتى قازاقستان قۇرۋ باعدارىن ايقىنداپ بەردى. قازىرگى تاڭدا وسى باعىتتا اۋقىمدى جۇمىس اتقارىلىپ جاتىر. ەلىمىزدە كەشەندى ساياسي، ەكونوميكالىق جانە الەۋمەتتىك وزگەرىستەر ىسكە اسىرىلۋدا. ەڭ باستى مىندەت – تاۋەلسىزدىگىمىزدى نىعايتىپ، حالقىمىزدىڭ ءال-اۋقاتىن جاقسارتۋ. ول ءۇشىن تۇتاس ەلىمىزدى، سونداي-اق ءار ءوڭىردى وركەندەتۋدىڭ ماڭىزى زور. پرەزيدەنتىمىزدىڭ جاڭا باستامالارى قازاق ءۇشىن قاستەرلى مەكەن سانالاتىن تورعايدىڭ دامۋىنا تىڭ سەرپىن بەرەدى دەپ سەنەمىز»، دەگەن سەنات توراعاسى ادىلەتتى قازاقستان قۇرۋ جانە وسكەلەڭ ۇرپاقتى وتانشىلدىق رۋحپەن تاربيەلەۋ جولىندا تورعاي توپىراعىنان تۇلەگەن تۇلعالاردىڭ رۋحاني مۇراسىن دارىپتەۋدىڭ ماڭىزدى ەكەنىن تىلگە تيەك ەتتى.

كونفەرەنتسيادا بەلگىلى زيالى قاۋىم وكىلدەرى، كورنەكتى قوعام قايراتكەرلەرى دە ءسوز سويلەدى. ولاردىڭ قاتارىندا جازۋشى، عالىم قويشىعارا سالعارا، الاشتانۋشى انەس عاريفوللا، احمەتتانۋشى سەرىكباي وسپانوۆ جانە تاعى باسقا ساراپشىلار بار.

ءىس-شارا بارىسىندا احمەت بايتۇرسىن ۇلى مەدالىمەن، ء«تىل جاناشىرى» سىيلىعىمەن جانە «جانگەلدى اۋدانىنىڭ قۇرمەتتى ازاماتى» اتاعىمەن ماراپاتتاۋ ءراسىمى ءوتتى.

مەرەيتوي اياسىندا قوستاناي وبلىسىنىڭ تورعاي اۋىلىندا الاش ارىستارى احمەت بايتۇرسىن ۇلى مەن مىرجاقىپ دۋلات ۇلىنا ارنالعان ەسكەرتكىش اشىلدى. اشىلۋ سالتاناتىندا سەنات سپيكەرى كيەلى تورعاي وڭىرىنەن ۇلت تاريحىنداعى كوپتەگەن ۇلى تۇلعالار شىققانىن، ولاردىڭ قاتارىندا ابىلاي حاننىڭ سەرىگى بولعان شاقشاق جانىبەكتىڭ، ەلىنىڭ ەرتەڭى ءۇشىن اتقا قونعان امانگەلدى مەن كەيكى باتىرلاردىڭ، حالقىن بىرلىككە، بىلىمگە، وتانشىلدىققا شاقىرعان ىبىراي التىنسارين، احمەت بايتۇرسىن ۇلى جانە مىرجاقىپ دۋلات ۇلىنىڭ ەسىمدەرى ەرەكشە اتالاتىنىن ايتتى. سونداي-اق ماۋلەن اشىمباەۆ قازاق ءۇشىن بۇل ولكەنىڭ قاسيەتى بولەك ەكەنىنە جانە بۇل ءاردايىم حالقىمىز جادىنا ساقتالاتىنىنا نازار اۋداردى.

سونىمەن قاتار سەنات توراعاسى جىل باسىنان بەرى ا.بايتۇرسىن ۇلىنىڭ ءومىرى مەن وسيەتىن دارىپتەۋ ماقساتىمەن ەلىمىزدە اتقارىلعان جۇمىستارعا توقتالدى.

«مەرەيتوي اياسىندا ۇلت ۇستازىن ۇلىقتاۋ باعىتىندا اۋقىمدى جۇمىستار اتقارىلعانىن كورىپ وتىرمىز. بىرقاتار ەلدىمەكەندەرگە، كوشەلەرگە جانە نىساندارعا احاڭنىڭ ەسىمى بەرىلدى. قايراتكەردىڭ 12 تومدىق شىعارمالار جيناعى جارىق كوردى. احمەت بايتۇرسىن ۇلى تۋعان جەردە كەسەنەسى تۇرعىزىلدى. سول جەردە مۋزەي-ءۇي بوي كوتەردى. ۇلتىمىزدىڭ رۋحاني كوسەمىنىڭ ەڭبەگىن ناسيحاتتاۋ جانە ونى تانۋ جۇمىستارى الداعى ۋاقىتتا دا قارقىندى جالعاسا بەرەدى»، دەدى ماۋلەن اشىمباەۆ.

وسى كۇنى احمەت بايتۇرسىن ۇلى مەن مىرجاقىپ دۋلات ۇلىنىڭ ادەبي مۋزەي-ءۇيى كوپشىلىككە تانىستىرىلدى.

بۇدان باسقا سەنات توراعاسى وبلىستا بولعان ءورتتىڭ سالدارىن جويۋعا قاتىسقان ەرىكتىلەرمەن ارنايى كەزدەستى.

سوڭعى جاڭالىقتار

QazaqGaz ديرەكتورلار كەڭەسىنىڭ قۇرامى وزگەردى

قازاقستان • 02 جەلتوقسان، 2022

ماۋلەن اشىمباەۆ قىتاي حالقىنا كوڭىل ايتتى

پارلامەنت • 02 جەلتوقسان، 2022

ۇقساس جاڭالىقتار