قازاقستان • 26 قىركۇيەك، 2022

قازاقستاننىڭ دحر مەن لحر رەفەرەندۋمى بويىنشا ۇستانىمى قانداي؟

94 رەت كورسەتىلدى

سىرتقى ىستەر مينيسترلىگى لحر، دحر، سونداي-اق ۋكراينانىڭ زاپوروجە جانە حەرسون وبلىستارىنىڭ كۆازيمەملەكەتتىك اۋماقتارىنىڭ رەسەيگە قوسىلۋى بويىنشا وتكەن رەفەرەندۋمعا قاتىستى قازاقستاننىڭ ۇستانىمىن جاريالادى، دەپ حابارلايدى Egemen.kz.

«قازاقستان مەملەكەتتەردىڭ اۋماقتىق تۇتاستىعى مەن ەگەمەندىگىن ساقتاۋ پرينتسيپتەرىن قولدايدى. مەملەكەت باسشىسى بىرنەشە رەت، سونىڭ ىشىندە جاقىندا بۇۇ مىنبەرىنەن سويلەگەن سوزىندە دۇنيەجۇزىلىك امبەباپ ۇيىمنىڭ جارعىسىنا نەگىزدەلگەن حالىقارالىق قۇقىق قاعيداتىن بۇلجىتپاي ساقتاۋدىڭ ماڭىزدى ەكەنىن ناقتى ايتتى»، دەدى سىرتقى ىستەر مينيسترلىگىنىڭ رەسمي وكىلى ايبەك سمادياروۆ.

اتالعان جارعى بۇۇ-عا مۇشە مەملەكەتتەردىڭ بەيبىتشىلىكتى ساقتاۋ جانە مەملەكەتتەردىڭ اۋماقتىق تۇتاستىعىنا قۇرمەتپەن قاراۋ قاعيدالارىنا نەگىزدەلگەن. 

«سوندىقتان ءبىز ساياسي ديالوگ ورناتۋعا جان-جاقتى كومەك كورسەتۋگە دايىن ەكەنىمىزدى راستايمىز. بۇل رەتتە ەلىمىز وڭىرلىك دەڭگەيدە دە جاھاندىق دەڭگەيدە دە تۇراقتىلىقتى ساقتاۋدى ەڭ ماڭىزدى مىندەت دەپ سانايدى»، دەدى ا.سمادياروۆ. 

بۇعان دەيىن قاسىم-جومارت توقاەۆ ۆلاديمير پۋتينمەن كەزدەسۋىندە: «ەگەر ۇلتتاردىڭ ءوزىن-ءوزى ايقىنداۋىنا جول بەرىلسە، وندا جەر شارىندا بۇۇ-عا كىرەتىن 193 ەلدىڭ ورنىنا 500-600 مەملەكەت پايدا بولار ەدى»، دەگەن بولاتىن.

«سول سەبەپتى ءبىز تايۆاندى دا، كوسوۆانى دا، وڭتۇستىك وسەتيانى دا، ابحازيانى دا مويىندامايمىز. دەمەك، ءبىز كۆازيمەملەكەتتىك اۋماق بوپ ەسەپتەلەتىن دونەتسك پەن لۋگانسككە قاتىستى دا وسى ءپرينتسيپتى ۇستانامىز»،  دەگەن سول كەزدەسۋدە قاسىم-جومارت توقاەۆ. 

ەسكە سالايىق، جۇما كۇنى لحر، دحر، سونداي-اق ۋكراينانىڭ زاپوروجە جانە حەرسون وبلىستارىندا رەسەيگە قوسىلۋ تۋرالى رەفەرەندۋم باستالدى. داۋىس بەرۋ 27 قىركۇيەككە دەيىن جالعاسادى.

سوڭعى جاڭالىقتار

دوللار قىمباتتادى

قارجى • بۇگىن، 16:27

ۇقساس جاڭالىقتار